Te i manu nasö i mujëë waka da i

„Mi bi kë dëdë di mi manu piki mi taa a o disa mi faa go libi ku wan möön njönku mujëë. Di soni bi hati mi seei te mi pakisei dee soni dee mi bi du fëën hedi.”—Maria, Sipanjöluköndë.

„Di mi mujëë go disa mi, nöö a bi djei kuma wan pisi u mi sinkii an bi ta wooko möön. Wa bi o sa du dee soni dee u bi taki taa u bi o du möön. So daka mi bi ta mëni taa mi böö u dee bookohedi u mi, ma tökuseei mi bi ta fii bookosaka baka.” —Bill, Sipanjöluköndë.

I SA fii bookosaka seei te i manu nasö i mujëë waka da i. A dë sö tuu taa so sëmbë di tööu bi da di wotowan u de paadon di a bi waka da de, nöö de bi mbei möiti u libi go dou.a Ma aluwasi de an booko tööu, tökuseei wan sëmbë di tööu di ko sabi taa di wotowan fëën waka dëën, ta tja fuka a hati seei. Andi sa heepi dee lö sëmbë dë ku di fuka di de ta tja?

BËIBEL TËKISI DI SA HEEPI I

Hii fa sëmbë di tööu bi fii bookosaka seei di di wotowan u de bi waka da de, tökuseei de bi feni kötöhati a di Wöutu u Gadu. De bi ko lei taa Gadu ta si dee wojowata u de, söseei taa a ta fii ku de.—Maleaki 2:13-16.

„Di dee soni mi bi ta pakisei, bi ko möön hebi da mi, nöö ju hën bi da mi kötöhati, sö taa mi bi sa ta dë waiwai baka.”—Psalöm 94:19.

Bill taki taa: „Di mi bi lesi di tëkisi aki, hën mi pakisei fa Jehovah ta kötö mi hati, leti kuma wan tata di ta fii da wan mii fëën.”

„Te sëmbë ta hoi deseei a i, nöö i seei ta hoi iseei a de tu.”—Psalöm 18:25.

Baka di di manu u wan mujëë de kai Carmen bi waka dëën sömëni liba longi, hën a bi taki taa: „Mi manu an bi hoi hënseei a di buka di mi ku ën bi mbei. Ma mi bi dë seiki taa Jehovah hën a bi hoi hënseei a mi. An bi o go disa mi nöiti.”

„Wan musu ta booko hedi a na wan soni e, ma un musu ta begi Masa Gadu nöömö . . . I musu ta tja hii dee fuka fii nango ta konda dëën, nöö a o da i kötöhati. Nöö di kötöhati di a o da i dë o bigi pasa hii sëmbë fusutan.”—Filipi 4:6, 7.

Wan mujëë de kai Sasha bi taki taa: „Mi lesi di tëkisi aki sömëni pasi. Möön mi bi ta begi Gadu, möön a bi ta da mi kötöhati.”

Hii dee sëmbë dee u bi taki soni u de aki, an bi ta fii u libi go dou möön. Ma de bi buta futoou a Jehovah, hën de lesi di Wöutu fëën faa da de kaakiti. Bill taki taa: „Di biibi di mi bi abi bi da mi kaakiti di a bi djei kuma hii mi libi bi poi kaba a sösö. Hii fa a bi dë kuma mi bi ta waka wan pisiten a ’di dungu lagi kamian’, tökuseei Gadu bi dë ku mi.”—Psalöm 23:4.

a Ee i kë sabi ee wan sëmbë di tööu sa da di wotowan fëën paadon ee a waka dëën, nasö ee an musu du ën, nöö luku dee woto a di pisi „Als een huwelijkspartner ontrouw is” u di Ontwaakt! u 22 u piki-deewei-liba u di jaa 1999, bladsëidë 3-5, 5-9, ku 9-12.

Andi sa heepi i fii hoi dou

Lesi tëkisi di sa da i kötöhati, nöö pakisei fundu u de.

Bill bi taki taa: „Mi bi lesi di Bëibel buku Jöpu ku di buku Psalöm. Mi bi ta maaka dee pisi dee mi si ta kai ku di fuka u mi. Nöö mi ko fusutan taa dee sëmbë dee bi sikifi dee buku aki bi ta fii di pen di mi ta fii.”

Poku sa da i kötöhati.

Carmen taki taa: „Te ma bi sa duumi a ndeti, nöö mi bi ta haika poku. A bi dë wan soni di bi ta da mi kötöhati seei.” Daniel taki taa: „Mi bi lei pëë gitali, nöö di poku bi ta heepi mi u mi fii bunu.”

Konda da wotowan unfa i ta fii.

Daniel taki taa: „Ma bi dë wan sëmbë di bi guwenti u konda da wotowan unfa mi bi ta fii. Ma mi bi abi wanlö bumbuu mati, nöö mi bi ta piki de hii daka unfa mi bi ta fii. Mi bi ta piki de unfa mi ta fii te mi bi ta sikifi biifi da de, söseei te mi bi ta fan ku de. Di soni dë bi ta heepi mi seei.” Sasha taki taa: „Dee famii u mi bi heepi mi seei. Hii juu mi mama bi ta dë kabakaba u heepi mi. Ee mi bi kë fan ku ën, nöö a bi ta tei ten u haika mi. Mi tata seei bi ta mbei mi fii taa a lobi mi, nöö a bi heepi mi u mi fii bunu.”

I musu begi hii juu.

Carmen taki taa: „Mi bi ta begi hii juu. Mi bi ta fii taa Gadu an disa mi, taa a bi ta haika mi, söseei taa a ta heepi mi. Hii fa soni bi taanga da mi, tökuseei mi ku Gadu bi ko dë möön gaan mati.”