Na wan sëmbë sa kule da dëdë
PAKISEI taa i ta luku wan fëlön u wan nëbai kanda mujëë di i lobi. A bigi u di fëlön, de ta lei fa a bi dë miii, fa a bi ta tei hii hën ten u lei kanda. I ta si fa a ta kanda, fa a nango a hii së u di goonliba nango ta kanda, nöö a ko toon wan gaan nëbai kandama. Ma te u kaba fëën, a ko gaandi hën a dëdë.
Di fëlön aki na anasi woto, ma a dë wan soni di pasa tuutuu. Aluwasi ee di sëmbë bi dë wan kandama, nasö wan könima, wan balima, nasö wan woto sëmbë di hia sëmbë sabi, tökuseei a bi o ko gaandi, nöö a bi o dëdë tu. Hii fa sö wan sëmbë du te a hia soni, tökuseei di sëmbë aki bi o sa du te a hia soni jeti, ee an bi ko gaandi ku ee an bi dëdë.
Di soni aki an suti u pakisei, ma di soni aki o pasa ku hii u tuu (Peleikima 9:5). Aluwasi andi u ta du, tökuseei hii u tuu ta gaandi ta dëdë. Boiti di dë, wan gaan hogi sa miti u di sa sati di libi fuu, nasö wan siki sa kisi u di sa kii u möön hesi. Di Bëibel ta taki taa di libi fuu dë kuma „wan sumuku fii si pala sö, nöö ja si ën möön.”—Jakobosi 4:14.
U di sëmbë ta si taa libisëmbë an ta libi longi, mbei de ta pakisei taa „boo bia ta njan ta bebe ta libi kumafa u kë, biga amanjan te u dëdë nöö kaba u kaba” (1 Kolenti 15:32). Ma fuu taki ën kumafa a dë, sëmbë ta libi a di lö fasi aki, u di de an sabi na un ten de o dëdë, söseei de an sabi unfa di libi u de o dë a di ten di ta ko. So juu, u ta hakisi useei ee tuu u di libi hën disi kaa. U ta hakisi useei di soni aki möönmöön te wan hati soni miti u. Ma naasë u sa feni di piki?
Sömëni sëmbë ta pakisei taa dee njunjun soni di könima ta ko sabi o da de di piki. Dee njunjun soni di dee könima ko sabi ku dee njunjun deesi di dee data ta mbei, ta heepi sëmbë u de libi pikisö möön longi. So könima ta mbei taanga möiti u feni soni di sa mbei sëmbë libi möön longi möön fa u ta libi nöunöu. Aluwasi ee de feni wan soni nasö ee de an feni, di soni di u musu hakisi useei da: Faandi mbei u ta ko gaandi söseei faandi mbei u ta dëdë? U sa ta dë ku di mëni taa wan daka o ko ka wa o ta dëdë möön u? Dee woto dee ta ko o taki u dee soni aki, söseei u di hakisi aki: Di libi hën disi kaa u?