Woto u di Jaarboek 2014
Sëndëlengi di bi ta wooko fajafaja bi mbei di wooko göö go a fesi
Sensi di jaa 1975, de bi manda sömëni sëndëlengi di bi kisi lei a di Giliati-siköö go a Siela Leonu ku Ginea u mbei di wooko go a fesi. So u de bi ta dini a woto Afiikan köndë, nöö hesihesi de bi ko guwenti ku di fasi u libi u dee köndë dë. Wotowan an bi go na Afiikan wan daka. Unfa de bi o du libi a dee köndë dë? Luku andi wan tu u de bi taki.
„Dee sëmbë bi abi sakafasi, nöö de bi kë sabi soni u Gadu seei. Di si di mi bi ta si fa di tuutuu lei bi ta mbei de tooka de libi, bi ta mbei mi piizii seei.”—Hannelore Altmeyer.
„Mi bi musu lei u libi ku di fa di wei u di köndë bi dë, söseei ku dee siki u di köndë tu. Dee soni dë bi ta mbei a ta taanga da mi. Ma di heepi di mi bi ta heepi limbohati sëmbë u ko dini Jehovah an bi dë u sösö, biga di soni dë bi ta mbei mi piizii seei.”—Cheryl Ferguson.
„Mi lei u ko abi pasensi. Di mi bi hakisi wan sisa na un ten dee sëmbë dee o ko luku ën ta ko, hën a piki mi taa: ’Kandë tide. Nasö amanjan. Nasö woto amanjan.’ Mi bi luku diiin, mi bi foondo, u di a bi taki seei taa: ’Ma de o ko!’”—Christine Jones.
„Teni-a-fö sëndëlengi di dë u peipei lö, söseei di an kiija a di wan seei fasi, bi ta libi a di sëndëlengi wosu a Freetown. Nöö tu weesei wosu, wan wasiwosu, wan wasimasini, ku wan boiwosu nöö bi dë da hii sëmbë. Nöö soni u njan an bi hia, söseei de an bi dë gösöntu soni tu. Te fii bi kë mëni nöö faja bi nango. So juu a bi ta tei sömëni daka longi ufö faja bi ko baka. Sömëni fuu bi ta kisi malaria ku woto pei siki di sëmbë bi ta kisi a dee lö köndë dë. Hii fa a bi djei kuma soni an bi o waka bunu da u, tökuseei u lei fa u libi makandi ku useei, ta da u seei paadon, söseei u ta piizii aluwasi fa di libi bi taanga seei. Di peleikiwooko bi ta da u piizii, söseei dee sëndëlengi bi ta mbei mati ku deseei.”—Robert ku Pauline Landis.
„Di ten di u bi dë a Siela Leonu bi dë wan u dee möön bunu ten fuu libi. An hati u taa u bi go wooko ala, nöö wa bi abi soni u ta kuutukuutu. U ta hangi ala seei.”—Benjamin ku Monica Martin.
„Wan lesi di u bi go duumi a wan mujëë pisi di bi kë sabi soni u Bëibel, hën a bi kë da u wan soni u njan di wa bi si nöiti wan daka a u libi. A bi taa: ’Mi boi sindeki. Ma mi puu dee langa tanda fëën. U bi o kë njan pikisö u?’ A wan köni fasi u bi piki ën taa wa o njan, ma tökuseei a bi kë da u. Hii fa u bi ta miti dee lö soni aki, u bi ta tei ën u bigi taa dee sëmbë bi ta tei u ku wai a de wosu, nöö u bi ko lobi dee sëmbë aki seei.”—Frederick and Barbara Morrisey.
„A hii dee 43 jaa di mi du di sëndëlengiwooko, mi bi libi makandi ku möön leki 100 sëndëlengi. A bi dë wan gaandi u ko sabi sömëni sëmbë. Nöö hii fa dee sëmbë aki bi tooka a manii, tökuseei de bi ta wooko ku di wan seei maaka a pakisei. A dë wan piizii soni u wooko makandi ku Gadu, söseei u si fa sëmbë ta tei di tuutuu lei u Bëibel!”—Lynette Peters.
Sensi di jaa 1947, 154 sëndëlengi dini a Siela Leonu, ku 88 dini a Ginea. Sömëni woto Kotoigi bi ko u heepi du di peleikiwooko tu. Nöunöu 44 sëndëlengi ta dini a Siela Leonu ku 31 ta dini a Ginea. Dee taanga möiti di de mbei, söseei di da di de da deseei u du di wooko, heepi sömëni sëmbë. Alfred Gunn, wan baaa di ta dini sömëni jaa longi kaa a di Bëikantoo komite taki taa: „Hii juu u ta pakisei de, nöö u lobi de.”
Mi bi ko lobi Siela Leonu
Cindy McIntire
DE PAI ËN 1960
A DOPU 1974
DI LIBI FËËN: Sensi di jaa 1992 a ta du di sëndëlengiwooko. A du di sëndëlengiwooko a Guinea ku Senegali, nöö nöunöu a ta dini a Siela Leonu.
◆ Di mi ko libi a Siela Leonu, nöö tu wiki nöö a bi tei, hën mi bi ko lobi di köndë. Mi bi ta foondo u si fa sëmbë bi ta tja hebi soni a de hedi söndö u panjan de, nöö dee soni an bi ta kai tu. Sëmbë bi hia seei, nöö hii sëmbë bi abi soni ta du. Miii bi ta kule ta pëë a sitaati, ta baja, ta bati futu a goon, söseei ta naki maun ta pëë poku. A hii së ka mi bi go mi bi ta jei poku, ta si sëmbë ta du soni, söseei ta si peipei kulölu soni.
Di soni di mi bi möön lobi da di peleikiwooko. Dee sëmbë u Siela Leonu ta wai ku sëmbë di ko a di köndë u de. De ta lesipeki di Bëibel, nöö de ta haika te i ta konda soni fëën da de. De lo’ u kai mi ko a de wosu. So juu te mi nango, nöö de bi ta tja mi go buta a pasi. Di suti fasi fa de bi ta libi ku mi, bi ta heepi mi u na booko mi hedi ku pikipiki soni, kuma wata pena ku te faja an bi dë.
U di ma toou, mbei sëmbë ta hakisi mi so juu ee ma ta tjali u di mi wanwan dë. Wë u taki ën kumafa a dë, dee gaan hia soni di mi abi ta du, bi ta mbei taa ma bi ta fii taa mi wanwan dë. Mi abi hia maaka a mi libi.