Woto u di Jaarboek 2014

„Jehovah ku dee ëngëli o dë mi mati”

Mary di abi seibiteni jaa, di ta libi a Keinia bi dë sömëni jaa longi a wan Aniiti keiki. A bi dë wan sëmbë di bi ta heepi di keiki u feni möni, söseei a bi heepi u mbei wan u dee keiki di dë a di pisiwata u de. Ma di wan u dee womi mii fëën toon Kotoigi, an bi wai ku di soni dë. A bi kai ën faa ko a dee komakandi, ma Mary an bi kë go, biga a bi taa a di fëën seei töngö nöö a bi kë jei soni u Bëibel, di Kikiju töngö, ma an kë jei ën a Swahili töngö. Te u kaba fëën, Mary bi kisi wan kai u go a wan u dee könklësi di bi o hoi a di Kikiju töngö, nöö a bi go. Di a go a di könklësi a bi sindo ka dee gaan sëmbë ta sindo. A bi foondo seei u di dee sëmbë bi libi ku ën a wan sutifasi, söseei a wan lobihati fasi. A bi ta haika bunu seei te dee baaa bi ta hoi dee taki, nöö a bi wai seei ku dee soni dee a bi ta jei. Di de bi hakisi ën ee a kë de ko lei ën soni u Bëibel ku di brochure Haika Gadu, nöö wantewante a bi kë.

Baka di de bi lei ën söni wan tu liba, hën a bi taki taa a kë ko toon wan Jehovah Kotoigi, hën a kumutu a di keiki ka a bi dë. Dee fesima u di keiki hati bi boonu ku ën seei. Hën de kai wan paiti u di foto Nairobi, u ko fan ku ën. Di paiti bi mbei möiti u fan ku Mary be an go disa di keiki, ma a bi dë nömönömö u disa di keiki. Hën di paiti hakisi ën taa: „Ambë o dë dee mati fii ee i disa di keiki? Biga i a’ sömëni mati a di keiki, nöö dee sëmbë dee ta libi a i bandja dë a di keiki tu.”

Hën Mary piki ën taa: „Jehovah ku dee ëngëli o dë mi mati. Nöö dee Kotoigi seei o dë mi mati tu.”

Di di paiti si taa an sa tooka Mary pakisei, hën a go. Mary bi tan lei soni u Bëibel go dou, a go a fesi seei, nöö a nango a hii dee komakandi, hii fa an ta libi zuntu u di kamian ka dee komakandi ta hoi. Wan daka di an bi sa tei besi u go a komakandi, hën a bi waka tu juu longi u go a di komakandi, hii fa tjuba bi ta kai seei. Hii fa dee sëmbë dee ta libi nëën bandja ta du ku ën, tökuseei Mary dë kabakaba u dou di maaka di a buta, u tei dopu.

„Aki i bi musu ko u?”

Wan Somali mujëë a Sweden köndë bi kisi wan kai u go a wan komakandi a wan könuköndë zali, nöö a bi buta taa a o go. Ma soni an bi waka bunu. Na wan sëmbë bi dëën wan suti ko, nöö hii sëmbë bi ta luku ën seei. Di soni aki bi mbei sen kisi ën. Wan sëmbë di bi si taa an bi ta fii u sai dë, bi hakisi ën taa: „Aki i bi musu ko u?”

Hen a piki ën taa: „Wë, mi si kuma na aki mi bi musu ko.” Hën a go. Baka ten di a miti ku dee Kotoigi dee bi kai ën faa ko a komakandi, hën a piki de taa nöiti möön a o ko ala. Nöö hati fëën bi boonu tu. De bi hakisi deseei andi bi pasa, biga de an bi si ën a zali. Baka di de fan wan pisi, hën de ko fusutan taa a wan keiki a bi go!

Dee Kotoigi bi toona dëën wan kai. Hën a taa a o go, ma a o tan pasa teni miniti ee an ta fii u tan dë. Ma di a go a zali, hën hii sëmbë dëën wan suti ko seei! A bi suti dëën tee taa hën bi dë di lasiti sëmbë di kumutu a di zali. Sensi di ten dë, hën a bigi nango a dee komakandi, nöö nöunöu a dë wan dopu peleikima.