Unfa u sa du di diniwooko fuu möön bunu—Unfa i musu piki wan sëmbë di hati fëën boonu

Faandi mbei a dë fanöudu: Sömëni u dee sëmbë dee u ta miti a di peleikiwooko ta fan a wan lesipeki fasi ku u. Ma Jesosi bi taki a fesi taa so sëmbë bi o buuse u (Joh. 17:14). Fëën mbei an musu foondo u te u miti wan sëmbë a di peleikiwooko di hati fëën boonu ku u. Ee u miti sö wan sëmbë, nöö u bi o kë piki ën a wan fasi di Jehovah ta feni bunu (Lom. 12:17-21; 1 Pet. 3:15). Te u du sö, nöö soni an o ko hogi. Söseei di sëmbë, ku woto sëmbë di ta luku u o si fa u tja useei, nöö di soni dë o mbei de o kë haika te Jehovah Kotoigi o ko a de wan woto pasi.—2 Kol. 6:3.

Fa u musu du ën:

Fan a wan sutifasi. Di soni aki o mbei soni an ko möön hogi. Na si kuma ku i di sëmbë abi ën (Peleik. 7:9). Kandë hati fëën boonu u di a a’ wan fuka fëën, nasö u di u go nëën a wan juu di na fiti. A kan taa di buka di u ta paaja hën mbei hati fëën boonu, u di sëmbë konda soni fuu dëën di an dë tuutuu soni.—2 Kol. 4:4.
Piki ën a wan sutifasi (Nöng. 15:1). I bi weki ën a duumi ö? Nasö i bi go nëën a wan juu di a bi ta du soni ö? Wa ta hakisi sëmbë paadon u di u ta peleiki da de, ma a bi o bunu fuu hakisi di sëmbë paadon u di u go nëën a wan juu di na fiti. Hati fëën boonu u di a jei soni fuu di na tuu ö? Ee a dë sö, nöö kandë i sa taki: „Mi ta fusutan faandi mbei hati fii boonu. Ma di soni di i jei fuu na sö a dë tuutuu e. Mi sa konda da i fa soni dë tuutuu ö?” A taki u wan soni di nama ku di biibi fuu ö, kandë u di puu di de ta puu wan sëmbë a di kemeente, nasö di tei di wa ta tei buuu ö? I sa taki: „Mi ta fusutan i. Woto sëmbë bi hakisi deseei di seei soni aki sö tu. Mi sa lei i andi Bëibel ta taki u di soni aki ö?”
Ee di sëmbë hati boonu seei, nöö a bi o möön bunu fii waka go söndö fii taki wan soni. Ee a taa an kë Jehovah Kotoigi nëën dööbuka möön, nöö i sa piki ën taa u jei andi a taki, nöö wa o ko möön.

Pooba di soni aki di liba aki:

Hoi demo u di soni aki a di wosudendu dini fii.
Baka te un kumutu a wan sëmbë di hati fëën bi boonu, nöö i ku di sëmbë di ta wooko makandi sa taki unfa i bi sa piki di sëmbë a wan möön bunu fasi.