**Unfa u sa du di diniwooko fuu möön bunu—Paati di Bëibel lei-buku**

Faandi mbei a dë fanöudu: Di Bëibel lei-buku da wan u dee fanöudu buku di u ta tei u lei sëmbë soni u Bëibel. Ma ufö u bigi lei wan sëmbë ku di buku aki, u musu dëën wan fëën seei. Fëën mbei hii u tuu musu mbei möiti u ko sa’ u paati di Bëibel lei-buku da sëmbë a di peleikiwooko (Nöng. 22:29). Sömëni fasi dë u paati di buku aki da sëmbë, nöö dee peleikima sa wooko ku wan u dee fasi dë.

Fa u musu du ën:

Buta wan hakisi da di sëmbë di a bi o kë ko sabi di piki fëën, sö taa i sa tjëën go a di woto u di buku di ta piki di hakisi dë. I sa buta wan u dee hakisi dee ta dë a bigi u wan woto dëën. Baka te a piki, nöö i sa lesi wan tëkisi dëën di nama ku di soni di un taki.Un sa lesi di palaklafu di nama ku di woto dë, nöö un taki fëën kölö sö.
Wan woto soni di i sa du, hën da i sa lei ën dee hakisi dee dë a dee fosu bladsëidë u di buku u hai hën pakisei, nöö baka di dë i sa lei ën un woto a di buku ta piki dee hakisi dë. Kandë i sa taki u wan hogi soni di i bi jei a njunsu. Baka di dë i sa piki ën taa sömëni sëmbë ta foondo te de ko sabi di piki u dee hakisi dee sikifi a bladsëidë 3. Nasö piki ën taa i nango a dee sëmbë u di pisiwata ka i ta libi u konda da de un bunu soni o pasa a di ten di ta ko. Lei ën dee peentje a bladsëidë 4 ku 5, nöö hakisi ën taa: „Undi u dee bunu soni aki i bi o kë si pasa nöunöu?” Nasö piki ën taa i ta pasa kölö sö a sëmbë u heepi de u feni piki u dee möön fanöudu hakisi u di libi. Baka di dë, lei ën dee hakisi dee sikifi a basu u bladsëidë 6, nöö hakisi ën undi u dee hakisi a bi o kë feni piki fëën.
Suku u bigi wan Bëibel studie ku di sëmbë di fosu pasi di i miti ën. I sa piki ën taa: „U ta lei sëmbë di buku aki. I sabi ën u? [Da di sëmbë pasi faa piki.] Ee i abi wantu miniti, nöö mi kë lei i unfa i sa wooko ku di buku aki makandi ku di Bëibel fii u ko sabi soni u Bëibel.”

Pooba di soni aki di liba aki:

Hoi demo u di soni aki a di Wosudendu Dini fii.
Te i dë a peleiki, nöö konda da dee woto peleikima andi i seeka u taki (Nöng. 27:17). Tooka di soni di i ta taki ee i si taa an ta hai sëmbë pakisei.