I ta seeka iseei u mëni di dëdë u Jesosi ö?

Jesosi bi sabi taa 13 Nisan u di jaa 33 Ba.K. bi o dë di lasiti ndeti di hën ku dee bakama fëën bi o dë makandi ufö de kii ën. A bi hoi di Pasika wan lasiti pasi ku de, hën baka di dë a bi seti wan njunjun fesa di u ta kai di Ndeti Njanjan u Masa. Dee bakama fëën bi musu tei seeka a fesi u bi sa hoi sö wan daka. Fëën mbei a bi manda Petuisi ku Johanisi u go seeka soni (Luk. 22:7-13). Sensi di ten dë, hën Keesitu sëmbë di ta mëni di dëdë u Jesosi ta tei seeka da di daka dë hiniwan jaa (Luk. 22:19). Unfa u sa seeka useei u mëni di dëdë u Jesosi a 3 u piki-deewei-liba?

Dee soni di dee Gaanwomi o seeka:

Seeka soni u hoi ën a di Könuköndë zali nasö a wan woto kamian. A musu abi bumbuu sindo kamian, nöö dee faja ku dee ventu masini musu ta wooko bunu. De musu seti soni u seeka di kamian ufö di daka dou.
Be wan bunu takima hoi di taki, wan fesima musu dë, ku baaa u begi da di bëëë ku di win.
Ee sömëni kemeente o hoi komakandi a di wan seei kamian, nöö un musu taki fiti na un juu dee komakandi o bigi ku un lati de o kaba. Un musu luku na un döö woon denda go a di zali, söseei na un döö woon kumutu. Un musu seti kamian ka woon buta wagi tu.
Buta heepima a di komakandi, söseei buta baaa di o paati di bëë ku di win, sö taa hii soni sa waka bunu.
Seti soni sö taa u abi di soifi bëë ku di soifi win. Söseei taa paabi dë, gaasi dë da di win, wan bunu tafa, ku tafa koosu.

Dee soni di dee peleikima o du:

Seti soni a fesi u dë fajafaja te woo paati dee pampia u kai sëmbë.
Sikifi dee në u dee sëmbë dee i kë kai. Dee studie fii, dee famii fii, dee siköö mati fii, sëmbë dee i ku de ta wooko, ku woto sëmbë di i sabi.
Lesi dee pisi u Bëibël dee nama ku di dëdë u Jesosi, nöö pakisei fundu u de.
Ko fuuku fii da sëmbë wan suti ko.