I ta seeka iseei u mëni di dëdë u Jesosi ö?

Di lasiti Pasika u Jesosi bi o dë wan apaiti wan seei. U di a bi o dëdë, mbei a bi seeka soni u njan di Pasika makandi ku dee apösutu fëën, nöö a bi seti wan njunjun soni di dee bakama fëën bi o ta hoi hiniwan jaa, di Ndeti Njanjan u Masa. A bi piki Petuisi ku Johanisi u de go seeka di kamba ka de bi o hoi ën (Lu 22:7-13; luku di peentje a bigi u di woto). Di soni aki ta mëni u fa a dë fanöudu tjika u seeka da di mëni di woo mëni di dëdë u Jesosi a 27 u gaanliba. Dee kemeente o seeka soni u wan baaa hoi di taki, dee o seeka soni u di bëëë ku di win, söseei ku woto soni jeti. Ma andi hiniwan fuu sa du u seeka da di mëni di woo mëni di dëdë u Jesosi?

Seeka i hati. Lesi dee pisi u Bëibel dee nama ku di dëdë u Jesosi. I sa feni wan skeima a di buku Öndösuku Gadu Wöutu hiniwan daka. I sa feni wan skeima tu a baka u di Bëibel a di pisi: Moro sani, pisi 23, A lasti pisi fu Yesus en wroko na ini Yerusalem (I sa luku di Libi ku di diniwooko fuu komakandi-buku u piki-deewei-liba u 2020 tu.) Dee sëmbë u wan wosudendu sa feni soni di nama ku di dëdë u Jesosi da di Wosudendu Dini u de, a di buku Ondrosuku Bijbel moro fini.

Kai wotowan u de ko tu. Dë fajafaja te woo paati di pampia u kai sëmbë. Pakisei dee sëmbë dee i sa kai. Kandë dee gobaka fii, dee sëmbë dee i bi ta lei soni u Bëibel fosu, dee mati fii ku dee famii fii. Dee gaanwomi o kai dee sëmbë dee an ta peleiki möön. Na fëëkëtë, ee wan sëmbë an ta libi a di pisiwata fii, nöö i sa suku di juu ku di kamian ka de o mëni di dëdë u Jesosi a di pisiwata ka a ta libi. I nango a di pisi AMBË DA U? di dë a di jw.org website fuu, nöö i nango a di pisi „Mëni di dëdë u Jesosi”.

Un woto soni u sa du möön u seeka useei?