Woto u di Jaarboek u 2015

Unfa di wooko bigi a Dominika Lepubliek

A sonde 1 u piki-deewei-liba u di jaa 1945, wan baaa de kai Lennert Johnson ku ën mujëë Virginia di bi kumutu a di Giliatisiköö, bi dou a Ciudad Trujillo, di hedi foto u di köndë Dominika Lepubliek (nöunöu de ta kai di foto aki Santo Domingo). De bi dë dee fosu Kotoigi di de manda go a di köndë dë.a Nöö a bi dë wan köndë ka feti bi feti seei, söseei ka di libi bi taanga. A sikifi a di Jaarboek u 1946 taa: „Di kamian aki bunu u du di pioniliwooko, nöö dee sëndëlengi aki, de bi dë dee fosuwan dee bi o bigi di wooko aki a di köndë.” Pakisei pikisö unfa soni bi dë: Na wan bëikantoo bi dë, na wan Könuköndë zali bi dë, söseei na wan kemeente bi dë a di köndë tu. Dee sëndëlengi aki an bi sabi na wan sëmbë a di köndë. Nöö de an bi ta fan Sipanjölutöngö wan bëtë. De an bi a’ tan kamian, söseei dee an bi a’ tafa, sutuu, nasö woto soni u buta a wosu. Unfa de bi o du?

Lennart bi taki taa: „U bi go a wan hotëli de kai Victoria, hën u feni wan kamba juu u feifi Amëëkandala wan daka, nöö de bi ta da i njanjan tu. A di sapate dë seei u bi feni di fosu sëmbë di u bigi ta lei soni u Bëibel. Luku fa soni bi waka. Tu mujëë u di köndë Dominika di u bi ta lei soni u Bëibel, di u bi dë a Brooklyn, bi da u dee në u wan tu famii u de ku mati u de. Wan u de de bi ta kai Data Green. Di u go luku di womi aki, hën u ko miti wan woto womi di ta libi nëën bandja de kai Moses Rollins. Baka di u piki de unfa u du feni de në ku di kamian ka de ta libi, hën de haika di Könuköndë bosikopu. Te u kaba fëën de bi kë lei soni u Bëibel. An bi tei longi möön, hën Moses bi ko toon di fosu peleikima u di köndë dë.”

„Wan daka o ko woo feni de nöömö”

A dee pisiten u 1935, wan womi de ta kai Pablo González bi bigi ta lesi di Bëibel. A bi ta libi a wan pisiwata u di köndë de kai Cibao Valley. Wan pisiten a bi go nama ku wan tu sëmbë u wan Protestant keiki. Ma baka di a si taa di fasi fa de bi ta libi an bi ta kai ku dee soni dee a bi ta lesi a Bëibel, hën a go fëën. Ma a bi ta lei soni u Bëibel go dou hën wanwan, nöö a bi bigi ta lei woto sëmbë dee soni dee a bi ta lei. A bi bigi ta lei dee famii fëën ku dee sëmbë dee bi ta libi a di pisiwata ka a ta libi, soni u Bëibel. Baka di dë, hën a bigi lei dee woto sëmbë dee bi ta libi a dee woto kamian. A sei di pisi goon fëën ku hii dee mbeti dee a bi ta kiija, sö taa a bi sa tei di möni dë u go peleiki a woto kamain.

A dee ten u 1942, Pablo bi nango ta peleiki da sëmbë u söwan 200 wosudendu dee bi ta libi zuntu ku di pisiwata ka a ta libi, nöö a bi ta hoi komakandi hii fa an bi miti dee Jehovah Kotoigi wan daka. A bi ta da sëmbë taanga u lei soni u Bëibel, söseei u du dee soni de ta lei. Sömëni sëmbë bi haikëën, nöö de bi tapa u sumuku tabaku, söseei de bi disa di libi di de bi ta libi ku hia mujëë nasö ku sömëni womi.

Wan u dee sëmbë di bi tei di Bëibel bosikopu di Pablo bi ta paaja, de bi ta kai Celeste Rosario. Nöö a bi taki taa: „Mi ta mëni jeti taa di m’ bi abi 17 jaa, di baaa u mi mma’ de kai Negro Jiménez, bi dë wan u dee sëmbë di Pablo bi ta lei soni u Bëibel. A bi ko a u pisi, hën a lesi wan tu Bëibel tëkisi da u. Dee soni dee mi bi jei, bi mbei mi bi buta taa mi o kumutu a di Lomusu keiki ka mi bi nango. Dee soni dee de bi ta lesi da u a keiki bi ta dë a Latijntöngö, nöö wa bi ta fusutan di töngö dë. Kölö sö baka di dë, hën Pablo González ko luku u, hën a da u degihati. A bi taki taa: ’U wa dë sëmbë u dee sömëni keiki dee u sabi aki, ma u abi sömëni baaa ku sisa a hii di goonliba. Wa sabi de jeti, nöö wa saanfa de ta kai de tu, ma wan daka o ko woo feni de nöömö.’”