Woto u di Jaarboek u 2015

Di fesima u di keiki ta haika awaa

Wan fesima u wan Protestant keiki u Zuid Afiikan bi taki taa: „Nöiti möön mi o misi di daka di u ta mëni di dëdë u Jesosi.” Andi bi mbei di keiki fesima aki, bi ko mëni di dëdë u Jesosi makandi ku dee Jehovah Kotoigi a piki-deewei-liba u di jaa 2014? Wë, tu baaa u tu tookatooka lö bi dë a di peleikiwooko, hën de bi go naki nëën döö. De bi sabi taa di fesima u keiki aki an bi lo’ u haika te Kotoigi bi nango peleiki dëën. Wan u dee baaa di de ta kai Adaine bi konda unfa soni bi waka. A bi taki taa: „U bi foondo seei taa a bi jabi di döö, hën a kai u ko a wosu. U bi fan longi seei. A bi foondo seei u si wan bakaa ta peleiki a wan pisiwata ka baakama nöö ta libi, söseei a bi foondo u si taa wan bakaa bi ta fan ku ën a di u fëën seei töngö. A bi bigi ta lei soni u Bëibel.”

Adaine ta taki möön taa: „Di womi aki bi dë sëndëlengi u di keiki ka a bi dë, nöö 40 jaa longi a bi dë wan u dee fesima u di keiki. Ma di a bi ko abi 80 jaa ufö a bi ko feni dee piki u dee soni dee a bi ta hakisi hënseei. A lobi di buku Teki na eksempre fu sma di ben abi bribi. Te u ta lei ën soni u Bëibel, nöö ta hoi dee soni dee a ta lei a hedi, nöö te a ta hoi taki a di keiki fëën, nöö a ta taki u dee soni dë. A lei dee sëmbë u di keiki fëën di buku Andi di Bëibel ta lei u tuutuu? A piki de taa: ’Te dee Jehovah Kotoigi ko a unu pisi ku di buku aki, u musu tei de a wosu, söseei u musu haika de, biga di buku aki abi sömëni fanöudu lei di nama ku Gadu.’”

Di fesima u di keiki bi piki Adaine taa dee woto fesima u di keiki bi bë wojo dëën taa an musu taki soni u Jehovah Kotoigi möön te a ta hoi dee taki fëën. An bi sabi andi a bi musu du. Adaine bi mëni di woto u wan paiti u Myanmar, di bi sikifi a di Jaarboek u 2013. Di Adaine lesi di woto u di paiti da di fesima u di keiki, hën a taa: „Mi di woto aki ta taki! Mi abi u du wan soni nöunöu, nöö ma sa wakiti longi möön u du ën.”

Di fesima u di keiki bi ko di fosu pasi ko mëni di dëdë u Jesosi makandi ku u a 14 u piki-deewei-liba u di jaa 2014, nöö a bi taki taa nöiti möön a bi o misi di daka di u ta mëni di dëdë u Jesosi. A bi taki tu taa a o tapa ku hii dee soni dee nama ku poipoi biibi.

Möönmöön de ta mbei Könuköndë zali

U di möönmöön sëmbë ta ko toon bakama u Jesosi mbei möön Könuköndë zali dë fanöudu. Di soni dë bi mbei taa a ëlufumu-liba u di jaa 2000, dee baaa u di köndë Dominika Lepubliek bi bigi mbei Könuköndë zali. De bi bigi wooko ku di seti di dë u heepi dee köndë dee an abi hia möni nasö woto soni u mbei Könuköndë zali. Di seti aki ta mbei taa dee baaa ku sisa u wan kemeente sa mbei wan hanse Könuköndë zali u de a sö wan aiti wiki dendu nöö. A wajamaka-liba u 2011, tu kulupu u baaa ku sisa di ta mbei Könuköndë zali, bi mbei nasö bi seeka sö wan 145 Könuköndë zali.

Dee baaa ku dee sisa aki dee ta mbei Könuköndë zali, ku dee Könuköndë zali dee de mbei, bi mbei sëmbë si di waiti u Jehovah. A wan piki foto di dë a bausë u di köndë, dee baaa bi si wan bunu kamian ka de bi sa mbei wan njunjun Könuköndë zali. Wan baaa di dë apaiti pionili bi go hakisi di sëmbe di abi di pisi goon ee a sa sei ën da de. Di womi di bi abi di goon bi piki di baaa taa: „An dë fii pena lasi i ten, biga ma o sei ën da unu, möönmöön ee wan keiki woon mbei nëën.”

Wan tu daka baka di de bi fan, hën di womi di bi abi di kamian bi go a Puerto Plata u go luku hën gaan baaa di bi dë wan Jehovah Kotoigi. Di a dou, hën a bi si taa di baaa fëën di dë ku suwaki ta libi ku wan lo sëmbë dee dë Jehovah Kotoigi. De bi tei ën a wosu ta sölugu. De bi ta tjëën go a data, a komakandi, söseei a peleikiwooko. Di womi bi hakisi hën baaa un mëni a ta paka dee sëmbë dee ta sölugu ën. Hën hën baaa bi piki ën taa: „Ma ta paka na wan möni. Dee sëmbë aki da baaa u mi.”

Di womi di bi abi di kamian an bi sa biibi taa dee Kotoigi abi sutifasi sö. Fëën mbei a bi bëli di baaa di dë apaiti pionili u piki ën taa a bi tooka pakisei, nöö a bi o sei di goon da de. Dee baaa bi bai di pisi goon, hën de bi bigi ta mbei wan zali. Ma di mujëë u di womi di bi abi di kamian an bi ta pakisei bumbuu soni u Jehovah Kotoigi seepiseepi. Ma, di a bi si fa dee baaa ta wooko makandi u mbei di zali, hën a bi taki taa: „Fosu toon a mi libi mi si sëmbë ta wooko sutisuti makandi sö.”