Woto u di Jaarboek u 2015

Te u ta lesipeki sëmbë, nöö soni o waka bunu

A 30 u gaanliba u di jaa 2014, hën wan baaa de kai Vasilii, di ta wooko sömëni jaa kaa a di Bëtëli u Losiaköndë, bi dë ta peleiki ku di bukuwagi zuntu ku di Bëtëli. Hën wan siköutu wagi lëi ko tapa. Hën wan siköutu womi saka kumutu a di wagi, hën a hakisi Vasilii a wan lesipeki fasi faa tapa ku di peleiki di a bi ta peleiki ku di bukuwagi, biga sömëni sëmbë u di pisiwata dë bi ta kaagi u di soni dë hedi. Wan woto siköutu womi bi ta mbei fëlön u di fan di Vasilii ku di woto siköutu bi ta fan. Vasilii bi si taa a bi o möön bunu faa disa u peleiki ka faa bi sai dë ta suku u lei di siköutu womi taa lanti hën bi dëën pasi faa peleiki. A di seei ten dë, wan tu sëmbë di bi ta waka pasa, bi taanpu ta luku andi ta pasa. Vasilii bi go, ma baka tu daka a bi go hakisi faa sa miti di hedima u dee siköutu, hën de dëën pasi faa miti ën. Di de bi dë ta fan, hën Vasilii da di hedima u dee siköutu tangi u di fanöudu wooko di dee siköutu ta du da dee sëmbë u di köndë, söseei u di bunu fasi fa de bi tja deseei di de bi ko fan ku ën tu daka pasa. Di hedima u dee siköutu bia luku di woto siköutu di hën ku ën bi sai dë, hën taa: „32 jaa kaa mi ta du di siköutu wooko aki, ma nöiti wan sëmbë bi da u tangi u di wooko di u ta du!” Vasilii bi heepi di hedima u dee siköutu faa ko fusutan taa lanti bi da Jehovah Kotoigi pasi u de sa peleiki, ma na pasa de ta pasa lanti buka. Di hedima u dee siköutu bi hakisi Vasilii ee faandi mbei an bi piki di siköutu taa di wëti u di köndë ta da de pasi u peleiki, di di siköutu bi ko piki ën taa a musu tapa u peleiki. Hën Vasilii taa: „Mi ta lesipeki dee siköutu. Pakisei unfa dee sëmbë dee bi sai dë bi o si ën, ee mi bi lei di siköutu taa an bi saandi di wëti buku ta taki.” Di soni dë bi bigi da di hedima u dee siköutu ku di woto siköutu di bi sai ku ën dë te na soni, hën de piki Vasilii taa sëmbë an o ta toobi ën möön te a o ta peleiki ku di bukuwagi.

„Jesosi hën da hedi fuu”

Andi o pasa ku dee baaa ku dee sisa fuu fa dee sëndëlengi an dë a di köndë nöunöu möön? De bi o ko fika „söndö hedi” kumafa di hedima u dee siköutu de kai Colón bi taki taa de bi o ko dë u? Wë nönö, Jesosi ’hën da hedi fuu, nöö u da di sinkii fëën. Biga leti kumafa wan sëmbë hedi abi taki fëën sinkii, nöö sö Masa Jesosi abi taki a u dee sëmbë fëën liba’ (Kol. 1:18). Nöö fëën mbei dee sëmbë u Jehovah dee ta dë a di köndë Dominika Lepubliek an bi fika „söndö hedi”. Ma Jehovah ku di ölganisaasi bi ta sölugu de go dou.

Baka di lanti bi manda dee sëndëlengi puu a di köndë, Baaa Donald Nowills bi kisi di gaandi u ta luku di wooko a di bëikantoo. Di baaa aki bi abi 20 jaa nöö, nöö fö jaa nöö a bi dopu. Hii fa a bi dini kuma wan keling-gaanwomi wan tu liba, tökuseei di wooko di a bi ta du a di bëikantoo bi dë wan njunjun soni dëën. Baaa Nowills bi abi wan piki kantoo fëën nëën wosu, nöö di wosu bi mbei ku pau, nöö a bi abi sënki daki. Di wosu goon an bi sima tu. A bi dë a wan kamian de ta kai Gualey, a wan gaan hogi pisiwata u di foto Ciudad Trujillo. Félix Marte bi heepi ën u kopi Di Hei Wakitimawosu da hii dee baaa ku dee sisa u di köndë.

Wan woto sisa de ta kai Mary Glass bi ta heepi Baaa Nowills tu. Nöö di sisa dë manu Enrique bi dë a dunguwosu a di pisi ten dë. Mary Glass bi taki taa: „Mi bi ta kumutu a wooko a 5 juu sapate, nöö mi bi nango a di kantoo u Baaa Nowills u go heepi sikifi Di Hei Wakitimawosu a wan sikifi masini. Baka di dë, Baaa Nowills bi ta kopi ën a wan pei kopi masini. Nöö wan sisa u di foto Santiago, di de bi ta kai ’di ëngëli’ u sëmbë an bi sa sabi hën në, bi ta buta dee buku a wan leigi fatu buketi dendu di bi ta tei söwan 20 liti fatu u boi soni. A bi ta buta wan koosu tapa dee buku, nöö a bi ta lai kasaba, bakaa batata nasö taja a de liba. Baka di dë, a bi ta tapa de ku wan alisi saku. Nöö a bi ta tei lanti wagi go a basusë u di köndë u tja wan Hei Wakitimawosu go disa da hiniwan kemeente. Hiniwan wosudendu bi nango ta leni di Hei Wakitimawosu dë u lei soni nëën, nöö de bi ta tjëën go baka te de bi kaba.”

Mary bi taki möön taa: „U bi musu ta köni gaanfa seei, u di dee siköutu bi ta waka ta lontu a hii dee sitaati ta suku naasë u bi ta doloki Di Hei Wakitimawosu. Ma nöiti de an bi sabi naasë, u di Jehovah bi ta tjubi u.”

„U musu ta luku bunu kuma sindeki, söseei u musu dë kuma pomba di an ta du hogi”

A bi dë fanöudu seei u dee dinima u Jehovah bi ta feni dee buku fuu, hii fa de bi ta libi a wan köndë ka lanti bi tapa di wooko fuu. A bi dë wan taanga ten da dee baaa ku dee sisa. A dee jaa dë, de bi ta kisi sömëni u dee baaa ku dee sisa fuu, ta manda nango a dunguwosu sömëni pasi.

Juanita Borges ta taki taa: „Di m’ ko sabi di tuutuu lei a di jaa 1953, mi bi sabi bumbuu taa de bi o sa kisi mi buta a dunguwosu, u di mi bi dë wan Jehovah Kotoigi. Nöö di soni dë hën ko pasa tu. A ëlufumu-liba u di jaa 1958, di mi bi dë a sisa Eneida Suárez pisi, hën dee siköutu ko a u ko piki u taa u ta hoi komakandi tjubitjubi. Hën de söötö u dii liba longi, söseei de mbei u paka 100 pesos, di bi dë kuma 100 Amëëkandala a di ten dë.”

Lanti bi mbei hii möiti u tapa dee Kotoigi u na hoi komakandi, ma dee baaa ku dee sisa fuu an bi mbei na wan u dee soni dë tapa de. Ma de bi musu„ ta luku bunu kuma sindeki”, söseei de bi musu „dë kuma pomba di an ta du hogi”(Mat. 10:16). Wan sisa de ta kai Andrea Almánzar bi taki taa: „Te u bi nango a komakandi, nöö wa bi nango a di wan seei juu. Nöö so juu u bi ta kumutu a komakandi a gaan ndeti, u di wa bi kë waka go a wosu a wan fasi di bi o mbei sëmbë sabi taa a komakandi u kumutu.”

De bi pai wan womi mii de kai Jeremías Glass a wan pisiten di hën tata León bi dë a dunguwosu. A di jaa 1957 a toon wan peleikima di a bi abi seibi jaa. A sabi jeti fa de bi ta hoi komakandi tjubitjubi a de pisi. Nöö de bi ta mbei hii möiti u sëmbë an bi sa sabi taa de bi ta hoi komakandi. Jeremías taki taa: „De bi ta da hii dee sëmbë dee bi ko a komakandi wan pisi kaaton ku wan nöbu sikifisikifi, u de bi sa sabi na un ten hiniwan u de bi musu kumutu dë. Te di komakandi bi kaba, nöö mi ppa bi ta mbei m’ go taanpu a di dööbuka u luku dee nöbu dee sikifi a dee kaaton pisi u dee sëmbë dee nango, sö taa te de bi nango, nöö mi bi musu ta piki de u de an waka a di wan seei pasi. Te tu sëmbë bi o waka go a wan së, nöö dee tu wotowan bi musu waka go a di woto së.”

Wan woto soni di u bi musu ta du, hën da u bi musu ta hoi komakandi a wan ten di sëmbë an bi o sa sabi taa komakandi u ta hoi. Wan mujëë di de ta kai Mercedes García bi ko sabi di tuutuu lei, u di hën tio Pablo González bi ta lei soni u Bëibel. Di a bi abi seibi jaa, hën di mama fëën ko lasi libi a di pisiten di hën tata bi dë a dunguwosu. Hën ku dee nëigi baaa ku sisa fëën bi ko fika de wanwan. Mercedes tei dopu a di jaa 1959, di a bi abi nëigi jaa. Dee baaa bi hoi di dopu taki a halufu fö ganian kanda u sëmbë an bi musu sabi. De bi hoi di taki a wan baaa pisi, hën a go tei dopu a wan lio de ta kai Ozama, di ta kule pasa a di mama foto u di köndë. Mercedes taki taa: „ A halufu sikisi mamate u bi dë a pasi nango a wosu kaa, nöö a di pisiten dë dee sëmbë u di pisiwata dë bi bigi ta weki.”