Mëni be ja du dee soni aki te i ta lei sëmbë soni u Bëibel

Na fan hia poi: Ja musu si kuma i musu u konda hii soni finifini da di sëmbë. Jesosi bi ta buta hakisi da sëmbë u heepi de u de pakisei fundu u soni, sö taa deseei bi sa feni di piki (Mt 17:24-27). Te i ta buta hakisi da di studie fii, nöö hënseei o ta fan tu, nöö joo ko sabi ee a ta fusutan di woto, söseei joo ko sabi andi a ta biibi (be-SR bld. 253 pal. 3, 4). Te i buta wan hakisi dëën, nöö hoi pasensi dëën faa piki. Ee di studie an piki di hakisi bunu, nöö na dëën di piki wantewante, ma buta woto hakisi dëën di o heepi ën fu hënseei feni di piki (be-SR bld. 238 pal. 1, 2). Na fan hesi poi sö taa an sa fusutan dee njunjun soni dee i ta lei ën.​—be-SR bld. 230 pal. 4.

Na mbei a taanga dëën u fusutan: Na konda hii dee soni dee i sabi u di woto da di sëmbë (Jo 16:12). Buta pakisei a di möön fanöudu pisi u di palaklafu (be-SR bld. 226, 227 pal. 4, 5). Ee i bi o konda hii soni u wan palaklafu finifini da di sëmbë, nöö di soni dë sa mbei taa an fusutan di möön fanöudu pisi u di woto möön (be-SR bld. 235 pal. 3). Solanga di studie fusutan di möön fanöudu pisi u di palaklafu, nöö go dou ku di woto palaklafu.

Na biinga u kaba di buku: Di sëmbë hati u kë dou, na di buku u kë kaba (Lu 24:32). Lesi dee möön fanöudu tëkisi u di woto, u di Wöutu u Gadu sa dou di sëmbë hati (2Ko 10:4; Heb 4:12; be-SR bld. 144 pal. 1-3). Konda nöngö woto dëën di an taanga u fusutan, faa fusutan di soni di i ta lei ën (be-SR bld. 245 pal. 2-4). Buta pakisei a dee soni dee ta taanga da di studie faa du, söseei buta pakisei a dee soni dee a ta biibi, nöö te joo lei ën soni, nöö heepi ën ku dee soni dë. I sa hakisi ën dee soni aki: „Unfa i ta si di soni di i ta lei aki?” „Andi di soni aki ta lei u u Jehovah?” „Un wini i si kuma joo feni te i ta wooko ku dee lai aki?”​—be-SR bld. 238 pal. 3-5; bld. 259 pal. 2.