U ta lei taa u abi lobi te u dë ku Jehovah a wan së te a sitaafu wan sëmbë a wan soni

De ta puu wan sëmbë a di kemeente u tjubi dee woto sëmbë u di kemeente, söseei u heepi ën faa tjali u di hogi di a du (1Ko 5:6, 11). Te u dë ku Jehovah a wan së te a sitaafu wan sëmbë, nöö u ta lei taa u abi lobi. Unfa di soni aki dë sö tuu ee a ta hati dee famii u wan sëmbë di de puu a di kemeente, söseei ee a ta hati dee baaa dee bi dë a di kuutu komte?

Wë a di fosu kamian, u ta lei taa u lobi di fasi fa Jehovah ta du soni, söseei u ta lei taa u lobi dee wëti fëën dee ta heepi u fuu dë limbolimbo nëën wojo (1Pe 1:14-16). Söseei u ta lei taa u lobi di sëmbë di de puu a di kemeente. Wë te Jehovah sitaafu wan sëmbë, nöö an ta dë wan piizii soni, ma bakaten a ta mbei di sëmbë ko ta „libi a wan leti fasi a Gadu wojo, ku wan bööböö hati” (Heb 12:5, 6, 11). U bi o lei taa u ta kuutu di fasi fa Jehovah ta sitaafu sëmbë, ee u bi o ta hulu wan sëmbë di de puu a di kemeente nasö di hai hënseei puu a di kemeente. Hoi a pakisei taa Jehovah ta da sëmbë di ’sitaafu di de musu kisi’ (Jel 30:11). Te u ta lei taa u dë ku Jehovah a wan së te a sitaafu wan sëmbë, söseei te u ta du dee soni go dou dee u guwenti du a di dini u Jehovah, nöö u ta lei taa u kë u di sëmbë toona ko baka a di Tata fuu di abi tjalihati u sëmbë.​—Jes 1:16-18; 55:7.

LUKU DI FËLÖN I MUSU TA HOI ISEEI A JEHOVAH KU HII I HATI, NÖÖ BAKA DI DË, PIKI DEE HAKISI AKI:

• 

  Unfa mama ku tata di ta dini Jehovah ta fii te wan mii u de go disa Jehovah?

• 

  Unfa dee sëmbë u di kemeente sa heepi dee famii u wan sëmbë di de puu a di kemeente?

• 

  Un woto a Bëibel ta lei u unfa di hoi di u musu hoi useei a Jehovah dë fanöudu möön di hoi di u ta hoi useei a wan famii fuu?

• 

  Unfa u ta lei taa di hoi di u ta hoi useei a Jehovah dë fanöudu möön di hoi di u ta hoi useei a wan famii fuu?