Unfa begi sa heepi i tjika?

Wan mujëë de kai Pamela bi abi wan taku siki, nöö a bi go suku heepi a data. Ma a bi begi Gadu tu faa dëën kaakiti faa hoi dou. Di begi di a bi begi bi heepi ën u?

Pamela taki taa: „Mi bi ta fëëë gaanfa seei di di data bi ta heepi mi ku di siki. Ma te mi bi ta begi Jehovah Gadu, nöö ma bi ta fëëë möön. A bi ta heepi mi u ma du soni fanjanfanjan. Mi ta fii pen jeti, ma te mi ta begi, nöö a ta heepi mi u mi sa ta si soni woto fasi. Te sëmbë hakisi mi ee unfa a nango ku mi, nöö mi ta piki de taa ’Ma ta fii sö bunu, ma mi dë waiwai!’”

Ma wa a’ fu wakiti fuu dë ku wan taku siki ufö u begi Gadu. Hii u tuu ta abi bookohedi a di libi, nöö a ta pasa taa u ta abi heepi fanöudu. Begi sa heepi u ö?

Di Bëibel ta taki taa: „Tuwë di fuka fii da Jehovah, nöö hënseei o heepi i. An o disa wan limbohati sëmbë du poipoi soni wan daka” (Psalöm 55:22). Di soni aki ta da u taanga seei! Wë nöö unfa begi sa heepi i tjika? Te i ta begi Gadu a di soifi fasi, nöö a o da i di soni di i abi fanöudu u heepi i ku dee bookohedi dee i abi.—Luku di pisi „Begi sa heepi i a dee lö fasi aki.”

Begi sa heepi i a dee lö fasi aki

Joo ta dë bööböö

„I musu ta tja hii dee fuka fii nango ta konda dëën, nöö a o da i kötöhati. Nöö di kötöhati di a o da i dë o bigi pasa hii sëmbë fusutan, nöö a hoi hii pakisei fii ku i hati tuu a Jesosi Keesitu liba (Filipi 4:6, 7). Te i ta piki Gadu un bookohedi i abi, nöö a o heepi i fu ja ta dë pantapanta, söseei a o heepi i fii sa ta du soni a wan köni fasi.

Joo ko abi di köni di Gadu ta da sëmbë

„Ee wan sëmbë i si taa ja a’ fusutan tjika a soni, nöö i musu begi Gadu faa da i fusutan e, nöö a o da i ën. An o tei i u hogi biga a lo’ u da sëmbë bumbuu soni (Jakobosi 1:5). A lo’ u pasa taa wa ta du soni a wan köni fasi te u dë ku wan fuka. Ma ee i begi Gadu faa da i köni, nöö a o mëni i wantu soni di sikifi a di Wöutu fëën, di Bëibel. Dee soni dë o sa heepi i.

Joo feni taanga ku kötöhati

„Mi sa du hii soni, u di di sëmbë di ta heepi mi ta da mi kaakiti” (Filipi 4:13, NW). U di Jehovah Gadu abi hii makiti, mbei a sa da i di kaakiti di i abi fanöudu u heepi i ku dee bookohedi dee i ta abi (Jesaaja 40:29). Di Bëibel ta piki u tu taa a Jehovah „hii kötöhati ta kumutu.” A sa da u kötöhati ’fa dee hia fuka ta miti u a di goonliba aki.’—2 Kolenti 1:3, 4.

I BI O KË FENI WINI U DI BEGI DI I TA BEGI Ö?

Jehovah an ta musu sëmbë u de begi ën. Ma a ta piki u a wan lobihati fasi fuu ta begi ën (Jelemia 29:11, 12). Ma unfa a dë ee a di ten di pasa i bi ta si kuma Gadu an bi ta piki dee begi fii? Wë na lasi hati. A ta pasa taa mama ku tata di lobi dee mii u de, ta heepi dee mii u de a di fasi di de feni taa möön bunu, söseei a di möön bunu ten. De an ta du soni kumafa dee mii bi o kë nömönömö, u di de ta möön sabi unfa de sa heepi de a di möön bunu fasi. U sa dë seiki u di soni aki: Mama ku tata di lobi dee mii u de, ta heepi de.

Jehovah Gadu da di möön bunu tata di dë, nöö a kë heepi i seei. Ee i öndösuku dee soni dee u luku aki finifini, nöö ee i mbei hii möiti u du dee soni dee i lei, nöö i sa dë seiki taa Gadu o ta piki dee begi fii a di möön bunu fasi!—Psalöm 34:15; Mateosi 7:7-11.