Andi i sa du fii sa libi a wan njunjun goonliba?

A di woto di pasa, u bi si taa Gadu o poi di hogi goonliba aki, söseei a o puu hii dee fuka dee dë nëën. U sa dë seiki taa di soni aki o pasa. Faandi mbei u taki sö? Wë u di di Wöutu u Gadu ta taki taa:

„Di goonliba aki o kaba.”—1 JOHANISI 2:17.

U sa dë seiki taa sëmbë o pasa di soni aki libilibi, u di di tëkisi ta taki go dou taa:

„Ma dee sëmbë dee ta piki Masa Gadu buka, de, de an o kaba möönsö, ma de o dë u teego.”

Di soni aki kë taki taa ee u kë fika a libi, nöö u musu du andi Gadu kë. Wë fuu sa ko sabi andi Gadu kë, nöö u musu ko sabi ën ufö.

„KO SABI” GADU FII SA FIKA A LIBI TE DI GOONLIBA O KABA

Dee peentje: 1. Wan sösutu dë sindosindo a goon. A wei, nöö soni ta möön ën. 2. A dë a böö juu, nöö a ta si fa wan mujëë di hën ku ën ta wooko a di wan kamian, ta wai fa a ta lesi wan buku. 3. Di mujëë ta lesi wan Bëibel tëkisi dëën, nöö a ta dëën wan jw.org kaita.

Jesosi bi taki taa: „Andi da di libi u teego? Hën da u de ko sabi i, di wan kodo tuutuu Gadu u mundu” (Johanisi 17:3). Ee u kë fika a libi te di goonliba aki o kaba, söseei ee u kë libi u teego, nöö u musu „ko sabi” Gadu. Di soni aki an kë taki nöö taa u musu ta biibi taa wan Gadu dë, nasö taa u musu sabi wantu soni fëën nöö a kaba. Ma u musu ko dë mati fëën. Wë ee i kë ko dë mati u wan sëmbë, nöö an dë u taki taa joo ta mbei ten fii sa ta dë makandi ku ën fii sa ko sabi ën möön bunu. Wë sö nöö a dë tu te u kë ko sabi Gadu. Boo luku wantu soni di u ta lei a di Bëibel di sa heepi u fuu ku Gadu sa dë mati.

Dee lei dee dë a di Bëibel

U ta ko sabi taa Gadu bi kë fuu ta libi a wan Paladëisi.

A bi mbei di fosu womi de kai Adam ku di fosu mujëë de kai Eva, hën a buta de a wan waiti djai de kai Eden. De an bi abi zöndu, nöö Gadu bi da de hii soni di de bi abi fanöudu u de bi sa abi wan piizii libi. De bi o sa libi u teego. Solanga de ku Gadu bi o ta dë mati go dou, nöö de an bi o dëdë nöiti. Ma de an bi hoi di wëti di Gadu bi da de u de hoi, hii fa di wëti dë an bi taanga u hoi.

U ta ko sabi faandi mbei u ta tja fuka a di ten aki.

U di di fosu womi Adam bi pasa Gadu buka, mbei a bi lasi di gaandi u libi u teego. Di soni dë bi mbei dee bakamii fëën seei bi lasi di gaandi dë tu. Di Bëibel ta piki u taa: „Wan womi tja zöndu ko a goonliba, nöö di zöndu tja dëdë ko. Hën mbei dëdë paaja da hii libisëmbë” (Loomë 5:12, NW). Leti kumafa de sa pai wan mii ku wan suwaki u di hën mama ku hën tata bi abi di lö suwaki dë, sö nöö dee bakamii u Adam ko abi di zöndu di a bi abi. Fëën mbei u ta ko gaandi ta dëdë.

U ta ko sabi andi Gadu du kaa u heepi u.

Di Bëibel ta taki taa: „Wë biga Masa Gadu lobi libisëmbë sö tee a da de di wan kodo Womi Mii fëën, sö taa di sëmbë di ta biibi a di mii fëën aki liba, an o sa lasi go kaba a sösö, ma a sa feni di libi u teego” (Johanisi 3:16). Gadu manda Jesosi ko a goonliba aki faa ko dëdë paka paima da u. Di soni di Gadu du aki, mbei wan womi u India de kai Prabhakar di abi 86 jaa, bi taki taa: „Di soni aki ta lei unfa Jehovaha lobi mi tjika. Di lobi di a lobi mi, mbei mi ta biibi taa mi sa feni di libi u teego.”

U ta ko sabi andi u sa du u lei taa u ta tei dee soni dee Gadu du da u u bigi.

Di Bëibel ta piki u taa u sa lei taa u ta tei dee soni dee Gadu du da u u bigi, te u ta „piki Masa Gadu buka ta libi kumafa a kë” (1 Johanisi 2:3). Jehovah ta lei u andi u sa du fuu sa abi wan piizii libi nöunöu kaa (Jesaaja 48:17, 18). Gadu an kë fuu ta tja fuka. A paamusi u taa ee u ta piki hën buka a soni, nöö woo abi wan piizii libi nöunöu kaa, söseei woo sa libi u teego.

LESI DI BËIBEL HINIWAN DAKA

Di sösutu dë a böö juu. A ta luku go a liba baka di a lesi soni a di Bëibel. — I sa fika a libi te di goonliba o kaba, te i ta begi Gadu faa heepi i, söseei te i ta du andi a ta piki i

Hiniwan daka u ta njan fuu sa dë a libi. Ma Jesosi bi taki taa: „Na soni u njan wanwan nöö ta hoi sëmbë a libi e, ma a hiniwan wöutu fu Gadu di a ta taki, nöö a de libi ta kumutu.”—Mateosi 4:4.

A di ten aki, dee soni dee Jehovah taki, dë u feni a di Bëibel. Te i ta lei soni a di buku aki, nöö joo ko sabi tuutuu andi Gadu bi du a di ten di pasa, andi a ta du nöunöu, söseei andi a o du a di ten di ko.

BEGI GADU FAA HEEPI I

Wë unfa a dë ee i kë ta piki Gadu buka, ma i ta feni taa a taanga da i fii disa soni di Gadu an lobi? Wë te a dë sö, nöö di mbei di joo mbei möiti fii ko sabi soni u Gadu, o heepi i.

Boo luku di woto u wan mujëë di woo kai Sakura. A bi ta libi fanafiti a di së u manu ku mujëë soni. Di di mujëë aki bigi lei soni u Bëibel, hën a bi lei taa Gadu ta piki u fuu „kule da fanafiti libi a di së u manu ku mujëë soni” (1 Kolenti 6:18, NW). Sakura bi begi Gadu faa heepi ën, hën a ko disa di libi di a bi ta libi di an bi bunu. Ma a musu ta mbei möiti faa duwengi hënseei jeti. A bi taki taa: „Te fanafiti soni ta ko a mi pakisei, nöö mi ta begi Jehovah piki ën hii soni, u di mi sabi taa ma sa heepi miseei. Begi heepi mi u mi ku Jehovah ko dë möön gaan mati.” Milionmilion sëmbë ta ko sabi soni u Gadu a di ten aki kuma Sakura. Gadu ta da dee sëmbë aki di kaakiti di de abi fanöudu u de sa tooka soni a de libi, di an ta kai ku ën.—Filipi 4:13.

Möön i ta ko sabi soni u Gadu, möön ’Gadu o ko sabi i’ kuma wan mati fëën (Galasia 4:9; Psalöm 25:14). Di soni aki o mbei joo sa ko dë wan sëmbë di o pasa go a di njunjun goonliba. Ma unfa di njunjun goonliba o dë? Di woto di ta ko o taki fëën.

a A sikifi a di Bëibel taa Jehovah da di në u Gadu.