ANDI SA HEEPI U FU WA TA BUUSE WOTOWAN MÖÖN?

4 | Gadu sa heepi u fu wa ko ta buuse wotowan möön

Di soni di di Bëibel ta lei u:

„Te di jeje ta tii wan sëmbë, nöö a o abi lobi, piizii, kötöhati, pasensi, tjalihati u sëmbë, bunuhati, biibi, saapifasi, söseei a o ta duwengi hënseei.”—GALASIA 5:22, 23.

Di soni di a kë taki:

Gadu nöö sa heepi sëmbë u de an ko ta buuse deseei möön. Di santa jeje fëën sa heepi u fuu ko abi fasi di kandë wa bi o sa ko abi nöiti. Fëën mbei a bi o möön bunu fuu buta futoou a Gadu faa heepi u. Te u du sö, nöö useei u ko si di soni di Paulosu bi si. A bi taki taa: „Mi sa du hii soni, u di di sëmbë di ta heepi mi ta da mi kaakiti” (Filipi 4:13). Useei o sa taki taa: „A Jehovah di heepi u mi ta kumutu.”—Psalöm 121:2.

Di soni di i sa du:

„Jehovah heepi mi u mi tooka ko dë wan sëmbë di ta libi fiifii ku wotowan.”—WALDO

Begi Jehovah hakisi ën faa da i di santa jeje fëën (Lukasi 11:13). Hakisi Jehovah faa heepi i fii ko abi bunu fasi. Öndösuku soni a di Bëibel di ta taki u fasi di sa heepi i fu ja ta buuse wotowan. Dee fasi aki sa dë lobi, kötöhati, pasensi, söseei di duwengi di wan sëmbë ta duwengi hënseei. Luku andi i sa du fii sa ko abi dee fasi aki sö, nöö nama ku sëmbë di ta mbei möiti u ko abi dee fasi aki sö tu. Dee lö sëmbë dë, sa ’heepi i fii ta libi bunu ta lobi wotowan.’—Hebelejën 10:24.

Tuutuu woto u wan sëmbë—WALDO

An ta buuse wotowan möön

Soni bi taanga da wan womi de kai Waldo, di a bi ta göö ta ko bigi. Libi fëën bi dë fanjanfanjan sö. A bi taki taa: „Mi bi lo’ u feti a sitaati ku sëmbë di bi ta sei drugs. Wan pasi, dee felantima fuu u wan woto kulupu, bi paka wan womi di bi ta kii sëmbë, faa ko kii mi. Ma mi bi fusi go, hii fa a bi da mi wan piki makei.”

Waldo mujëë bi bigi ta lei soni u Bëibel, ma Waldo an bi wai ku di soni dë seepiseepi. A bi taki taa: „Mi bi buuse dee Jehovah Kotoigi, nöö sömëni pasi mi bi ta kosi de. Ma hii juu de bi ta piki a wan lesipeki fasi.”

Baka wan pisiten, hën Waldo seei bigi u lei soni u Bëibel tu. Waldo bi taki taa: „A bi ta taanga da mi u mi du dee soni dee mi bi ta lei. Mi bi ta si kuma ma bi o sa tapa ku di feti di mi bi ta feti ku sëmbë, söseei ku di boonu di mi hati bi ta boonu hii juu.” Ma wan soni di a lei a Bëibel bi mbei a tooka pakisei.

Waldo bi taki taa: „Wan daka, hën Alejandro, di sëmbë di bi ta lei mi soni u Bëibel, bi piki mi u mi lesi Galasia 5:22, 23. . . . Alejandro bi lei mi taa ee mi kë ko abi dee fasi dë, nöö na ku miseei kaakiti mi sa ko abi de, ma di santa jeje u Gadu nöö bi sa heepi mi. Di soni di a taki dë bi mbei mi tooka di fasi fa mi bi ta pakisei!”

Waldo an ta buuse wotowan möön, u di a bi da Gadu pasi faa heepi ën. A bi taki taa: „Dee famii u mi, ku dee mati u mi an sa biibi taa mi tooka gaanfa sö. Jehovah heepi mi u mi tooka ko dë wan sëmbë di ta libi fiifii ku wotowan.”