I musu dë kabakaba ta wakiti di daka u Jehovah

1. Andi u musu du ee u kë pasa di daka u Jehovah libilibi?

TE DI Bëibel ta taki u di „daka u Jehovah”, nöö a ta taki u di ten ka Jehovah o kuutu dee felantima fëën, nöö a o puu dee sëmbë fëën a fuka. A di ten di pasa, Jehovah bi sitaafu so köndë (Jes. 13:1, 6; Eze. 13:5; Sef. 1:8). A di ten fuu aki, di „daka u Jehovah” o bigi te dee tiima o poi di Gaan Babilon kaba a sösö, nöö a o kaba te di feti u Amagedon bigi. Ee u kë pasa di „daka” dë libilibi, nöö u musu bigi seeka useei nöunöu kaa. Jesosi bi taki taa u musu ta ’hoi useei bunu fuu sa dë kabakaba’ da di „gaan fuka”. Di soni dë kë taki taa hii juu u musu dë kabakaba ta wakiti ën.​—Mat. 24:21; Luk. 12:40.

2. Faandi mbei u sa taki taa u sa feni wini u di buku 1 Tesalonika?

² A di fosu biifi di Gadu bi mbei apösutu Paulosu sikifi manda da dee Keesitu sëmbë a Tesalonika, Paulosu bi konda wantu woto u heepi dee Keesitu sëmbë u de dë kabakaba da di daka u Jehovah ka a o kuutu sëmbë. Paulosu bi sabi taa di daka u Jehovah an bi o ko a di pisiten dë (2 Tes. 2:1-3). Tökuseei a bi da dee baaa ku dee sisa fëën taanga u de si di daka dë kuma wan daka di dë leti a de dööbuka, nöö a bunu fu useei si ën sö tu. Woo luku andi Paulosu bi taki u di fasi fa di daka u Jehovah o ko, söseei woo luku andi a bi taki u dee sëmbë dee o pasa ën libilibi. Boiti di dë, woo luku andi u musu du fuu sa pasa di daka dë libilibi.

DI FASI FA DI DAKA U JEHOVAH O KO

3. Na un fasi di daka u Jehovah o ko leti kumafa fufuuma ta ko a ndeti? (Luku di peentje tu.)

³ „Leti kumafa fufuuma ta ko a ndeti” (1 Tes. 5:2). Paulosu bi taki u dii peipei fasi fa di daka u Jehovah o ko, nöö disi da di fosuwan. Fufuuma ta du soni hesihesi, söseei de lo’ u fufuu a ndeti, te sëmbë an ta dë ku de mëni. Di daka u Jehovah o ko vau sö. Sömëni sëmbë an o dë ku ën mëni. Kandë a o bigi da dee tuutuu Keesitu sëmbë seei tu, te de si taa di daka dou. Ma Gadu an o poi de kaba a sösö. Ma a o poi dee hogihati sëmbë kaba a sösö.

4. Unfa di daka u Jehovah dë kuma di pen di wan mujëë ta fii te di juu dou faa pai?

⁴ Kuma di pen di wan mujëë ta fii te di juu dou faa pai (1 Tes. 5:3). Wan mujëë di dë ku bëë an sa taki a fesi na un juu a o pai. Ma a sabi taa a o pai wan daka nöömö. Tefa a mëni, nöö bëë ta bigi njan mën, a ta fii pen, ma tökuseei an sa du soni u tapa di pen. Wë sö nöö soni dë da u. Wa sabi di daka ku di juu di di daka u Jehovah o bigi. Ma u sabi taa a o ko nöömö, söseei u sabi taa dee hogihati sëmbë an o fusutan seei taa Gadu dou a de kaa u kuutu de, nöö de an o sa kule dëën.

5. Faandi mbei u sa taki taa di gaan fuka dë kuma te kamian ta limbo?

⁵ Kuma te kamian ta limbo. Di Paulosu bi konda di u dii woto, hën a bi toona taki u fufuuma di ta fufuu soni a ndeti. Ma di pasi aki a ta tei di daka u Jehovah maaka ku di pisiten u di daka te kamian ta limbo (1 Tes. 5:4). So juu a ta pasa taa wan fufuuma di go fufuu soni a ndeti an buta pakisei a di juu. Kamian sa bigi limbo, nöö sëmbë ko kisi ën. Sö nöö di gaan fuka o tja ko a limbo ambë dë kuma fufuuma, nasö ambë dë a dungu ta du soni di an ta kai ku Gadu. Ma uu wa dë kuma dee lö sëmbë dë. U ta dë kabakaba ta wakiti di daka u Jehovah. U ta köni ku soni di Jehovah an lobi, u ta mbei möiti u ’libi bunu ku sëmbë, söseei u ta libi letileti söndö ganjan’ (Ef. 5:8-12). Paulosu bi taki tu soni jeti di nama ku sëmbë di an o pasa di daka u Jehovah libilibi.

AMBË AN O PASA DI DAKA U JEHOVAH LIBILIBI?

6. Na un fasi gaansë sëmbë ta duumi? (1 Tesalonika 5:6, 7)

⁶ Dee sëmbë dee ta „duumi.” (Lesi 1 Tesalonika 5:6, 7.) Paulosu ta tei dee sëmbë dee an o pasa di daka u Jehovah, maaka ku sëmbë di ta duumi. Sëmbë di ta duumi an ta sabi andi ta pasa, söseei de an ta buta pakisei a di juu. Di soni dë mbei de an ta sabi te wan gaan soni pasa, söseei de an sa du na wan soni u tjubi deseei. Gaansë u sëmbë a di ten aki, dë kuma sëmbë di ta duumi (Lom. 11:8). De an ta biibi taa u ta libi a „dee lasiti daka”, söseei de an ta biibi taa di gaan fuka o dou abiti möön. Te wan gaan soni pasa a goonliba, nöö so sëmbë ta kë haika di bosikopu fuu. Ma tökuseei sömëni u de ta toona duumi go baka. De an ta dë ku wojo go dou. So sëmbë di ta biibi taa Gadu o kuutu libisëmbë seei, ta si kuma di daka u Jehovah an o ko jeti (2 Pet. 3:3, 4). A dë fanöudu seei fuu ta dë ku wojo hiniwan daka.

7. Faandi mbei u sa taki taa dee sëmbë dee Gadu o poi kaba a sösö, dë kuma sëmbë di dööngö?

⁷ Dee sëmbë dee ta „dööngö.” Apösutu Paulosu bi tei dee sëmbë dee Gadu o poi kaba a sösö, maaka ku sëmbë dee ta dööngö. Te sëmbë dööngö, nöö de an sa du soni hesihesi, söseei de an ta du soni ku limbolimbo fusutan. Sö nöö a dë ku dee hogihati sëmbë. De an ta haika Gadu. De ta libi a wan fasi di sa mbei Gadu poi de kaba a sösö. Ma Gadu ta piki Keesitu sëmbë u de ta „dë seei ku wojo setiseti” (1 Tes. 5:6). Wan sëmbë di ta öndösuku soni u Bëibel, bi taki taa di dë di wan sëmbë dë setiseti, kë taki taa „a dë piii, an ta buuja, a sa’ u wegi soni luku, nöö a ta du soni a wan köni fasi.” Faandi mbei a dë fanöudu fuu dë piii, söseei fu wa buuja? Wë a dë fanöudu sö taa wa go nama ku politiki soni. Möön di daka u Jehovah ta zuntu, möön sëmbë o kë duwengi u fuu tei së a politiki soni u köndë. Ma wa musu fëëë taa wa o sabi andi u musu piki de te de ko a u. Di jeje u Gadu sa heepi u fu wa fëëë, söseei fuu wegi soni luku bunu ufö u du wan soni.​—Luk. 12:11, 12.

UNFA U SA SEEKA USEEI DA DI DAKA U JEHOVAH?

8. Unfa 1 Tesalonika 5:8 ta heepi u fuu si dee soni dee o heepi u fuu sa ta dë ku wojo, söseei fuu sa ta dë ku limbolimbo fusutan? (Luku di peentje tu)

⁸ Bisi di felu soni u tapa sinkii, söseei bisi di felu kaapusa. Paulosu ta tei u maaka ku sodati dee dë kabakaba u feti. (Lesi 1 Tesalonika 5:8.) Wan sodati musu dë kabakaba u feti, te wan gaan feti dë. Sö nöö u musu ta dë tu. U sa ta dë seekaseeka da di daka u Jehovah te u ta lei taa u abi biibi, te u abi lobi, söseei te u ta biibi taa soni o waka möön bunu da u a di ten di ta ko. Dee soni aki sa heepi u gaanfa seei.

9. Unfa di biibi fuu sa tjubi u?

⁹ Di felu soni di wan sodati bi ta bisi, bi ta tjubi hën hati. Biibi ku lobi ta tjubi di hati fuu. Dee tu soni aki o heepi u fuu dini Gadu go dou, söseei de o heepi u fuu waka a Jesosi baka nöömö. Di biibi di u ta biibi ta mbei u dë seiki taa Jehovah o mbei u feni gaan bunu, u di u ta suku ën ku hii u hati (Heb. 11:6). A o heepi u tu fuu hoi useei a Jesosi, aluwasi soni ta taanga da u. U sa mbei di biibi fuu ko möön taanga, sö taa u sa hoi dou te soni ta taanga da u. U sa mbei di biibi fuu ko möön taanga te u ta buta pakisei a woto u sëmbë u di ten aki di bi hoi deseei a Gadu, hii fa sëmbë bi ta du ku de, nasö hii fa soni bi taanga da de a möni së. Boiti di dë, u sa köni fu wa ko ta lobi möni ku gudu. U sa mbei möiti u djeesi sëmbë di buta taa de an o suku u ko gudu, u di de ta buta soni u di Könuköndë a di fosu kamian.b

10. Unfa di lobi di u abi da Gadu, ku di lobi di u abi da woto sëmbë sa heepi u fuu hoi dou?

¹⁰ Lobi dë fanöudu tu fuu sa ta dë ku wojo, söseei fuu sa dë ku limbolimbo fusutan (Mat. 22:37-39). U di u lobi Gadu, mbei u ta du di peleikiwooko go dou, aluwasi ee a sa tja fuka ko da u (2 Tim. 1:7, 8). Söseei u di u lobi dee sëmbë dee an ta dini Jehovah, mbei u ta peleiki go dou, aluwasi ee u musu peleiki ku tëlëfön nasö ee u musu sikifi biifi u peleiki da de. U ta biibi taa a wan ten dee sëmbë dee u ta peleiki da o bia libi, nöö de o bigi du soni di bunu.​—Eze. 18:27, 28.

11. Unfa di lobi di u lobi dee baaa ku dee sisa fuu sa heepi u? (1 Tesalonika 5:11)

¹¹ U lobi dee baaa ku dee sisa fuu tu. U ta lei taa u lobi de te u ta ’da useei degihati ta heepi u na u fuu nango fesi nöömö’. (Lesi 1 Tesalonika 5:11.) Leti kumafa sodati ta waka bandja ku bandja ta da de na de taanga te de dë a feti, sö nöö u ta da u na u taanga. A sa pasa taa wan sodati da wan wotowan fëën makei te de dë a di feti, ma an dë u taki taa na ku ënseei kë a du ën. Sö nöö a dë ku u tu. Nöiti woo du wan soni ku useei kë u hati wan baaa nasö wan sisa fuu. Söseei nöiti woo toona du wan soni ku ën baka, u di a bi du wan soni ku u (1 Tes. 5:13, 15). U sa lei taa u abi lobi te u ta lesipeki dee baaa dee ta tei fesi a di kemeente (1 Tes. 5:12). Di Paulosu bi sikifi di biifi aki, di kemeente a Tesalonika an bi seti dou jaa jeti. A sa dë sö taa dee womi dee bi ta tei fesi an bi abi öndöfeni a di wooko, söseei a kan taa de bi ta mbei föutu. Ma tökuseei dee baaa ku dee sisa bi musu lesipeki de. Fa di gaan fuka dë zuntu aki, nöö a kan taa a o möön dë fanöudu fuu suku heepi a dee gaanwomi u di kemeente ka u dë. A sa pasa taa wa sa jei soni u dee baaa fuu dee dë a di hedi kantoo fuu, nasö dee baaa u di bëikantoo fuu. Fëën mbei a dë fanöudu fuu lei taa u lobi dee gaanwomi fuu, söseei taa u ta lesipeki de. Aluwasi andi ta pasa, boo dë ku limbolimbo fusutan go dou. Wa musu buta pakisei a dee föutu di dee baaa ta mbei, ma boo hoi a pakisei taa Jehovah buta Jesosi u tii dee gaanwomi aki.

12. Unfa di biibi di u ta biibi taa Gadu o puu u a fuka a di ten di ta ko, ta heepi u?

¹² Leti kumafa wan felu kaapusa bi ta tjubi di hedi u wan sodati, sö nöö di biibi di u ta biibi taa Gadu o puu u a fuka a di ten di ta ko, ta heepi u fuu si soni a di soifi fasi. U di u ta biibi di soni dë, mbei u ta fusutan taa dee soni u di goonliba aki da sösö soni (Fil. 3:8). Di biibi fuu ta heepi u fu wa fëëë, söseei a ta heepi u fuu taanpu gingin. U sa si di soni aki a di woto u Baaa Wallace ku Sisa Laurinda di ta du di diniwooko na Afiikan. Laurinda mama lasi libi, söseei Wallace tata lasi libi. Dee soni aki pasa a dii wiki dendu. Ma u di di kolona siki bi ta paaja a hii së u goonliba, mbei de an bi sa go a de köndë u de go dë makandi ku de famii. Wallace bi taki taa: „Di biibi di mi ta biibi taa sëmbë o weki ko a libi baka, ta heepi mi u ma pakisei unfa soni bi dë da de kölö sö ufö de dëdë, ma a ta heepi mi u mi pakisei unfa soni o dë da de, te de o weki ko a libi baka a di njunjun goonliba. Di pakisei di mi ta pakisei di soni aki, ta heepi mi te mi ta tjali.”

13. Andi u musu du fuu sa ta feni di santa jeje?

¹³ „Te di jeje u Gadu ta wooko nöö wan musu tapëën” (1 Tes. 5:19). Paulosu bi taki taa di santa jeje dë kuma wan faja di dë a u dendu. Te Gadu da u di jeje fëën, nöö u ta dë kabakaba u du soni di bunu, söseei u ta feni kaakiti u du wooko da Jehovah (Lom. 12:11). Andi u musu du fuu sa feni di santa jeje? Wë u musu begi Gadu fëën, u musu lei soni a di Wöutu u Gadu, söseei u musu nama ku di ölganisaasi u Gadu di a ta tii ku di jeje fëën. Te u ta du dee soni aki, nöö a o heepi u fuu ko abi dee fasi di di jeje u Gadu ta mbei sëmbë ko abi.​—Gal. 5:22, 23.

14. Ku un soni u musu ta köni ee u kë feni di jeje u Gadu go dou? (Luku di peentje tu)

¹⁴ Te Gadu da u di santa jeje fëën, nöö u musu köni taa wa tapa di santa jeje faa du di wooko fëën. Dee sëmbë dee ta mbei möiti u pakisei soni di fiti, söseei dee ta libi a wan limbo fasi a Gadu wojo, de Gadu ta da di jeje fëën. An o da u di jeje fëën go dou ee u ta pakisei soni di an fiti, söseei ee u ta du soni di an bunu (1 Tes. 4:7, 8). Ee u kë taa Gadu da u di jeje fëën go dou, nöö wa musu „sösö” dee tjabukama woto u Gadu (1 Tes. 5:20). Dee „Tjabukama woto” di de kai a di tëkisi aki, da dee bosikopu dee Jehovah ta manda da u ku di santa jeje fëën. So u dee bosikopu aki nama ku di daka u Jehovah, söseei so u de ta taki u dee lasiti daka ka u dë aki. Wa ta pakisei taa di daka u Jehovah an o ko a di ten fuu aki. Ma u ta du soni u lei taa u dë ku di mëni taa a o ko abiti möön. Hiniwan daka u ta mbei möiti „fuu libi limbolimbo da Gadu”.​—2 Pet. 3:11, 12.

U „MUSU TA WEGI HII SONI LUKU”

15. Andi u musu du sö taa de an feni u ganjan ku mindimindi woto ku woto di dee taku jeje o paaja? (1 Tesalonika 5:21)

¹⁵ Abiti möön dee felantima u Gadu o taki taa: „Aai, hii soni dë bunu kaa. An dë fuu fëëë möön” (1 Tes. 5:3). Dee taku jeje o mbei sëmbë taki soni u ganjan sömëni sëmbë (Ako. 16:13, 14). Ma unfa uu woo du? Sëmbë an o feni u ganjan ee u ta „wegi hii soni luku”. (Lesi 1 Tesalonika 5:21.) De bi ta wooko ku di Giiki wöutu di de puu ko „wegi hii soni luku”, te de bi ta luku ee wan soni mbei ku tuutuu goutu nasö tuutuu soofu. Sö nöö u musu ta wegi dee soni dee u ta lesi, nasö dee u ta jei, luku ee de dë tuutuu soni. Dee baaa ku dee sisa u Tesalonika bi musu du di soni dë, nöö useei musu ta du ën tu, möönmöön fa di gaan fuka o bigi abiti möön. Wa musu biibi hii soni di u ta jei. Ma u musu wooko ku di fusutan fuu fuu tei dee soni dee u ta lesi nasö dee u ta jei, maaka ku dee soni di di Bëibel ta taki, nasö di di ölganisaasi u Jehovah ta taki. Te u ta du di soni aki, nöö de an o sa ganjan u ku dee mindimindi woto di dee taku jeje o ta paaja.​—Nöng. 14:15; 1 Tim. 4:1.

16. Fuun soni u dë seiki, nöö andi u dë kabakaba u du?

¹⁶ Dee sëmbë u Jehovah o pasa di gaan fuka libilibi. Ma na wan fuu sabi unfa soni o waka da hiniwan fuu apaiti a di ten di ta ko (Jak. 4:14). Aluwasi ee woo pasa di gaan fuka libilibi, nasö aluwasi ee u ko lasi libi ufö di gaan fuka dou, tökuseei Jehovah o mbei u libi u teego ee u hoi useei nëën go dou. Dee salufuwan o dë makandi ku Keesitu a liba ala. Dee woto sikapu o dë a goonliba aki. Be hii u tuu ta buta pakisei a dee gaan bunu dee Jehovah paamusi u, söseei boo ta dë kabakaba ta wakiti di daka u Jehovah!