Mbei möiti fii ko möön lobi Jehovah ku woto sëmbë

1. Andi i bi lei di i bigi lei soni u Bëibel?

I SA mëni jeti unfa soni bi dë da i di i bi bigi lei soni u Bëibel ö? Kandë a bi bigi da i di i bi jei taa Gadu abi wan në. Kandë i bi fii bunu di i bi ko fusutan taa Gadu an ta tjuma sëmbë a faja. Nasö kandë i bi wai seei di i jei taa i sa toona si dee sëmbë fii dee lasi libi, söseei taa i ku de o sa libi a wan paladëisi a goonliba aki.

2. Andi i bi du jeti, boiti di lei di i bi ta lei soni u Bëibel? (Efeise 5:1, 2)

² Möön i bi ta lei soni a di Wöutu u Gadu, möön i bi ta ko lobi Jehovah. Di lobi di i bi ko lobi Jehovah, bi mbei taa i bi kë libi ku dee soni dee i bi ta lei. I bi bigi ta du soni a wan fasi di ta kai ku dee mama wëti u Bëibel. I bi bigi ta tja iseei a wan möön bunu fasi, u di i bi kë taa di libi fii musu kai ku Gadu. Leti kumafa wan mii ta djeesi hën mama nasö hën tata a soni, sö nöö i bi ta djeesi di Tata fii di dë a libi ala.​—Lesi Efeise 5:1, 2.

3. Andi u sa hakisi useei?

³ U sa hakisi useei taa: ’Mi ko ta möön lobi Jehovah, möön fa mi bi lobi ën di mi bi ko dë wan Keesitu sëmbë u? Mi ko ta möön djeesi Jehovah a di fasi fa a ta si soni, söseei a di fasi fa a ta du soni sensi di mi dopu ö? Mi ta du ën möönmöön te a nama ku di lei di mi musu lei taa mi lobi dee baaa ku dee sisa u mi ö?’ Ee di lobi di i bi abi a fesi ko kötö, tökuseei ja musu lasi hati. Biga sö wan soni bi pasa ku dee fesiten Keesitu sëmbë tu. Ma Jesosi an bi bia baka da de, nöö an o bia baka da u tu (Ako. 2:4, 7). A sabi taa u sa ko abi di lobi di u bi abi a fesi baka.

4. Fuun soni woo taki a di woto aki?

⁴ A di woto aki, woo luku unfa u sa ko möön lobi Jehovah ku woto sëmbë. Baka di dë, woo taki u so u dee wini dee u ta feni te u ko möön lobi Jehovah ku dee baaa ku dee sisa fuu.

MBEI MÖITI FII KO TA MÖÖN LOBI JEHOVAH

5-6. Andi ku andi bi ta miti apösutu Paulosu di a bi ta du di diniwooko fëën, ma andi bi heepi ën faa dini Jehovah go dou?

⁵ Apösutu Paulosu bi lobi di dini di a bi ta dini Jehovah, ma na hii juu soni bi ta dë kösökösö dëën. Paulosu bi nango a wan lö longi kamian, nöö a di ten dë, an bi dë wan kösökösö soni u go a dee longi kamian dë. So juu, te Paulosu bi nango a dee longi kamian, nöö ’gaan wata bi ta dë fa u tjëën go kii’, söseei a ’bi musu ta waka ka fufuuma bi ta watji sëmbë u de kisi’. Nöö so juu dee felantima fëën bi ta fon mën tu (2 Kol. 11:23-27). Boiti di dë, na hii juu dee baaa ku dee sisa bi ta lei taa de ta tei dee soni di a bi ta du da de u bigi.​—2 Kol. 10:10; Fil. 4:15.

⁶ Andi bi heepi Paulosu faa dini Jehovah go dou? Paulosu bi ko sabi unfa Jehovah dë, u di a bi ta lesi di Wöutu u Gadu, söseei u di a bi ta si unfa soni bi ta waka dëën. Paulosu bi dë seiki taa Jehovah bi lobi ën (Lom. 8:38, 39; Ef. 2:4, 5). A bi ko lobi Jehovah gaanfa seei. A bi lei taa a lobi Jehovah u di a bi ta ’heepi dee Santawan’.​—Heb. 6:10.

7. Andi da wan fasi fa u sa ko ta lobi Jehovah möön gaanfa?

⁷ U sa ko möön lobi Jehovah te u ta öndösuku soni a di Wöutu fëën. Te i ta lesi di Bëibel, nöö i musu mbei möiti fii si andi hiniwan pisi di i lesi ta lei i u Jehovah. Hakisi iseei dee soni aki: ’Unfa di pisi di mi ta lesi aki, ta lei mi taa Jehovah lobi mi? Andi mi si a di pisi di mi lesi aki di sa heepi mi u mi lobi Jehovah?’

8. Unfa begi sa heepi u fuu ko ta lobi Gadu möön gaanfa?

⁸ Wan woto fasi fa u sa ko ta lobi Jehovah möön gaanfa, da te u ta begi ën hiniwan daka, söseei te u ta konda hii soni di dë a u hati dëën (Ps. 25:4, 5). Jehovah o piki dee begi fuu (1 Joh. 3:21, 22). Wan sisa de kai Khanh, di ta libi a Asia bi taki taa: „Bigibigi mi bi lobi Jehovah u di mi bi ko sabi soni fëën. Ma di mi bi si unfa a bi ta piki dee begi u mi, hën mi bi ko ta lobi ën möön gaanfa. Di soni dë bi da mi taanga u mi ta du soni di ta kai ku ën.”b

MBEI MÖITI FII KO TA MÖÖN LOBI WOTO SËMBË

9. Unfa Timoteo bi mbei möiti tjika faa ko ta möön lobi dee baaa ku dee sisa fëën?

⁹ Wantu jaa baka di Paulosu bi ko dë wan Keesitu sëmbë, hën a bi miti wan njönku kijoo de bi ta kai Timoteo. Timoteo bi lobi Jehovah, söseei a bi lobi woto sëmbë. Paulosu bi piki dee Keesitu sëmbë u Filipi taa: „Ma abi sëmbë aki kuma [Timoteo] möönsö di ta mëni unu ku hii ën hati. Fa a sai dë, hiniwan juu a ta kë jei fa fuunu” (Fil. 2:20). A di tëkisi aki, Paulosu an bi taki ee Timoteo sa’ u seti soni a wan bunu fasi, nasö ee a sa’ u hoi taki. Ma a bi taki unfa Timoteo bi lobi dee baaa ku dee sisa fëën tjika, u di a bi dë u si taa a lobi de tuutuu. U sa dë seiki taa dee baaa ku dee sisa bi ta wai seei te Timoteo bi nango luku de a di kemeente.​—1 Kol. 4:17.

10. Unfa Anna ku hën manu bi lei taa de lobi dee baaa ku dee sisa u de tuutuu?

¹⁰ Useei ta suku peipei fasi u heepi dee baaa ku dee sisa fuu (Heb. 13:16). Boo buta pakisei a di woto u Anna, di u bi taki soni fëën a di woto di pasa. Baka di wan gaan ventu bi böö a di pisiwata ka de ta libi, hën hën ku hën manu bi go luku wantu sëmbë u wan wosudendu. Di de bi go dou ala, hën de si taa gaan ventu bi booko di daki u di wosu kaba a sösö. Di soni dë bi mbei taa dee sëmbë u di wosu an bi abi limbolimbo lai u bisi. Anna bi taki taa: „U bi tei dee koosu lai u de tja go wasi. U bi tiiki so u de, hën u doba dee wotowan, hën u toona tja de go da de baka. Wa bi feni taa u bi du wan apaiti soni, ma di soni dë bi mbei taa u ku de ko dë gaan mati seei.” U di Anna ku hën manu bi lobi dee baaa ku dee sisa u de, mbei de bi heepi de a soni.​—1 Joh. 3:17, 18.

11. (a) Unfa sëmbë ta fii te u ta lei de taa u lobi de? (b) Andi Jehovah ta du te u ta lei taa u lobi wotowan, te u luku Nöngö 19:17?

¹¹ Te u ta lei taa u lobi wotowan, söseei te u ta libi bunu ku de, nöö a lo’ u pasa taa de ta si di möiti di u ta mbei u ta si soni kumafa Jehovah ta si soni, söseei u du soni kumafa a ta du soni. A sa pasa taa de tei di soni di u du da de u bigi. Kandë möön fa u bi mëni seei. Khanh di u bi taki soni fëën kaa, ta mëni jeti unfa wotowan bi heepi ën. A bi taki taa: „Mi ta tei ën u bigi seei taa dee sisa bi kai mi u mi wooko makandi ku de a di peleikiwooko. De bi ta ko tei mi a mi pisi, de bi ta tja mi go njan a kamian, söseei de bi ta tja mi go a wosu baka. Nöunöu mi ta si taa an bi dë wan kösökösö soni da de u de du dee soni dë. Ma de du ën ku lobi.” An dë u taki taa na hii sëmbë o da u tangi da dee soni dee u du da de. Khanh bi taki wan soni u dee sëmbë dee bi heepi ën. A bi taki taa: „Mi kë toona du bunu da dee sëmbë dee bi heepi mi, ma ma sabi naasë hii de tuu ta dë. Ma Jehovah sabi naasë de dë, nöö a o heepi mi paka de.” Di soni di Khanh bi taki aki dë sö tuutuu. Jehovah ta si hii dee pikipiki soni dee u ta du da wotowan. A ta tei di soni dë u bigi seei, söseei a o toona paka u da dee soni dee u bi du.​—Lesi Nöngö 19:17.

12. Unfa dee baaa sa lei taa de lobi dee sëmbë u di kemeente? (Luku dee peentje tu.)

¹² Ee i da wan baaa, nöö unfa i sa lei wotowan taa i lobi de, nöö i heepi de a soni? Wan njönku baaa de kai Jordan bi hakisi wan gaanwomi andi a musu du faa sa möön heepi wotowan a di kemeente. Wë di gaanwomi bi gafëën fosu, u di a bi go a fesi a di biibi. Hën baka di dë, hën a lei ën unfa a sa du möön soni a di kemeente. A bi piki Jordan taa a bi o bunu ee a ta mbei möiti faa ta dou fuuku a di Könuköndë zali, sö taa a sa ta da dee baaa ku dee sisa odi. Boiti di dë, a bi piki ën faa ta da piki a dee komakandi, faa ta peleiki hii juu ku di peleikiwooko kulupu fëën, söseei faa ta suku fasi u heepi sëmbë a soni. Di Jordan bi du dee soni di di gaanwomi bi piki ën, hën a bi ko sa’ u du so soni möön bunu, ma a bi ko möön lobi dee baaa ku dee sisa fëën tu. Jordan bi ko fusutan taa te wan baaa toon wan dinai, nöö na bigi a ta bigi heepi wotowan, ma heepi a ta heepi de go dou.​—1 Tim. 3:8-10, 13.

13. Unfa lobi bi heepi wan baaa de kai Christian faa toon gaanwomi baka?

¹³ Unfa a dë ee ja dë wan dinai nasö wan gaanwomi möön? Wë Jehovah an ta fëëkëtë dee soni dee i bi du a di ten di pasa, söseei an ta fëëkëtë taa lobi hën bi mbei i bi du de (1 Kol. 15:58). A ta si di lobi di i ta lei taa i abi nöunöu. Wan baaa de kai Christian bi lasi hati di an bi dë gaanwomi möön. Ma tökuseei a bi taki taa: „Mi bi buta taa mi o du hii soni di mi sa du u dini Jehovah, aluwasi ee mi dë gaanwomi nasö ee ma dë gaanwomi möön.” Te u kaba fëën, a bi ko dë wan gaanwomi baka. Christian bi taki tu taa: „Mi bi ta fëëë piki sö di de buta mi ko gaanwomi baka. Ma mi bi taki taa ee u di Jehovah abi tjalihati u mi, mbei a kë u mi dë gaanwomi baka, nöö mi o du di wooko dë, u di mi lobi ën, söseei u di mi lobi dee baaa ku dee sisa u mi.”

14. Andi i ta lei u dee soni di wan sisa u di köndë Georgia bi taki?

¹⁴ Dee dinima u Jehovah ta lei tu taa de lobi sëmbë di an ta dini Jehovah (Mat. 22:37-39). Wan sisa de kai Elena, di ta libi a di köndë de kai Georgia bi taki taa: „Di soni di bi heepi mi u mi bigi du di peleikiwooko, da di lobi di mi bi lobi Jehovah. Ma möön mi bi ta ko lobi di Tata u mi di dë a liba ala, möön mi bi ta ko lobi woto sëmbë tu. Mi bi bigi ta pakisei unfa soni bi sa ta taanga da de tjika, söseei mi bi ta pakisei luku un woto de o lobi. Möön mi bi ta pakisei de, möön mi bi ta kë heepi de.”​—Lom. 10:13-15.

DEE BUNU DEE WOO FENI TE U TA LEI WOTOWAN TAA U LOBI DE

15-16. Un bunu u sa feni te u ta lei wotowan taa u lobi de, te u luku dee peentje?

¹⁵ Na dee baaa ku dee sisa fuu wanwan nöö ta feni wini te u ta lei taa u lobi de. Di di kolona siki bi bigi ta paaja a hii së u goonliba, hën wan baaa de kai Paolo, ku hën mujëë, bi heepi sömëni sisa di ko gaandi kaa, u de ko sa’ u peleiki da sëmbë ku tëlëfön nasö ku tablet. Hii fa bigibigi a bi ta taanga da wan u dee sisa, tökuseei a bi ko sa’ u wooko ku di tëlëfön fëën. A bi wooko ku di tëlëfön fëën u kai wantu famii fëën u de ko mëni di dëdë u Jesosi. Sikisiteni sëmbë fëën bi ko a di komakandi a Internet! Di sisa aki ku dee sëmbë fëën tuu bi feni wini u di heepi di Paolo ku hën mujëë bi heepi ën. Bakaten di sisa bi sikifi wan biifi manda da Paolo. A bi sikifi taa: „Gaantangi fii u di i heepi u dee sëmbë dee ko gaandi kaa. Nöiti mi o fëëkëtë fa Jehovah ta lei taa a lobi u tjika, söseei nöiti mi o fëëkëtë di taanga möiti di i mbei u heepi u.”

¹⁶ Paolo lei wan fanöudu soni a di woto aki. A bi lei ën taa a möön bunu fii lei taa i abi lobi, möön leki fii lei sëmbë unfa i köni tjika, nasö unfa i sa’ u du soni tjika. A bi taki taa: „Mi bi ta du di keling-wooko. Ma mi ko fusutan taa aluwasi ee dee baaa ku dee sisa fëëkëtë dee taki dee mi bi hoi, de an o fëëkëtë dee soni dee mi bi du u heepi de.”

17. Ambë seei o feni wini tu te u ta lei wotowan taa u lobi de?

¹⁷ Useei ta feni wini te u ta lei taa u lobi wotowan. Wan baaa de kai Jonathan, di ta libi a di köndë de kai Njunjun Zeeland, bi ko si taa sö di soni aki dë tuu. A wan sata bakajuu, hën a bi si wan baaa di ta du di pioniliwooko, ta peleiki hën wanwan. Jonathan bi buta taa a bi o ta peleiki makandi ku di baaa a sata. An bi sabi seei taa hënseei bi o feni wini u di soni dë. Jonathan bi taki taa: „A di pisiten dë, ma bi kaba lobi di peleikiwooko. Ma di mi bi si fa di baaa bi ta lei sëmbë soni u Bëibel, söseei di mi bi si fa soni bi ta waka bunu dëën a di peleikiwooko, hën mi bi ko lobi di peleikiwooko. Boiti di dë, mi ku di baaa bi ko dë gaan mati, nöö a bi heepi mi u mi go a fesi a di biibi, u mi ta du di peleikiwooko ku piizii, söseei u mi ku Jehovah ko dë möön gaan mati.”

18. Andi Jehovah kë fuu du?

¹⁸ Jehovah kë taa hii u tuu musu ko möön lobi ën, söseei a kë taa u musu ko möön lobi wotowan tu. U bi si a di woto aki taa u sa ko möön lobi Jehovah te u ta lesi di Wöutu fëën, te u ta kai pakisei a dee soni dee u ta lesi, söseei te u ta begi ën. U sa ko ta möön lobi dee baaa ku dee sisa fuu te u ta heepi de a soni. Möön u ko abi lobi, möön u ku Jehovah ku dee baaa ku dee sisa fuu o ko dë gaan mati. Nöö woo ta piizii ku dee mati aki u teego!