WOTO 32
Djeesi Jehovah a di suku di an ta suku fini a soni poi
„Be hii sëmbë ko si taa un ta mbei möiti fu wan ta suku fini a soni poi.”—FIL. 4:5.
KANDA 89 Haika Gadu be i feni bunu
WANTU SONI U DI WOTOa
Un pei pau i bi o kë dë? (Luku palaklafu 1)
1. Na un futu Keesitu sëmbë musu dë kuma wan pau? (Luku di peentje tu.)
WAN nöngö ta taki taa „ventu an ta booko wan pau di ta bendi”. Di nöngö aki ta lei taa ee wan pau ta bendi te di ventu ta böö, nöö a o taanga faa booko kai. Ee u kë dini Jehovah waiwai go dou, nöö useei musu ta bia du soni woto fasi. Unfa u sa du di soni dë? U musu dë kabakaba u tooka di fasi fa u ta du soni te soni tooka a di libi fuu, söseei u musu dë kabakaba u lesipeki di fasi fa wotowan ta si soni, nasö di fasi fa de ta du soni.
2. Un fasi o heepi u fuu bia du soni woto fasi te soni tooka a di libi fuu, nöö andi woo luku a di woto aki?
2 U dee dinima u Jehovah musu ta mbei möiti fu wa ta suku fini a soni poi. Boiti di dë, u musu abi sakafasi, söseei u musu ta fii da sëmbë. A di woto aki, woo si fa dee fasi aki bi heepi so Keesitu sëmbë di soni bi ko tooka a di libi u de. Woo si fa dee fasi aki sa heepi u tu. Ma boo luku fosu andi u sa lei a Jehovah ku Jesosi a di suku di de an ta suku fini a soni poi.
JEHOVAH KU JESOSI AN TA SUKU FINI A SONI POI
3. Unfa u du sabi taa Jehovah ta tooka di fasi fa a ta du soni te a dë fanöudu?
3 De ta kai Jehovah „di Gaan Sitonu”, u di an ta tooka möönsö (Deto. 32:4). Ma tökuseei a ta tooka di fasi fa a ta du soni te a dë fanöudu. Möön soni tooka a di goonliba aki, möön Jehovah ta tooka di fasi fa a ta du soni, sö taa dee soni dee a paamusi u sa pasa tuutuu. U di Jehovah mbei u kumafa hënseei dë, mbei useei sa bia du soni woto fasi te soni tooka a di libi fuu. U ta feni mama wëti a di Bëibel di ta heepi u fuu du soni a wan köni fasi, aluwasi andi ta miti u. Di fasi fa Jehovah ta du soni, söseei dee mama wëti dee a da u ta lei u gbelingbelin taa hii fa hën da „di Gaan Sitonu”, tökuseei a ta tooka di fasi fa a ta du soni.
4. Konda wan woto di ta lei taa Jehovah ta bia du soni woto fasi te a dë fanöudu. (Leifitiki 5:7, 11)
4 Di fasi fa Jehovah ta du soni dë söndö föutu, söseei a ta bia du soni woto fasi te a dë fanöudu. An ta suku fini a sëmbë. Di fasi fa a bi ta libi ku dee Isaëli sëmbë, ta lei taa an bi ta suku u hii sëmbë tja di seei soni ko tjuma dëën, aluwasi ee de bi pooti, nasö ee de bi gudu. So juu, a bi ta da hiniwan sëmbë pasi u de tja andi de bi abi go tjuma dëën.—Lesi Leifitiki 5:7, 11.
5. Konda wan woto di ta lei taa Jehovah abi sakafasi ku tjalihati u sëmbë.
5 Jehovah an ta suku fini a soni poi, u di a abi tjalihati u sëmbë, söseei u di a abi sakafasi. Jehovah bi lei fa a abi sakafasi tjika, di a bi o kii dee hogihati sëmbë u Sodom. A bi mbei dee ëngëli fëën piki Lötu faa kule go a di pisiwata ka dee kuun dë. Lötu bi ta fëëë u go ala, fëën mbei a bi hakisi Jehovah ee hën ku dee sëmbë fëën wosudendu bi sa lowe go a di foto de kai Zoali. Zoali bi dë wan piki foto di Jehovah bi o booko kaba a sösö. Jehovah bi sa duwengi Lötu faa du hii soni finifini kumafa a piki ën. Ma an bi du sö, a bi dëën pasi faa go a Zoali, söseei an bi booko di foto dë möön (Ken. 19:18-22). Höndöhöndö jaa baka di dë, Jehovah bi lei taa a bi abi tjalihati u dee sëmbë u Ninifei. A bi manda Jona faa go piki de taa a bi o kii de puu, söseei taa a o booko di foto u de kaba a sösö. Ma di dee sëmbë u Ninifei bi lei taa de bi ta tjali u dee soni di de bi du, hën Jehovah an bi du soni ku de möön, u di a bi abi tjalihati u de.—Jona 3:1, 10; 4:10, 11.
6. Konda unfa Jesosi bi djeesi Jehovah a di suku di an ta suku fini a soni poi.
6 Jesosi ta djeesi Jehovah a di suku di an ta suku fini a soni poi. Jehovah bi mandëën ko a goonliba aki faa ko peleiki da dee Isaëli sëmbë dee bi „dë kuma wanlö hia lasilasi sikafu”. Ma Jesosi bi bia du soni woto fasi di a bi dë fanöudu. Wan daka, hën wan woto köndë mujëë bi ko begi ën faa heepi ën ku di mujëë mii fëën, u di wan taku jeje bi dë nëën liba „ta dëën sitaafu ta kii”. Jesosi bi lei taa a bi abi tjalihati u di mujëë, hën a kula di mujëë mii fëën (Mat. 15:21-28). Boiti di dë, di Jesosi bi bigi du di diniwooko fëën, hën a bi taki taa: „Ee wan sëmbë ja kë piki taa mi ku i nama, nöö miseei tu, ma o piki . . . , taa mi ku i nama” (Mat. 10:33). Ma Jesosi an bi bia baka da Petuisi, hii fa Petuisi bi taki dii pasi taa an bi sabi ën. Jesosi bi sabi taa Petuisi bi ta tjali u di soni di a bi du, söseei a bi sabi taa Petuisi bi abi wan taanga biibi. Baka di Jesosi bi weki ko a libi baka, hën a bi go miti Petuisi, nöö a musu u dë sö taa a bi lei ën taa a dëën paadon, söseei taa a lobi ën jeti.—Luk. 24:33, 34.
7. Unfa u kë u wotowan sabi u, te u luku Filipi 4:5?
7 U ko si taa Jehovah ku Jesosi an ta suku fini a soni poi. Ma nöö unfa a dë ku u? Jehovah kë fuu seei ta du soni kuma hën. (Lesi Filipi 4:5.) A wan woto Bëibel de puu di tëkisi aki a di fasi aki: „Be hii sëmbë sabi unu kuma sëmbë di an ta suku fini a soni poi.” Wë u sa hakisi useei taa: ’Sëmbë sabi mi kuma wan sëmbë di ta hoi pasensi da wotowan, di ta disa wotowan u de du soni a wan woto fasi, söseei di an ta suku fini a soni poi ö? Naa de ta si mi kuma wan sëmbë di na abi tjalihati u wotowan, kuma wan sëmbë di ta kë u soni pasa nömönömö kumafa a kë, nasö kuma wan sëmbë di an ta tei sëmbë fan? Mi ta kë nömönömö u wotowan du soni kumafa mi kë u? Naa mi ta tei wotowan fan te a fiti?’ Möön woo ta mbei möiti fu wa ta suku fini a soni poi, möön a o ta dë u si taa u ta djeesi Jehovah ku Jesosi. Boo luku faandi mbei a dë fanöudu fuu bia du soni woto fasi te soni tooka a di libi fuu, te di fasi fa u ta si soni tooka ku di fasi fa wotowan ta si soni, söseei te di fasi fa wotowan ta du soni tooka ku di fasi fa u ta du soni.
LEI TAA I TA BIA DU SONI WOTO FASI TE SONI TOOKA A DI LIBI FII
8. Andi sa heepi u fuu bia du soni woto fasi te soni tooka a di libi fuu? (Luku di pisi a basu tu.)
8 A dë fanöudu fuu ta bia du soni woto fasi te soni tooka a di libi fuu. Te soni tooka a di libi fuu, nöö u sa ko abi bookohedi di wa bi ta mëni taa u bi o abi wan daka. A sa pasa taa u ko dë ku suwaki. Di tooka di möni soni nasö politiki soni sa tooka vou sö a di pisiwata ka u ta libi, sa mbei taa di libi ko möön taanga da u (Peleik. 9:11; 1 Kol. 7:31). A sa taanga da u tu ee di ölganisaasi u Jehovah hakisi u fuu du wan woto wooko. Ma aluwasi unfa soni dë, tökuseei woo sa bia du soni woto fasi ee u ta du fö soni. Dee fö soni dë da: Te u ta hoi a pakisei taa soni ko tooka a di libi fuu, te u ta buta mëni a di ten di ta ko, te u ta buta pakisei a hii dee bunu soni dee ta pasa a di libi fuu, ku te u ta du soni da wotowan.b Boo luku unfa so u dee baaa ku dee sisa fuu bi feni wini di de bi du dee fö soni dë.
9. Unfa wan baaa ku hën mujëë bi bia du soni woto fasi di fuka bi miti de?
9 Hoi a pakisei taa soni tooka a di libi fii. Di ölganisaasi bi manda wan baaa de kai Emanuele, ku hën mujëë Francesca, u de go du di sëndëlengiwooko a wan woto köndë. Di de bigi lei u fan di töngö u dee sëmbë, söseei di de bigi hulu dee baaa ku dee sisa u di kemeente, hën di kolona siki bigi paaja, nöö de an bi musu ta hulu sëmbë möön. A di pisiten dë, hën di mama u Francesca ko lasi libi vou sö. Francesca bi kë dë makandi ku dee famii fëën seei, ma di kolona siki an bi ta dëën pasi faa go luku de. Andi bi heepi ën faa hoi dou? Wan u dee soni di bi heepi ën, da di begi di hën ku hën manu bi ta begi Jehovah makandi faa da de köni, u de an ta booko de hedi te poi. Jehovah bi piki di begi u de a di soifi ten. A bi wooko ku dee soni u di ölganisaasi fëën u heepi de. Wan u dee soni dë, da wan fëlön ka wan baaa bi taki wan soni di bi da de taanga seei. A bi taki taa: „Ee wa naanaa u tei taa soni tooka a di libi fuu, nöö hesihesi woo sa ko ta dë waiwai baka. Söseei woo sa ta du soni a wan bunu fasi, hii fa di libi fuu an dë kuma fosu möön.”c Di u tu soni di bi heepi de, da di kë di de bi kë ko sa’ u peleiki möön bunu ku tëlëfön. De bi ko feni wan sëmbë di de bi ta lei soni u Bëibel. Di u dii soni di bi heepi de, da di da di de bi da dee baaa ku dee sisa u di kemeente pasi u heepi de. Di lobi di dee baaa ku dee sisa bi lei taa de lobi de bi dou de hati seei. Hiniwan daka wan sisa bi ta sikifi wan piki bosikopu ku wan Bëibel tëkisi manda da de. A bi du ën wan hii jaa longi. Ee useei ta hoi a pakisei taa soni tooka a di libi fuu, nöö woo ta dë waiwai te u ta du dee soni dee u sa du.
10. Unfa wan sisa bi bia du soni woto fasi di soni bi ko tooka vou sö nëën libi?
10 Buta mëni a di ten di ta ko, söseei buta pakisei a hii dee bunu soni dee ta pasa a di libi fii. Christina, wan sisa u di köndë de kai Lomania, di ta libi a Japan bi fii bookosaka di de bi tapa di Ingisitöngö kemeente ka a bi dë. Ma an bi ta buta pakisei a di soni dë nöömö. Ma a bi buta taa a o du hii soni di a sa du a di kemeente ka de ta fan Japantöngö. Sisa Christina bi hakisi wan mujëë di hën ku ën bi ta wooko a di wan kamian, faa heepi ën faa ta fan Japantöngö möön bunu. Di mujëë bi piki taa a o heepi ën, nöö a bi ta wooko ku di Bëibel, söseei ku di brochure I sa dë waiwai u teego! u lei ën di töngö. Christina bi ko sa’ u fan Japantöngö möön bunu, ma di möön gaan soni, hën da di mujëë bi kë sabi möön soni u di Bëibel. Te u ta buta mëni a di ten di ta ko, söseei te u ta buta pakisei a hii dee bunu soni dee ta pasa a di libi fuu, nöö u sa feni gaan bunu di wa bi mëni, aluwasi ee soni tooka vou sö a u libi.
11. Andi bi heepi wan baaa ku hën mujëë di de bi abi möni fuka?
11 Du soni da wotowan. Wan baaa ku hën mujëë ta libi a wan köndë ka de tapa di wooko fuu, nöö de bi bigi abi möni fuka u di möni soni u di köndë an bi ta waka bunu. Andi bi heepi de? Di fosu soni di bi heepi de, hën da de bi mbei möiti u na ta bai soni di de an abi fanöudu. Di u tu soni, hën da de an bi ta buta pakisei a dee bookohedi u de, ma de bi ta buta pakisei a di heepi di de bi musu heepi wotowan u de ko dë mati u Gadu (Tjab. 20:35). Di baaa bi taki taa: „U di u bi ta möön peleiki, mbei wa bi ta abi ten u buta pakisei a dee bookohedi fuu, ma u bi ta möön abi ten u du dee soni dee Gadu kë fuu du.” Te soni tooka a di libi fuu, nöö u musu hoi a pakisei taa a dë wan gaan fanöudu soni seei fuu ta heepi wotowan go dou, möönmöön te u ta du di peleikiwooko.
12. Unfa u sa sabi andi da di möön bunu fasi fa u sa peleiki da dee sëmbë dee u ta miti, te u luku fa apösutu Paulosu bi ta du soni?
12 Te u ta du di peleikiwooko, nöö u musu ta dë kabakaba u bia du soni woto fasi. Dee sëmbë dee u ta peleiki da ta abi tookatooka fasi fa de ta si Gadu, söseei de ta dë sëmbë u peipei lö, di kumutu a tookatooka köndë. U sa lei soni a di fasi fa apösutu Paulosu bi ta peleiki da sëmbë. Jesosi bi buta Paulosu faa dë apösutu u dee sëmbë dee an dë Dju (Lom. 11:13). Hën da Paulosu bi ta peleiki da dee Dju, dee Giiki sëmbë, dee heihei sëmbë, dee könima, ku dee tiima u köndë. U di Paulosu bi kë dou di hati u hii dee tookatooka sëmbë aki, mbei a bi ko dë wan sëmbë di „ko sabi u libi ku hii sootu pei sëmbë” (1 Kol. 9:19-23). A bi ta buta pakisei a di pisiwata ka dee sëmbë kumutu, söseei a dee soni di de bi ta biibi, nöö a sö wan fasi a bi ta sabi unfa a bi musu peleiki da de. Useei sa ko ta peleiki möön bunu te u ta buta pakisei a dee sëmbë, sö taa u sa ko sabi andi da di möön bunu fasi fa u sa heepi de.
LESIPEKI DI FASI FA WOTOWAN TA SI SONI
Ee u sa’ u libi ku wotowan, nöö woo ta lesipeki di fasi fa de ta si soni (Luku palaklafu 13)
13. Un hogi soni 1 Kolenti 8:9 ta taki taa u sa koti pasi da, te u ta lesipeki di fasi fa wotowan ta si soni?
13 Te u sa’ u libi ku wotowan, nöö woo sa ta lesipeki di fasi fa de ta si soni. So sisa lo’ u bë buka, nasö de lo’ u buta soni a fesi te de ta seeka sinkii, ma so sisa an lobi ën. So baaa ku sisa ta bebe daan pikisö, ma i abi wotowan di buta taa de an o ta bebe soni di dë ku daan. Hiniwan Keesitu sëmbë kë dë gösöntu, ma hii de tuu an ta kula deseei a di seei fasi. Ee hii juu u ta si kuma di fasi fa u ta du soni da di möön bunuwan, söseei ee u ta pooba u mbei dee baaa ku dee sisa du soni kuma u, nöö u sa mbei wotowan naki futu, söseei u sa mbei fiifii libi an dë a di kemeente möön. Wë wa bi o kë du sö wan soni! (Lesi 1 Kolenti 8:9; 10:23, 24) Boo luku tu soni di o lei u fa dee mama wëti u Bëibel sa heepi u fuu sa’ u libi ku wotowan, söseei fuu sa ta libi fiifii ku useei go dou.
Ee u sa’ u libi ku wotowan, nöö woo ta lesipeki di fasi fa de ta si soni (Luku palaklafu 14)
14. Un mama wëti u Bëibel musu tii u te woo bisi soni, söseei te woo seeka sinkii?
14 Dee soni dee u ta bisi ku di fasi fa u ta seeka sinkii. Jehovah an ta piki u andi ku andi u musu bisi, ma a da u mama wëti di sa heepi u. A dë fanöudu fuu ta bisi soni a wan lesipeki fasi, a wan fasi di ta gafa Gadu, a wan fasi di ta lei taa wa ta du soni pasa maaka, söseei di ta lei taa u dë ku „limbolimbo fusutan” (1 Tim. 2:9, 10; 1 Pet. 3:3). Boiti di dë, wa kë bisi soni di o mbei wotowan buta pakisei a u a wan fasi di an fiti. Dee mama wëti u Bëibel o heepi dee gaanwomi tu, u de an buta wëti da sëmbë te a nama ku di fasi fa de ta bisi soni, nasö ku di fasi fa de ta seeka de uwii. Dee gaanwomi u wan kemeente bi ko si taa so u dee njönku baaa, bi ko ta koti uwii kuma so u dee njönku kijoo u di pisiwata u de. Di uwii u de an bi ta dë vudjuu, ma a bi ta dë seei tjakatjaka. Unfa dee gaanwomi sa heepi de söndö u buta wëti da de? Di keling-gaanwomi bi lei dee gaanwomi taa, de sa piki dee baaa taa: „Te i dë a di podium, ee sëmbë ta buta pakisei a i gaanfa möön fa de musu buta pakisei a dee soni dee i ta taki, nöö hën da di uwii fii, ku di fasi fa i bisi an fiti.” Dee gaanwomi bi heepi dee baaa aki söndö u buta wëti da de.d
Ee u sa’ u libi ku wotowan, nöö woo ta lesipeki di fasi fa de ta si soni (Luku palaklafu 15)
15. Un wëti ku un mama wëti u Bëibel ta heepi u fuu sabi unfa u musu du soni te a nama ku di gösöntu fuu? (Loomë 14:5)
15 Soni di nama ku di gösöntu fuu. Hiniwan Keesitu sëmbë musu luku andi a o du faa sa dë gösöntu (Gal. 6:5). Te a o du di soni dë, nöö a musu köni fu an pasa dee wëti dee nama ku buuu, söseei fu an du soni di nama ku taku jeje (Tjab. 15:20; Gal. 5:19, 20). Ma boiti di dë, hiniwan sëmbë musu taki da hënseei unfa a kë u de kulëën. So sëmbë ta suku heepi a data wanwan, ma wotowan ta suku heepi a woto fasi. Aluwasi u ta si kuma wan fasi u kula bunu möön wan wotowan, tökuseei u musu ta lesipeki dee baaa ku dee sisa fuu ee de an ta si soni kumafa u ta si soni. Fëën mbei a bunu fuu ta hoi dee soni aki a pakisei. Di fosuwan, hën da di Könuköndë u Gadu wanwan tö sa puu siki kaba a mundu (Jes. 33:24). Di u tu soni, hën da hiniwan Keesitu sëmbë „musu sabi gbelin nëën hati” andi möön bunu dëën. (Lesi Loomë 14:5.) Di u dii soni, hën da wa kë kuutu di fasi fa wotowan kë du soni, söseei wa kë du soni di o mbei de naki futu kai (Lom. 14:13). Di u fö soni, hën da Keesitu sëmbë ta lei taa de lobi wotowan, söseei taa de an ta du soni di sa mbei de an ta libi fiifii ku deseei a di kemeente möön (Lom. 14:15, 19, 20). Ee u ta hoi dee soni aki a pakisei, nöö u ku dee baaa ku dee sisa fuu o dë mati, söseei woo ta libi fiifii ku useei a di kemeente.
Ee u sa’ u libi ku wotowan, nöö woo ta lesipeki di fasi fa de ta si soni (Luku palaklafu 16)
16. Unfa wan gaanwomi sa lei taa a sa’ u libi ku wotowan te a ta wooko makandi ku dee woto gaanwomi? (Luku dee peentje tu.)
16 Dee gaanwomi musu dë sëmbë di wotowan sa djeesi a di sabi di de musu sa’ u libi ku wotowan (1 Tim. 3:2, 3). Wan gaanwomi u kemeente an musu ta dë ku di mëni taa wotowan o ta tei dee fan fëën möön di u dee woto gaanwomi, u di a gaandi u de. A ta hoi a pakisei taa di jeje u Jehovah sa mbei hiniwan u dee woto gaanwomi taki wan soni di sa heepi de u de du soni a wan köni fasi. Nöö ee gaansë u dee gaanwomi u di kemeente taki fiti u du wan soni di ta kai ku dee mama wëti u Bëibel, nöö wan gaanwomi di sa’ u libi ku wotowan o dë kabakaba u wooko makandi ku de, aluwasi ee a ta si soni woto fasi.
JOO FENI WINI TE JA TA SUKU FINI A SONI POI
17. Un wini u ta feni te wa ta suku fini a soni poi?
17 Te wa ta suku fini a soni poi, nöö woo feni sömëni gaan bunu. U ku dee baaa ku dee sisa fuu u ko dë möön gaan mati, söseei woo ta libi fiifii ku useei a di kemeente. U ta wai seei taa u ku tookatooka sëmbë, söseei u ku sëmbë u peipei lö ta dini Jehovah fiifii makandi. Ma u ta möön wai u di u sabi taa u ta djeesi Jehovah di Gadu fuu, a di suku di an ta suku fini a soni poi.
KANDA 90 U musu ta da useei taanga
a Jehovah ku Jesosi an ta suku fini a soni poi, nöö de kë fu useei mbei möiti fuu dë sö tu. Ee wa ta suku fini a soni poi, nöö an o taanga da u sö te soni tooka a di libi fuu, möönmöön te u ko dë ku suwaki, nasö te u ko abi möni fuka. Di soni dë o heepi u tu fuu ta du soni, söseei fuu ta taki soni di o mbei fiifii libi dë a di kemeente.
b Luku di woto „Omgaan met veranderingen”, di dë a di Ontwaakt! Nö. 4 u di jaa 2016.
c Luku di fëlön de kai Wan takimakandi ku Baaa Dmitriy Mikhaylov. Di link fëën dë a di woto „Jehovah mbei di du di de ta du ku dee sëmbë fëën ko dë wan kotoigi da hii sëmbë”. A dë a Di libi ku di diniwooko fuu kuma Keesitu sëmbë komakandi-buku u gaanliba te go miti piki-deewei-liba u di jaa 2021.
d Ee i kë sabi möön fini unfa u musu ta bisi soni, söseei unfa u musu ta seeka sinkii, nöö luku woto 52, u di buku I sa dë waiwai u teego!