Di fasi fa soni bi waka a di peleikiwooko

Lei taa i abi tjalihati da hii pei sëmbë

Wan daka hën wan sisa di ta libi a Njunjun Zeeland luku di fëlön de kai: „Heb wederzijdse zorg voor elkaar”. Di fëlön dë ta lei taa na tjalihati nöö Jehovah abi da sëmbë nöö a kaba, ma a ta du soni tu u lei taa a ta fii da de (Jes. 63:7-9). Fëën mbei di sisa buta taa a o du soni tu u heepi wotowan. A di seei daka dë di a go a wënkë u go bai soni u njan, hën a miti wan mujëë di ta libi a sitaati, hën a hakisi ën ee a kë faa bai wan soni u njan dëën. Di di mujëë piki aai, hën di sisa bai soni tja ko dëën, hën a peleiki dëën kölö sö ku di talakitaati di ta taki taa Pena ku fuka o kaba wan daka u?

Di soni aki bi mbei taa di mujëë bigi këë. A bi piki di sisa taa a kiija a di tuutuu lei, ma a disëën sömëni jaa kaa. A bi taki tu taa kölö sö ufö hën ku di sisa miti, a bi begi Jehovah faa heepi ën faa toona ko nëën baka. Di sisa bi ko da di mujëë wan Bëibel, nöö di mujëë bi dë kabakaba u bigi lei soni u Bëibel ku di sisa.a

U sa djeesi Jehovah te u ta lei taa u abi tjalihati u sëmbë, te dou ku dee famii fuu, ku dee baaa ku dee sisa u di kemeente. U sa lei taa u abi tjalihati tu te u ta suku hiniwan okasi u konda soni u di bunu buka da wotowan.