Soni di dee lesima hakisi

Ambë da „dee basia dee Gadu tei u du apaiti wooko”, dee 1 Timoteo 5:21 ta taki soni u de?

Apösutu Paulosu bi sikifi wan biifi manda da Timoteo, di bi dë wan gaanwomi u kemeente. A bi taki a di biifi dë taa: „Mi kë fii sabi taa Masa Gaangadu ku Masa Jesosi Keesitu ku dee basia dee Gadu tei u du apaiti wooko tuu ta jei fa mi ta fan ku i aki, taa i musu du soni leti kumafa mi taki da i aki. Ja musu kuutu wan sëmbë söndö i ko sabi fini u wan woto, söseei ja musu tei sëmbë së tu.”​—1 Tim. 5:21.

Fuu ko fusutan möön bunu ambë da ’dee basia u Gadu dë’, nöö woo taki u dee basia u Gadu dee an bi o sa dë a di kulupu dë dendu. A dë gbelingbelin u si taa de an dë a di kulupu u dee 144.000 salufuwan. Di Paulosu bi sikifi di biifi aki manda da Timoteo, nöö na wan salufuwan bi go a liba ala jeti. Na wan u dee apösutu ku dee woto salufuwan bi toon basia u Gadu jeti. Fëën mbei dee salufuwan an bi o sa dë a di kulupu dë dendu.​—1 Kol. 15:50-54; 1 Tes. 4:13-17; 1 Joh. 3:2.

Söseei ’dee basia u Gadu dë’ an sa dë dee basia u Gadu dee bi pasa Gadu buka a di ten u di Gaan Wata. Biga de bi tuwë gogo ku Saatan a wan së, hën de ko toon taku jeje, söseei de ko toon felantima u Jesosi (Ken. 6:2; Luk. 8:30, 31; 2 Pet. 2:4). A di ten di ta ko, Jesosi o vinde de tuwë go a wan baaku di na abi goon, nöö de o sai dë 1000 jaa longi. Baka di dë, nöö a o kii de ku Saatan puu be soni u de kaba a mundu.​—Jud. 6; Ako. 20:1-3, 10.

A musu u dë taa ’dee basia u Gadu’ dee Paulosu bi ta taki soni u de, da dee basia dee dë a liba ala ta hoi deseei a „Masa Gaangadu ku Masa Jesosi Keesitu”.

Sömëni dusudusu basia u Gadu dë di ta hoi deseei nëën (Heb. 12:22, 23). Wa musu si kuma Jehovah ta da hii de tuu di wan seei wooko u du a di seei ten (Ako. 14:17, 18). Na fëëkëtë taa Jehovah bi hakisi wan kodo basia fëën faa kii 185.000 Asilia sodati (2 Kön. 19:35). A kan taa so u de o feni di okasi u wooko makandi ku Jesosi te a o ko ’pii hii dee sëmbë dee ta libi takulibi, ku dee ta lei oto sëmbë u de libi sö, puu a dee sëmbë dee Gadu ta tii dendu’ (Mat. 13:39-41). Wanlö wotowan sa feni di okasi u ’pii hii dee salufuwan u Gadu tuu hai tja ko buta a wan kamian’ u go a liba ala (Mat. 24:31). Söseei woto basia u Gadu dë di ta ’tjubi u u hogi an miti’ u.​—Luku Ps. 91:11; Mat. 18:10 ku Mat. 4:11; Luk. 22:43.

A kan taa ’dee basia u Gadu’, dee 1 Timoteo 5:21 ta taki soni u de, bi feni di wooko u luku fa soni bi nango a dee kemeente. A di pisi aki Paulosu bi da dee gaanwomi lai u di fasi fa de musu ta tja dee faantiwöutu u de, söseei a bi da dee sëmbë u di kemeente lai a di fasi fa de musu ta lesipeki dee gaanwomi. A bi taki tu taa dee gaanwomi an bi musu ta ’kuutu wan sëmbë söndö u de ko sabi fini u wan woto, söseei de an bi musu tei sëmbë së tu’. Wan fanöudu soni di mbei taa de musu hoi deseei a di lai di Paulosu da de, hën da u di de ta dini dee baaa ku dee sisa a ’Masa Gaangadu ku Masa Jesosi Keesitu’ fesi, söseei a ’dee basia u Gadu dee Gadu tei u du apaiti wooko’ fesi. Di soni aki kë taki taa de ta luku ee dee gaanwomi ta du di wooko u de bunu. A dë gbelingbelin u si taa so u dee basia u Gadu ta du wooko di nama ku di kemeente, de ta tjubi dee dinima u Jehovah, de ta heepi tii di peleikiwooko, söseei de nango ta piki Jehovah andi ku andi de si.​—Mat. 18:10; Ako. 14:6.