Wan taanga libi bigi

ADAM ku Eva bi a’ sömëni fuka a döösë u di djai u Eden. De bi musu wooko taanga u feni njanjan. De an bi ta si waiti fuuta pau möön, ma de bi ta si gaan hia maka ku matunga ta göö lontu de tapa. Di soni dë hën pasa di Adam ku Eva pasa Gadu buka, nöö de an bi dë mati fëën möön.

Ma di möön hogi soni, hën da Adam ku Eva bi bigi ta dëdë. Na fëëkëtë taa Gadu bi bai de taa de bi o dëdë ee de bi njan di fuuta u wan u dee pau. Wë a di wan seei daka di de njan mën, de bigi ta dëdë. De bi du wan gaan don soni seei di de an haika Gadu!

Adam ku Eva bi pai hii dee mii u de baka di Gadu jaka de puu a di djai u Eden. Hën da dee mii seei bi o ta gaandi ta dëdë.

Haika nöö Adam ku Eva bi musu haika Jehovah, nöö di libi bi o ta suti da de ku dee mii u de seei tu. Hii de tuu bi o sa libi waiwai u teego a goonliba. Na wan sëmbë bi o ta gaandi ta siki ta dëdë.

Gadu kë taa sëmbë libi waiwai u teego, nöö a paamusi taa di soni dë o pasa wan daka. Na hii di goonliba nöö o ko hanse, ma hii sëmbë o dë gösöntu tu. Nöö hii sëmbë a goonliba o ko dë gaan mati, nöö de o ko dë mati ku Gadu tu.

Ma Eva an bi dë wan mati u Gadu möön. Fëën mbei a bi ta taanga dëën te a bi ta pai miii. A bi ta fii pen. U di an bi haika Jehovah, mbei di soni dë tja gaan fuka ko dëën, na sö a dë nö?

Adam ku Eva bi abi sömëni womi mii ku mujëë mii. Di de pai di fosu womi mii u de, hën de kai ën Kain. De kai di u tu, Abeli. Andi bi pasa ku Kain ku Abeli? I saandi ö?