Lotu mujëë bia luku baka

LOTU ku ën wosudendu ta libi a di köndë Kaana, makandi ku Abahamu. Wan daka hën Abahamu piki Lotu taa: ’Di kamian aki an bigi tjika hii dee mbeti fuu. Boo paati pasi. Ee i go a di së ala, nöö mi o go a di woto së.’

Hën Lotu luku di köndë te a kaba. A si wan gaan waiti pisi di bi a’ hia wata ku bumbuu njanjan da dee mbeti fëën. A bi dë di së pisi de kai Joodan. Nöö hën Lotu ku ën wosudendu ku dee mbeti fëën, hai go ala. Te u kaba fëën de mbei wosu a di köndë Sodom.

Dee sëmbë u Sodom bi dë hogi seei. Di soni dë bi ta toobi Lotu gaanfa, biga a bi dë wan bunu womi. Gadu seei an bi lo’ di libi u dee sëmbë dë. Te u kaba fëën, Gadu manda tu engel u go piki Lotu taa a o poi di köndë Sodom ku Gomola di bi dë bandja ku bandja, biga dee sëmbë ta libi hogi tumisi.

Dee engel piki Lotu taa: ’Du paapaa! Tei i mujëë ku dee tu mujëë mii fii, nöö un kule go kumutu aki!’ Lotu ku ën wosudendu bi dë ta naanaa, hën dee engel kisi de panjan a maun gbaa hai tja go kumutu a di köndë. Wan u dee engel piki de taa: ’Un kule taanga fu wan dëdë! Wan bia luku baka e. Un kule go a dee kununu fu wan dëdë.’

Lotu ku dee mujëë mii fëën kule go kumutu a Sodom, leti kumafa dee engel piki de. De an pena taanpu a na wan kamian seei, nöö de an bia luku baka tu. Ma di mujëë u Lotu bi a’ taangajesi. Baka di de pasa Sodom wan pisi, a taanpu, hën a bia luku baka. Hën Lotu mujëë toon wan satu pobiki. I ta si ën a di peentje u?

U sa lei wan bunu soni u di woto aki. A ta lei u taa Gadu ta tjubi dee sëmbë dee ta haikëën, ma dee sëmbë dee an ta haikëën o lasi de libi.