Jakopu pai hia mii

LUKU di wosudendu aki. Dee disi da dee 12 womi mii u Jakopu. Nöö a a’ mujëë mii tu e. I sa’ di në u so u dee mii fëën u? Boo kai so u dee në u de.

Lea pai Lubëni, Simion, Leifi ku Juda. Di Lakëli si taa an ta pai miii, nöö a bi tjali seei. Fëën mbei a da Jakopu di mujëë futuboi fëën de kai Beliha, nöö Beliha pai Dan ku Nafutali. Hën Lea seei da Jakopu di u fëën de kai Zilipa, hën Zilipa pai Gati ku Asë. Te u kaba fëën, Lea ko pai tu womi mii möön, Isakali ku Zebulon.

Awa ufö Lakëli bëë ko jabi. A pai wan mii, hën a kai ën Josëfu. Bakaten woo lei soni u Josëfu möön, u di a toon wan nëbai womi. Dee disi da dee 11 womi mii di Jakopu pai di a bi ta libi ku ën pai Laban.

Jakopu bi a’ wan tu mujëë mii tu, ma di Bëibel ta kai di në u wan u de nöö. Hën da Dina.

Di juu bi dou taa Jakopu bi o kumutu disa hën pai Laban, toona go baka a Kaana. Fëën mbei a tei hii di wosudendu fëën, dee gaan hia sikapu ku kau fëën, hën a bigi waka di langa pasi nango fëën.

Baka di Jakopu ku di wosudendu fëën dou a Kaana, hën te wan pisi Lakëli pai wan womi mii. Di soni dë pasa di de bi dë a di pasi liba. Soni bi taanga da Lakëli, nöö te u kaba fëën a dëdë di a pai di mii. Ma soni an bi du di mii. Jakopu kai di mii dë Benjamin.

A bunu u hoi dee në u dee 12 womi mii u Jakopu a hedi, biga a de hii dee lö u Isaëli kumutu. Awa, dee 12 lö u Isaëli abi di në u 10 u dee womi mii u Jakopu ku tu u dee womi mii u Josëfu. Isaki libi gaandi u si hii dee mii aki, nöö a bi wai seei u si sömëni u dee bakamii fëën. Ma boo luku andi pasa ku Dina, wan u dee mujëë mii di kai ën avo.