Jakopu nango a Halan

I SABI ambë da dee womi di Jakopu ta fan ku de dë u? Baka di Jakopu waka sömëni daka, hën a miti de a wan baaku wata. De ta luku dee sikapu u de. Hën Jakopu hakisi de taa: ’Dee womi, na un köndë un kumutu?’

Hën de piki ën taa: ’Un kumutu a Halan.’

Hën Jakopu hakisi de möön taa: ’Un sabi di womi de kai Laban u?’

Hën de piki: ’Aai, luku di mujëë mii fëën Lakëli ta waka ta ko ala ku dee sikapu fëën.’ I ta si Lakëli ta waka ta ko ala u?

Di Jakopu si Lakëli ku dee sikapu fëën tio Laban, hën a kule go logoda di sitonu puu a di baaku buka sö taa dee sikapu bi sa bebe wata. Hën Jakopu bosi Lakëli, hën a konda da Lakëli ambë dëën. Lakëli bi wai seei, hën a kule go a wosu go konda di soni dë da hën tata Laban.

Laban wai seei taa Jakopu ko dë ku ën. Nöö di Jakopu hakisi u toou ku Lakëli, nöö Laban wai seei. Ma a piki Jakopu taa a musu wooko seibi jaa longi a di goon fëën ufö a o sa feni Lakëli. Ma u di Jakopu lobi Lakëli gaanfa, mbei a du di soni dë. Ma di di juu dou u de toou, nöö i saandi pasa u?

Laban da Jakopu di möön gaan mujëë mii fëën de kai Lea, ma an dëën Lakëli. Laban piki ën taa ee a wooko seibi jaa möön, nöö a o dëën Lakëli tu. Nöö hën Jakopu wooko seibi jaa möön, hën Laban dëën Lakëli. A di ten dë Gadu bi ta da pasi taa wan womi bi sa abi möön leki wan mujëë. Ma nöunöu an dë sö möön. Kumafa di Bëibel ta lei, wan womi musu abi wan kodo mujëë tö.