Wan uwii ta kisi faja

MOSESI dou tee a di kuun de kai Holeb u tja dee sikafu fëën go suku ahun u njan. Naandë a si wan uwii ta kisi faja, ma di uwii an bi ta tjuma!

Mosesi pakisei taa: ’Di soni aki foombo. Mi o go möön zuntu fu mi sa luku di soni aki möön fini.’ Di a du sö kaa, hën a jei wan töngö fan ku ën a di uwii dendu taa: ’Na ko möön zuntu e. Puu dee susu a i futu, biga i taanpu a wan santa kamian.’ Gadu wë bi ta fan ku ën dë. A bi tei wan engel u fan ku Mosesi. Fëën mbei Mosesi tapëën fesi.

Hën Gadu taki taa: ’Mi si di pena di dee sëmbë u mi ta pena a Egepiti köndë. Di soni dë mbei mi o puu de a di sitaafu dë, nöö ju da di sëmbë di mi o manda go u tja dee sëmbë u mi kumutu a Egepiti köndë.’ Jehovah bi o tja dee sëmbë fëën go a di hanse köndë de kai Kaana.

Ma Mosesi taki taa: ’Ma dë na wan wojo soni. Unfa mi o sa du di soni dë? Ma boo taa mi go, nöö dee Isaëli sëmbë hakisi mi taa: „Ambë manda i ko aki?”, nöö andi mi musu piki de?’

Hën Gadu piki ën taa: ’Di soni aki joo piki de: „JEHOVAH di Gadu u Abahamu, di Gadu u Isaki, di Gadu u Jakopu, hën manda mi ko a unu.”’ Hën Jehovah taki möön taa: ’Di në u mi hën disi u teego.’

Hën Mosesi toona piki möön taa: ’Ma boo taa de an biibi taa i wë manda mi ko.’

Hën Gadu hakisi ën taa: ’Andi dë a i maun dë?’

Mosesi piki taa: ’Wan pau.’

Hën Gadu taa: ’Tuwëën a goon i si.’ Nöö di Mosesi du sö kaa, hën di pau toon wan sindeki. Baka u di dë Jehovah lei Mosesi wan woto maaka. A piki ën taa: ’Tuusi i maun go a di djakiti fii dendu i si.’ Hën Mosesi tuusi maun go. Nöö di a hai ën maun puu baka, hën a ko dë wetiweti faan kuma boon! A bi djei kuma a bi a’ di taku siki de kai kököbë. Baka di dë Jehovah da Mosesi di makiti u du di u dii maaka. Te u kaba fëën a taki taa: ’Te i du dee maaka aki, nöö dee Isaëli sëmbë o biibi taa mi manda i ko.’

Baka di dë Mosesi go a wosu, hën a hakisi Jetilo taa: ’Gaantangi mi begi i, disa mi be mi toona go baka a dee famii u mi a Egepiti köndë u mi si fa de dë ala.’ Sö Jetilo da Mosesi adjoisi, hën Mosesi tei pasi nango baka a Egepiti köndë.