Mosesi ku Alon nango a Falao

DI MOSESI toona go a Egepiti, hën a konda dëën baaa Alon un maaka Gadu bi du. Nöö di Mosesi ku Alon du hii dee maaka lei dee Isaëli sëmbë, hën dee sëmbë ko biibi taa Jehovah dë ku de tuutuu.

Baka di dë, Mosesi ku Alon go a Falao. Hën de piki ën taa: ’Jehovah di Gadu u Isaëli taki taa: „Disa dee sëmbë u mi be de go dini mi dii daka longi a di sabana.”’ Ma Falao piki taa: ’Ma ta biibi a Jehovah. Nöö ma o disa Isaëli go tu.’

Falao hati bi boonu u di dee sëmbë bi kë tapa wooko wan tu daka u go dini Jehovah. U di soni dë mbei a duwengi de u wooko möön taanga seei. Dee Isaëli sëmbë da Mosesi di hogi në taa hën mbei de ta du hogihati soni ku de sö. Di soni dë mbei taa Mosesi tjali seei. Ma Jehovah piki ën fu an booko hën hedi. Jehovah piki ën taa: ’Mi o mbei Falao disa dee sëmbë u mi go.’

Mosesi ku Alon go a Falao möön. Di pasi dë de du wan maaka. Alon tuwë di pau fëën a goon, hën a toon wan gaan sindeki. Ma dee könima u Falao seei tuwë dee pau u de a goon tu, hën de toon sindeki tu. Ma luku andi ta pasa! Di sindeki u Alon ta guli dee sindeki u dee könima. Ma tökuseei Falao an bi o disa dee Isaëli sëmbë u de go.

Awaa di juu dou u Jehovah lei Falao wan soni. I saanfa a bi du ën u? A tja 10 sitaafu nasö gaan fuka ko a Egepiti.

Baka sömëni u dee sitaafu dë, Falao manda kai Mosesi. A piki ën taa: ’Puu di sitaafu a u liba, nöö mi o disa Isaëli go.’ Ma te di sitaafu bi puu kaa, nöö Falao bi ta tooka pakisei baka. An bi ta disa dee sëmbë go. Ma te u kaba fëën, baka di u 10 sitaafu ufö Falao manda dee Isaëli sëmbë go.

I sabi hii dee 10 sitaafu ö? Bia di bladsëidë, nöö u sa lei soni u de.