Dee 10 sitaafu

LUKU dee peentje. Hiniwan u de ta lei u di sitaafu di Jehovah bi tja ko a dee Egepiti sëmbë liba. A di fosu peentje i ta si fa Alon naki Nëili lio ku di pau fëën. Di a naki di wata, hën di lio toon buuu. Dee fisi dëdë, hën di lio bigi ta tingi.

Baka di dë Jehovah mbei tödö kumutu a di Nëili lio. A hii së tödö bi dë u si. A dee onfu, a dee panu, ku dee bedi liba u dee sëmbë. A hii së seei. Di dee tödö ko dëdë, hën dee Egepiti sëmbë ba de ko zunta a sömëni kamian djou. Hën a fika taa di köndë ta tingi sösö dëdëdëdë tödö.

Baka di dë, Alon naki di goon ku di pau fëën, hën di goondoti toon mapia di ta buwa ta njan sëmbë. Dee mapia bi dë di u dii sitaafu di ko a Egepiti köndë.

Dee woto sitaafu bi dë da dee Egepiti sëmbë wanwan, dee Isaëli sëmbë an bi fii de. Di u fö sitaafu bi dë gaan gindi wënwën di bi ta buwa na a dokunu go a dee wosu u hii dee Egepiti sëmbë. Di u feifi sitaafu bi dë da dee mbeti. Gaansë u dee kau ku dee sikapu ku dee kaabita u dee Egepiti sëmbë bi dëdë.

Baka di dë, Mosesi ku Alon tei pikisö sindja, hën de jaa ën go a liba. Hën gaan boi kisi libisëmbë ku mbeti tuu. Disi bi dë di u sikisi sitaafu.

Bakaten Mosesi hopo hën maun go a liba, hën Jehovah mbei gaangadu ta bai gbalam gbalam, gaan giinta ta piki gililili, pisipisi ëisi ta kai a goon. Ëisi an bi kai hogi sö a Egepiti wan daka.

Di u aiti sitaafu bi dë taa gaan hia atiti bi ko a di köndë. Na wan daka a fesi nasö a baka, atiti bi hia sö a di köndë jeti. De njan hii soni di di ëisi an bi poi.

Di u nëigi sitaafu bi dë taa kamian bi dungu pii. Dii daka longi di köndë bi dungu, ma kamian an bi dungu ka dee Isaëli sëmbë bi ta libi.

Te u kaba fëën, Gadu piki dee sëmbë u de lobi di buuu u wan piki kaabita nasö wan piki sikapu a dee dööbuka pau u de. Hën di engel u Gadu pasa a Egepiti. Te di engel si di buuu, nöö an bi ta kii sëmbë u di wosu dë. Ma a hii dee wosu teka an bi si buuu a di dööbuka pau, di engel u Gadu bi ta kii di fosu pai mii u libisëmbë ku mbeti tuu. Di dë bi dë di u teni sitaafu.

Baka di lasiti sitaafu aki ufö Falao piki dee Isaëli sëmbë taa de sa go awaa. Dee sëmbë u Gadu bi dë kabakaba u go, nöö di ndeti dë seei de bigi hai kumutu a Egepiti köndë.