Wan tenti u begi Gadu

I SABI andi da di tenti aki ö? A dë wan apaiti tenti u begi Jehovah. Baka wan jaa di dee sëmbë kumutu a Egepiti köndë, hën de kaba mbei di tenti dë. I sabi ambë ko ku di pakisei u mbei di tenti ö?

Jehovah hën wë ko ku di pakisei dë. Di Mosesi bi dë a di kuun de kai Sinai, hën Jehovah bi piki ën fa a musu mbei di tenti. A piki ën taa a bi musu mbei a sö wan fasi taa de sa ta lusu ën pisipisi tja. A sö wan fasi de sa tja dee pisipisi fëën go seti a wan woto kamian baka. Fëën mbei te dee Isaëli sëmbë bi ta foloisi go a wan woto kamian a di sabana, nöö de bi ta tja di tenti u Gadu go ku de.

Te i luku go a di piki kamba dendu te a di baka gogo u di tenti, nöö i ta si wan këdë. Hën de ta kai di Këdë u di Buka. Tu engel di de ta kai kelupi-engel di mbei ku goutu bi dë a di këdë liba. Wan bi dë a di hedi së, nöö di wotowan bi dë a di futu së. Gadu bi sikifi dee teni wëti a dee tu paatapaata sitonu liba baka, biga Mosesi bi booko dee fosuwan. Nöö de bi tjubi dee sitonu aki a di Këdë dendu. Söseei de bi tjubi wan kan mana nëën dendu tu. I saandi da di mana jeti ö?

Di baaa u Mosesi de kai Alon, hën Jehovah bi buta kuma di Gaan Mindima. Hën bi ta heepi dee sëmbë u begi Jehovah. Nöö dee womi mii fëën seei da mindima tu.

Wë luku di möön gaan kamba u di tenti i si. A bigi tu pasi möön di piki kamba. I ta si di piki këdë ka sumuku ta kumutu ö? Hën da di begi tafa ka di mindima ta tjuma sumëë suti soni. Nöö naandë i ta si wan lampupau ku seibi lampu. Nöö di u dii soni a di kamba da wan tafa. Nëën liba de buta 12 pisi bëëë.

A di djai u di tenti i abi wan gaan paabi ku wata fuufuu. Ku ën dee mindima bi ta wasi. Söseei wan gaan begi tafa dë tu. Naandë de ta tjuma dee mbeti de bi kii u paka Jehovah. Di tenti u Gadu dë leti mindi u di kampu, nöö dee Isaëli sëmbë ta libi lontu ën.