Di köpö sindeki

DI SINDEKI lolulolu a di pau dë an ta djei wan tuutuu wan u? Ma na wan tuutuu sindeki e. De mbei ën ku köpö. Jehovah piki Mosesi faa buta di sindeki dë a di pau, sö taa dee sëmbë bi sa luku ën, nöö de tan a libi. Ma dee sindeki a goon dë da tuutuu sindeki. De njan dee sëmbë dë, nöö dee sëmbë ko siki. I sa’ faandi mbei ö?

Wë u di dee Isaëli sëmbë taki hogi u Gadu ku Mosesi. De kaagi taa: ’Faandi mbei i puu u a Egepiti tja u ko dëdë a di sabana aki? Soni u njan ku wata an dë aki. Wa ko a’ peesa u njan di mana aki möön.’

Ma di mana da bumbuu njanjan. A wan foombo fasi Jehovah bi da de ën. Nöö a sö wan fasi a bi da de wata tu. Ma dee sëmbë an bi tei ën u bigi taa Gadu bi sölugu de a sö wan fasi. Fëën mbei Jehovah manda dee taku sindeki aki go njan dee Isaëli sëmbë. Gaansë u de dëdë di dee sindeki njan de.

Te u kaba fëën dee sëmbë go piki Mosesi taa: ’U misi i oo, biga u taki hogi fii ku Jehovah. Nöö gaantangi, begi Jehovah da u be a mbei dee sindeki aki go.’

Hën Mosesi begi da dee sëmbë. Hën Jehovah piki Mosesi faa mbei di köpö sindeki i si dë. A piki ën be a butëën a wan pau, nöö hiniwan sëmbë di dee taku sindeki njan, musu luku di sindeki dë. Mosesi du leti kumafa Gadu piki ën. Nöö dee sëmbë di dee taku sindeki njan, luku di köpö sindeki, hën de ko bëtë baka.

U sa lei wan soni u di woto aki. Boo taa hii u tuu dë kuma dee Isaëli sëmbë di dee taku sindeki bi njan. Hii u tuu dë a dëdë ku libi maun. Te i tuwë wojo lontu ko kai, nöö i ta si taa sëmbë ta ko gaandi, ta siki, nöö de ta dëdë tu. Di soni aki ta pasa u di di fosu womi ku di fosu mujëë, Adam ku Eva, bia baka da Jehovah, nöö u tuu da miii u de. Ma Jehovah jabi pasi da u baka, sö taa u sa libi u teego.

Jehovah manda hën Womi Mii, Jesosi Keesitu, ko a goonliba. De bi hëngi Jesosi a wan pau, u di sömëni sëmbë bi mëni taa a bi hogi. Ma Jehovah manda Jesosi ko u ko puu u a dëdë basu. Ee u ta luku go nëën, dati wan taki ee u ta waka nëën baka, nöö u sa feni di libi u teego. Ma bakaten woo lei möön hia soni u Jesosi.