Wan buliki ta fan

I BI jei kaa taa wan buliki ta fan u? Sonte joo taki taa: ’Nönö, mbeti an ta fan.’ Ma di Bëibel ta taki u wan buliki di bi fan. Boo go luku unfa di soni dë bi pasa.

A fika piki, nöö dee Isaëli sëmbë bi o dou a di köndë Kaana. Ma Balaki, di könu u Moab bi ta fëëë dee Isaëli sëmbë. Fëën mbei a manda wan köni womi de kai Biliam faa go siba dee Isaëli sëmbë. Balaki paamusi Biliam taa a o dëën hia möni. Fëën mbei Biliam djombo subi nëën buliki liba tei pasi nango luku Balaki.

Ma Jehovah an bi kë taa Biliam siba dee sëmbë fëën. Fëën mbei a manda wan engel ku wan langa feti ufangi faa go tapa pasi da Biliam. Biliam an bi sa si di engel, ma di buliki bi sa si ën. Hën di buliki ta biinga u koti pasa da di engel te a wei, hën a kandi fëën a goon dë. Biliam hati boonu seei te a ta naki di buliki ku wan pau.

Hën Jehovah mbei Biliam jei di buliki ta fan ku ën. Di buliki hakisi ën taa: ’Andi mi du ku i fii ta naki mi sö?’

Hën Biliam piki di buliki taa: ’I mbei sëmbë ta si mi kuma lauma. Ee mi bi a’ wan ufangi, mi bi o kii i!’

Di buliki piki Biliam taa: ’Mi du sö ku i wan daka u?’

Biliam taa: ’Nönö.’

Hën Jehovah mbei Biliam si di engel taanputaanpu ku ën ufangi a di pasi liba. Di engel hakisi Biliam taa: ’Faandi mbei i fon di buliki fii? Mi ko tapa pasi da i, biga ja musu go siba dee Isaëli sëmbë. Ee di buliki fii an bi koti pasi da mi, mi bi o kii i. Ma më bi o du soni ku di buliki fii.’

Hën Biliam taa: ’Mi du hogi. Më bi sabi taa i bi dë taanputaanpu a di pasi liba.’ Hën di engel mbei Biliam pasa go fëën go luku Balaki. Biliam pooba jeti u siba dee Isaëli sëmbë, ma ka faa pasa sö, Jehovah mbei a wensi bunu dii pasi da de.