Jesosi ta ko kuma könu

NA LONGI baka di Jesosi kula dee tu bookowojoma, hën a go a wan piki köndë di dë zuntu ku Jelusalen. A piki tu u dee bakama fëën taa: ’Womi, un go a di köndë, nöö woon si wan njönku buliki taitai. Nöö un lusu ën tja ko da mi.’

Di de tja di buliki ko da Jesosi, hën a subi nëën liba. Hën a go ku ën a Jelusalen di dë zuntu naandë. Di a dou zuntu ku di foto, hën wanlö hia sëmbë ta waka ta ko miti ën. Gaansë u de puu dee koosu u de jabi a di pasi liba. Wotowan koti palo maun ta tuwë a di pasi. Nöö de ta bai taa: ’Gadu musu dë ku di könu di ta ko a di në u Jehovah!’

Gaanduwe kaa a Isaëli dee njunjun könu bi ta waka a buliki liba ta denda a Jelusalen u mbei sëmbë si de. Di soni dë Jesosi ta du aki. Nöö dee sëmbë aki ta lei Jesosi taa de kë a dë könu u de. Ma na hii sëmbë kë Jesosi dë könu. Faandi mbei u taki sö? Wë u di soni di pasa di Jesosi go a di Wosu u Gadu.

Di Jesosi go a di Wosu u Gadu, a kula dee bookowojoma ku dee lanma. Nöö di dee piki mii si sö kaa, hën de ta bai ta gafa Jesosi. Ma di soni dë mbei hati u dee begima ko boonu. Hën de taki da Jesosi taa: ’Ja ta jei andi dee mii ta taki nö?’

Hën Jesosi piki de taa: ’Awa, mi ta jei. Ma nöö wan bi lesi a di Bëibel taa: „Gadu ta buta dee piki mii u de gafëën u?”’ Fëën mbei dee mii ta gafa di könu u Gadu nango nöömö.

U kë dë kuma dee mii dë, na sö nö? So sëmbë o kë tapa u fu wa konda soni u di könuköndë u Gadu möön. Ma woo ta konda nöömö da dee sëmbë un waiti soni Jesosi o du da libisëmbë.

Di Jesosi bi dë a goonliba, di juu an bi dou jeti faa bigi tii kuma könu. Na un ten di juu dë o dou? Dee bakama u Jesosi bi kë sabi di soni dë. Woo lesi u di dë a di woto di ta ko.