Dee peni u Jelikou

UNFA a du ko taa dee peni u Jelikou booko kai? A djei kuma wan gaan bömu piki booko de. Ma a di ten dë de an bi a’ bömu, de an bi a’ goni seei tu. Wan woto foombo soni Jehovah du aki! Boo luku unfa di soni aki pasa.

Haika andi Jehovah piki Josua. A piki ën taa: ’Ju ku dee fetima fii musu waka lontu di foto. Un musu waka lontu ën wan pasi wan daka, sikisi daka longi. Un musu tja di Këdë u di Buka go ku unu. Seibi mindima musu waka nëën fesi, nöö de musu böö dee tutu u de.

’A di u seibi daka un musu waka lontu di foto seibi pasi. Baka di dë, un musu böö dee tutu taanga, nöö hii sëmbë musu kai wan gaan wolo kuma te sodati nango a feti. Nöö dee peni o booko kai holou!’

Josua ku dee sëmbë du andi Jehovah piki de. Te de ta waka lontu, nöö hii sëmbë ta dë piii. Na wan sëmbë ta fan. Dee tutu ku dee futu nöö i bi sa jei. A bi musu u dë sö taa dee felantima u dee sëmbë u Gadu a Jelikou bi ta fëëë seei. I ta si di bë tatai hëngihëngi a di fënsë buka u? Ambë fënsë buka di dë? U Lakabu wë! A du leti kumafa dee tu womi bi piki ën. Hii dee famii fëën dë ku ën a di wosu dendu ta wakiti andi o pasa.

Te u kaba fëën, a di u seibi daka baka di de waka lontu di foto seibi pasi, dee tutu piki, dee fetima kai wolo, hën dee peni booko kai holou. Hën Josua taa: ’Un kii hii sëmbë a di foto, nöö un tjumëën. Un tjuma hii soni. Di soofu, di goutu, di köpö ku di felu nöö un sa tjubi, nöö un tja de go buta a di möni këdë u di tenti u Jehovah.’

Josua piki dee tu womi dee bi go luku di köndë taa: ’Un go a di wosu u Lakabu, nöö un tjëën ku hii hën famii ko a döö.’ Lakabu ku hën famii tan a libi leti kumafa dee womi bi paamusi ën.