Lakabu ta tjubi tu womi

SONI miti dee womi aki. De musu kule ee nasö de o kii de. Dee womi aki da Isaëli sëmbë di go luku di köndë, nöö di mujëë di ta heepi de da Lakabu. Lakabu ta libi a wan wosu di nama ku di peni u di foto Jelikou. Boo go luku faandi mbei soni miti dee womi aki.

Dee Isaëli sëmbë dë kabakaba u aba Joodan Lio u denda go a di köndë Kaana. Ma ufö de du sö, Josua manda tu womi go luku di köndë. A piki de taa: ’Un go luku fa di köndë ku di foto Jelikou tan.’

Di dee womi dou a Jelikou, hën de go a di wosu u Lakabu. Ma wan sëmbë piki di könu u Jelikou taa: ’Tu Isaëli womi ko aki a di ndeti u luku di köndë.’ Di di könu jei di soni aki, a manda womi go a Lakabu wosu, hën de piki Lakabu taa: ’Puu dee womi dee dë a i wosu dendu tja ko a döö!’ Ma Lakabu bi tjubi dee womi a liba u di wosu fëën. Di soni dë mbei a taki taa: ’Wan tu womi bi ko a mi wosu tuu, ma më sa’ naasë de kumutu ko aki. De go di kamian bigi ta dungu, ufö de tapa di gaandöö u di köndë. Ee un biinga un sa kisi de jeti!’ Nöö sö dee womi hai go a de baka.

Baka di de go, hën Lakabu kule go a liba u di wosu fëën. A piki dee womi taa: ’Mi sabi taa Jehovah o da unu di köndë. U jei fa a dëë di wata u di Bë Ze di un kumutu a Egepiti köndë, nöö u jei fa a kii könu Sijön ku könu Oku. Mi libi bunu ku unu, nöö gaantangi, un paamusi mi taa woon libi bunu ku mi tu. Un tjubi mi mama ku mi tata, ku dee baaa ku sisa u mi.’

Dee womi paamusi Lakabu taa de o du sö, ma Lakabu musu du wan soni. De piki ën taa: ’Tei di bë tatai aki, nöö tai ën a di fënsë buka fii, nöö tja hii dee famii fii ko makandi ku i a di wosu fii. Nöö te woo ko baka u tei Jelikou, woo si di tatai aki a di fënsë buka fii, nöö wa o kii na wan sëmbë a di wosu dendu fii.’ Di dee womi toona go a Josua, hën de konda hii soni di pasa dëën.