Dee köni Gibion sëmbë

SÖMËNI u dee foto u Kaana tei seeka u hopo go feti ku Isaëli. De mëni taa de sa wini de. Ma dee sëmbë u di foto Gibion di bi dë möön zuntu an bi ta pakisei sö. De ta biibi taa Gadu hën ta heepi dee Isaëli sëmbë, nöö de an kë feti ku Gadu. I saandi dee Gibion sëmbë du ö?

De fiti buka taa de o du kuma de kumutu a wan gaan longi köndë. Fëën mbei so u dee womi bisi tënëtënë koosu ku bookobooko susu. Hën de lai soni a gaandigaandi saku buta a de buliki liba, nöö de tei awoo dëëdëë bëëë tja tu. De go a Josua, hën de piki ën taa: ’U kumutu a wan gaan longi köndë ko aki, biga u jei soni u di gaan Gadu fii, Jehovah. U jei hii dee soni a du da unu a Egepiti. Fëën mbei dee fesima fuu piki u fuu seeka njanjan, nöö u ko piki i taa: „U da futuboi fii. Paamusi u taa ja o feti ku u.” Luku fa dee koosu fuu tënë, nöö luku fa dee bëëë fuu ko dëë gaandi, u di u kumutu a longi seei.’

Josua ku dee woto fesima biibi dee Gibion sëmbë. Fëën mbei de paamusi de taa de an o feti ku de. Ma dii daka baka di dë, de ko jei taa dee Gibion sëmbë ta libi zuntu ku de.

’Faandi mbei un piki u taa un ta libi a wan longi köndë?’ Sö wë Josua hakisi de.

Dee Gibion sëmbë piki ën taa: ’U du sö u di u jei taa di Gadu fii, Jehovah, paamusi unu taa a o da unu hii di köndë Kaana. Fëën mbei u bi fëëë taa i bi o kii u.’ Ma dee Isaëli sëmbë hoi de seei a di buka de bi mbei taa de an o kii dee Gibion sëmbë. Ma de mbei de toon futuboi u de.

Di könu u Jelusalen hati boonu seei, u di dee Gibion sëmbë mbei fii ku Isaëli. Fëën mbei a piki dee woto könu taa: ’Un ko heepi mi feti ku Gibion.’ Leti sö dee feifi könu du tu. U di dee Gibion sëmbë mbei fii ku Isaëli, mbei dee könu dë go feti ku de. Ma wan köni soni dee Gibion sëmbë du dë u? Wë woo si.