Di sonu taanpu pii

LUKU andi Josua ta du. A ta bai taa: ’Sonu ee, na saka ooo!’ Di sonu an saka tu. A taanpu tololoo a liba hii di daka. Jehovah hën mbei di soni dë pasa! Ma boo go luku faandi mbei Josua kë taa di sonu tan tuwë limbo.

Di dee feifi könu u Kaana bigi feti ku dee Gibion sëmbë, hën dee Gibion sëmbë manda wan womi go hakisi Josua faa ko heepi de. Di womi piki Josua taa: ’Ko a u hesihesi ooo! Ko heepi u! Hii dee könu u dee kuun kamian ko feti ku dee futuboi fii.’

Wantewante Josua ku dee fetima fëën hai go. De waka hii di ndeti. Di de dou a Gibion, dee sodati u dee feifi könu fëëë tee taa de bigi kule go. Hën Jehovah mbei logologo pisi ëisi kai kumutu a liba kii dee sodati. Dee ëisi kii möön hia sodati möön dee dee fetima u Josua kii.

Josua si taa di sonu o saka. Kamian o ko dungu, nöö dee sodati u dee feifi hogi könu o kule go. Fëën mbei Josua begi Jehovah, hën a taa: ’Sonu ee, na saka ooo!’ Nöö u di di sonu tan fëën ta tuwë limbo, mbei dee Isaëli sëmbë bi sa wini di feti.

Möön hia könu dë a Kaana jeti di ta buuse dee sëmbë u Gadu. Sikisi jaa longi a tei u Josua ku dee fetima fëën wini 31 könu u di köndë. Di de kaba, hën Josua seeka soni u de paati di köndë Kaana da dee lö dee abi kamian fanöudu jeti.

Sömëni jaa ta pasa, nöö te u kaba fëën Josua dëdë di a bi a’ 110 jaa. Di Josua ku dee mati fëën bi dë a libi jeti, dee sëmbë bi ta haika Jehovah. Ma di dee bunu womi aki dëdë, dee sëmbë bigi du hogi, nöö soni miti de tu. Nöö awaa de a’ Gadu fanöudu tuutuu.