Di paamusi u Jefita

I MBEI wan paamusi wan daka di bi taanga da i u hoi bakaten u? Di soni dë hën miti di womi a di peentje aki, nöö hën mbei a ta tjali sö. Di womi aki de kai Jefita. A dë wan kuutuma u Isaëli di a’ degihati.

Jefita bi ta libi a wan pisiten di dee Isaëli sëmbë an bi ta dini Jehovah möön. De bia ta du hogi soni baka. Fëën mbei Jehovah disa dee Amon sëmbë pena de. Di soni aki mbei dee Isaëli sëmbë këë pena da Jehovah taa: ’U misi i ooo, u misi i. Gaantangi heepi u!’

Dee sëmbë ta tjali u dee hogi soni de du. Fëën mbei de bigi dini Jehovah baka, u lei taa de ta tjali u dee hogidu u de. Nöö hën mbei Jehovah heepi de baka tu.

Dee sëmbë buta Jefita kuma fesima u feti ku dee hogihati Amon sëmbë. Jefita kë seei taa Jehovah heepi ën ku di feti. Fëën mbei a paamusi Jehovah taa: ’Ee i mbei mi wini dee Amon sëmbë, nöö di fosu sëmbë di o kumutu a mi wosu waka ko miti mi te mi toona ko baka, hën mi o da i.’

Jehovah haika di paamusi u Jefita, hën a heepi ën u wini di feti. I sabi ambë da di fosu sëmbë di waka ko miti Jefita di a kumutu a di feti ö? Wë di mujëë mii fëën, di wan kodo mii fëën. Jefita bai këë taa: ’Maingë di mii u mi nö! Di soni aki tjali da mi poi. Ma mi paamusi Jehovah wan soni, nöö më sa puu buka.’

Di di mujëë mii u Jefita jei andi hën tata bi paamusi Gadu, nöö bigibigi a bi tjali tu. Biga a bi musu go disa hën tata ku dee mati fëën. Ma a dë kabakaba u go dini Jehovah a di tenti fëën a Silo, hii ën libi longi. Fëën mbei a piki ën tata taa: ’Ee i paamusi Jehovah wan soni, nöö i musu hoi di buka i mbei.’

Sö wë di mujëë mii u Jefita go fëën a Silo, nöö a dini Jehovah a di tenti fëën hii ën libi longi. Fö pasi wan jaa dee Isaëli mujëë nango luku ën, nöö de ta piizii makandi. Dee sëmbë lobi di mujëë mii u Jefita, biga a ta dini Jehovah bumbuu.