A bi mbei hën tata ku Jehovah hati piizii

I ta si di mujëë mii a di peentje aki ö?— Hën da di mujëë mii u di womi de ta kai Jefita. Di Bëibel an kai di mujëë mii aki në, ma a bi mbei hën tata ku Jehovah hati piizii. Boo go luku möön soni u di mujëë mii aki ku hën tata Jefita.

Jefita bi dë wan bunuhati womi, nöö a bi ta tei ten u lei di mujëë mii fëën soni u Jehovah. A bi dë wan taanga womi ku wan bunu sëmbë di bi ta tei fesi. Fëën mbei dee Isaëli sëmbë hakisi ën faa tei fesi a di feti di de o go feti ku dee felantima u de.

Jefita bi begi Gadu faa heepi ën u wini di feti. Jefita bi paamusi Jehovah taa ee a wini di feti, a o dëën di fosu sëmbë fëën wosudendu di o waka ko miti ën te a kumutu a di feti. Di sëmbë aki bi o libi a di tenti u Gadu, nöö a bi o wooko naandë hii hën libi longi. Wë, Jefita wini di feti! I sabi ambë fëën wosudendu kule ko miti ën a pasi di a toona ko a wosu ö?—

Aai, di mujëë mii fëën! Hën wanwan tö nöö a bi abi kuma miii. Ma nöö Jefita bi musu u mandëën go a di tenti u Gadu. Di soni aki bi mbei taa a bi ta tjali seei. Ma na fëëkëtë andi a bi paamusi Jehovah. Wantewante di mujëë mii fëën piki ën taa: ’Taata o, i bi paamusi Jehovah wan soni, nöö i musu du andi i paamusi.’

Di mujëë mii u Jefita seei bi ta tjali tu. An bi o sa tööu te a bi o go libi a di tenti u Gadu, nöö an bi o sa pai miii tu. Ma a bi kë heepi hën tata u hoi hënseei a di soni di a bi paamusi Jehovah, söseei a bi kë u Jehovah wai ku ën. Di soni aki bi dë di möön fanöudu soni dëën möön tööu nasö pai miii. Sö wë a foloisi go ta libi a di tenti u Gadu hii hën libi longi.

I pakisei taa di soni di a du dë mbei hën tata ku Jehovah hati piizii ö?— Aai! I musu ta haika i mama ku i tata, nöö i musu lobi Jehovah, kuma di mujëë mii u Jefita. Iseei sa mbei i mama ku i tata hati piizii, söseei i sa mbei Jehovah hati piizii tu.