Di soni mbei Dafiti musu fusi

BAKA DI Dafiti kii Goliati, hën di hedima u dee sodati u Isaëli, Abineli, tjëën go a Saulosu. Saulosu wai seei ku Dafiti. A mbei a toon hedima u dee sodati fëën, nöö a mbei a ko libi a di könu wosu fëën.

Bakaten di dee sodati toona ko u di feti de bi go feti ku dee Filisiti sëmbë, hën dee mujëë tuwë wan kanda taa: ’Saulosu kii dusudusu, ma Dafiti kii teni dusu.’ Di soni dë mbei Saulosu djalusu, biga de bigi Dafiti möön Saulosu. Ma di womi mii u Saulosu, Jonatan, an bi haun ku Dafiti. A lobi Dafiti seei, nöö Dafiti lobi ën tu. Fëën mbei de mbei buka ku deseei taa de o dë mati hii juu.

Dafiti sa’ u pëë benta bumbuu, nöö Saulosu lobi di poku di a ta pëë. Ma wan daka, di haun Saulosu ta haun ku Dafiti, mbei taa a du wan hogi. Di Dafiti ta pëë di benta, hën Saulosu tei di lanza vinde da Dafiti. A taa: ’Mi o peka Dafiti a di wosu sinkii aki!’ Ma Dafiti doki dëën, hën di lanza misi ën. Bakaten Saulosu misi Dafiti ku di lanza fëën möön. Fëën mbei Dafiti ko sabi taa a musu köni ku ënseei.

I saandi Saulosu bi paamusi jeti ö? A bi taki taa a bi o da di mujëë mii fëën a di womi di kii Goliati. Te u kaba fëën Saulosu taki da Dafiti taa a sa dëën di mujëë mii fëën, Mikali, ma a musu kii 100 Filisiti sëmbë ufö. Pakisei pikisö! Saulosu dë ku di mëni seei taa dee Filisiti sëmbë o kii Dafiti. Ma an pasa sö, nöö fëën mbei Saulosu da Dafiti di mujëë mii fëën.

Wan daka Saulosu piki Jonatan ku hii dee futuboi fëën taa a kë kii Dafiti. Ma Jonatan piki hën tata taa: ’Na du soni ku Dafiti e. An du hogi ku i wan daka. Ma hii soni a du, bi dë u heepi i. An bi fëëë u dëdë di a kii Goliati, nöö di i si sö, i bi wai.’

Saulosu haika di womi mii fëën, nöö a paamusi taa an o du hogi ku Dafiti. De tja Dafiti ko baka, hën a ta dini Saulosu baka nëën wosu leti kumafa a bi naa. Ma wan daka di Dafiti ta pëë poku, hën Saulosu vinde di lanza fëën da Dafiti möön. Dafiti doki hedi, hën di lanza go peka a di wosu sinkii. Disi da di u dii toon! Dafiti ko fusutan awaa taa a musu fusi!

Di ndeti dë Dafiti go a di fëën seei wosu. Ma Saulosu manda wan tu womi u de go kii ën. Mikali sabi andi hën tata kë du. Fëën mbei a piki ën manu taa: ’Ee ja go di ndeti aki, dëdëdëdë woo si i amanjan.’ Di ndeti dë Mikali heepi Dafiti faa pasa a wan fënsë go. Söwan seibi jaa longi Dafiti musu tjubi a kamiankamian u Saulosu an feni ën kisi.