Dafiti toon könu

SAULOSU ta biinga u kisi Dafiti baka. A tei 3000 u dee möön bunu sodati fëën, hën de go suku Dafiti. Di Dafiti ko sabi sö kaa, hën a manda sëmbë go luku ka Saulosu ku dee womi fëën seti kampu di ndeti dë. Hën Dafiti hakisi tu u dee womi fëën: ’Undi fuunu o ko ku mi a di kampu u Saulosu?’

Hën Abisai piki: ’Mi o go ku i!’ Abisai da di womi mii u Dafiti sisa, Seluja. Di Saulosu ku dee womi fëën dë ta duumi, hën Dafiti ku Abisai hai suuu go a di kampu. De tei di lanza ku di djogu u Saulosu di bi dë leti a Saulosu hedi bandja. Na wan sëmbë si de nasö jei de, biga hii de tuu duumi fundu.

Luku Dafiti ku Abisai aki! De hai go baka, hën de go dë u de pii a di kuun hedi. Hën Dafiti bai kai di hedima u dee sodati u Isaëli: ’Abineli, faandi mbei ja ta luku di masa fii, di könu? Luku! Naasë di lanza ku di djogu fëën dë?’

Hën Saulosu ko weki. A ko sabi taa Dafiti töngö di dë, hën a hakisi ën taa: ’Ju di dë u, Dafiti?’ I ta si Saulosu ku Abineli a basu dë u?

Hën Dafiti piki Saulosu taa: ’Mi ooo, könu.’ Nöö Dafiti hakisi ën taa: ’Faandi mbei i ta biinga u kisi mi sö? Un hogi mi du? Luku di lanza fii aki, könu. Be wan u dee womi fii ko tei ën da i.’

Hën Saulosu piki: ’Mi du hogi. Mi du wan don soni.’ Baka di dë, Dafiti tei pasi go fëën, hën Saulosu toona go a wosu. Ma Dafiti taki nëën hati taa: ’Wan u dee daka aki Saulosu o kii mi. Mi musu fusi go a dee Filisiti sëmbë köndë.’ Nöö sö a du. Dafiti feni dee Filisiti sëmbë ganjan, hën a mbei de biibi taa a dë a de së.

Baka wan pisiten dee Filisiti sëmbë hai go feti ku dee Isaëli sëmbë. Saulosu ku Jonatan tuu dëdë a di feti. Di soni dë mbei Dafiti tjali seei. Nöö a sikifi wan suti kanda, ka a kanda taa: ’Tjali fii kisi mi o, mi baaa Jonatan. Mi bi lobi i seei, baa!’

Baka di dë Dafiti toona go a Isaëli a di foto Hebelön. Dee womi dee tei di womi mii u Saulosu, Isibosëti, u dë könu u de, feti ku dee womi dee kë Dafiti dë könu u de. Ma te u kaba fëën, dee womi u Dafiti wini di feti. Dafiti bi a’ 30 jaa di a toon könu. Seibi jaa ku hafu a tii a Hebelön. Naandë a pai wan tu u dee womi mii fëën de kai Aminön, Abisalöm ku Adonia.

Di juu dou awaa taa Dafiti ku dee womi fëën o go tei wan hanse foto de kai Jelusalen. Joab, wan woto womi mii u Dafiti sisa, Seluja, hopo tei fesi a di feti. Fëën mbei Dafiti pakëën, u di a mbei a toon hedima u dee sodati fëën. Awaa Dafiti bigi tii a di foto Jelusalen.