Salumon mbei di Wosu u Gadu

BIFÖ Dafiti dëdë, a lei Salumon unfa Gadu piki ën faa mbei di Wosu u Jehovah. Salumon bigi mbei di Wosu u Gadu a di u fö jaa u di tii fëën. A tei seibi jaa ku hafu u kabëën. Dusudusu womi ta wooko a di Wosu, nöö di wooko hakisi gaan hia möni seei, u di de wooko ku hia goutu ku hia soofu.

Di Wosu u Gadu abi tu gaan kamba leti kumafa di tenti u Gadu bi dë. Ma dee tu kamba dë bigi tu toon möön dee kamba u di tenti u Gadu. Salumon tja di Këdë u di Buka go buta a di bakasë kamba u di Wosu u Gadu, nöö a di woto kamba de buta dee woto soni de bi tjubi a di tenti u Gadu.

Di de kaba mbei di Wosu u Gadu, hën de hoi wan gaan piizii. Salumon tjökö kini a goon, hën a begi, kumafa i ta si a di peentje. Salumon piki Jehovah taa: ’Mundu seei an bigi tjika u hoi i, nöö unfa di Wosu aki o sa hoi i. Ma Gadu o, gaantangi mi begi i, haika dee sëmbë fii te de ta luku ko a di së aki ta begi i.’

Di Salumon kaba begi, hën faja saka kumutu a liba ko tjuma dee mbeti dee sëmbë bi tja ko u tjuma paka paima. Nöö Jehovah bi mbei wan gaan limbo ko tapa di Wosu fëën. Di soni aki ta lei taa Jehovah ta haika, nöö a wai ku di Wosu, nöö di begi u Salumon kai ku ën tu. Nöö di Wosu u Gadu ko dë di kamian ka dee sëmbë nango begi, de an nango begi a di tenti u Gadu möön.

Salumon tii longi a wan köni fasi, nöö dee sëmbë wai ku ën tu. Ma Salumon toou ku hia mujëë u woto köndë di an ta dini Jehovah. I ta si fa wan u de ta dini di pindi ö? Te u kaba fëën dee mujëë u Salumon mbei a go dini taku gadu tu. I saandi pasa di Salumon du di soni dë u? Wë an bi ta libi suti ku dee sëmbë möön. A ko ta du hogihati soni, nöö dee sëmbë an bi ta wai ku ën möön.

Di soni dë mbei Jehovah hati ko boonu ku Salumon, hën a piki ën taa: ’Mi o puu di könuköndë a i maun dendu, nöö mi o da wan woto womi ën. Ma o du ën a di ten fii aki, ma te di womi mii fii o tii. Ma më o tei hii dee sëmbë u di könuköndë puu a di womi mii fii maun dendu.’ Boo go luku unfa di soni dë pasa.