Di köni könu Salumon

SALUMON bi dë wan njönku kijoo di a toon könu. A lobi Jehovah, nöö a ta libi ku dee bunu soni hën tata Dafiti bi konda dëën. Jehovah lobi Salumon, nöö fëën mbei wan ndeti a hakisi ën a wan sunjan taa: ’Salumon o, andi i kë mi da i?’

Salumon piki taa: ’Jehovah mi Gadu, mi njönku jeti baa, nöö më sa’ unfa mi musu tii. Wë nöö da mi köni be mi tii dee sëmbë fii a wan bunu fasi.’

Di soni Salumon hakisi Jehovah kai ku ën. Fëën mbei a piki ën taa: ’U di i hakisi mi u mi da i köni, ma ja hakisi langa libi nasö gudu, mbei mi o da i möön köni di sëmbë an feni wan daka. Ma mi o da i söseei soni di ja hakisi, gudu ku nëbai tuu.’

An tei longi ufö tu mujëë ko a Salumon ku wan gaan fuka. Wan u de taa: ’Mi ku di mujëë aki ta libi a di wan wosu. Mi pai wan womi mii, hën baka tu daka di mujëë aki seei pai wan womi mii tu. Te wan ndeti, hën di u fëën mii ko dëdë. Ma mi bi ta duumi, hën a tja di dëdëdëdë mii fëën ko buta a mi bandja, hën a tei di u mi mii. Di mi weki, mi luku di mii te mi kaba, hën mi si taa na di u mi mii di dë.’

Hën di woto mujëë piki taa: ’Na tuu e! Di libilibi mii da u mi, nöö di dëdëdëdë wan da u fëën!’ Di fosu mujëë bai taa: ’Na tuu! Di dëdëdëdë mii da u fii, di libilibi wan da u mi!’ Sö dee mujëë ta buja nango nöömö. Andi Salumon o du?

A manda sëmbë go tei wan ufangi tja ko. Di de ko ku di ufangi, hën a taa: ’Koti di libilibi mii a tu pisi, nöö da hiniwan u dee mujëë wan pisi.’

Di tuutuu mama bai taa: ’Nönö ooo! Gaantangi na kii di mii. Dëën di mii nöö!’ Ma di woto mujëë piki taa: ’Na da na wan fuu di mii, koti go, koti ën a tu pisi puu dë.’

Te u kaba fëën Salumon piki taa: ’Na kii di mii! Da di fosu mama di mii. Hën da di tuutuu mama.’ Salumon bi sabi di soni aki, biga di tuutuu mama lobi di mii seei taa a dë kabakaba u da di woto mujëë di mii u de an kii ën. Di dee sëmbë jei fa Salumon koti di taki, hën de wai seei taa de a’ sö wan köni könu.

A di pisiten di Salumon bi ta tii, Gadu bi ta da dee sëmbë hia bunu. A bi mbei taa alisi, doloifi, figa ku sömëni woto soni ta göö hia seei. Dee sëmbë bi ta bisi bumbuu koosu, nöö de bi ta libi a bumbuu wosu. Hii sëmbë bi ta feni soni pasa maaka.