Wan womi di an ta fëëë

LUKU fa dee sëmbë ta mbei di njönku kijoo aki fa. I sabi ambë dëën u? Hën da Jelemia. A dë wan gaan tjabukama u Gadu.

Wantewante baka di Könu Josia bigi booko dee pindi puu a di köndë, hën Jehovah piki Jelemia u dë tjabukama fëën. Ma Jelemia bi pakisei taa a njönku poi u dë wan tjabukama. Ma nöö Jehovah piki ën taa a o heepi ën.

Jelemia piki dee Isaëli sëmbë u kaba ku dee hogi de ta du. A piki de taa: ’Dee gadu dee nasiön sëmbë ta begi da taku gadu.’ Ma tökuseei gaansë u dee Isaëli sëmbë kë dini dee pindi ka u de dini di tuutuu Gadu Jehovah. Di Jelemia piki dee sëmbë taa Jehovah o sitaafu de u dee hogi de ta du, de bi ta lafu ën.

Dee jaa ta pasa këdë. Josia ko dëdë, nöö dii liba baka di dë hën di womi mii fëën, Jojakim toon könu. Jelemia ta konda da dee sëmbë nöömö taa: ’Jelusalen o booko ee wan disa dee hogilibi fuunu. Dee gaan mindima kisi Jelemia panjan gbaa, hën de bai taa: ’De musu kii i u dee soni i taki aki.’ Hën de piki dee könu womi mii u Isaëli taa: ’Jelemia musu dëdë, biga a taki hogi u di köndë.’

Andi Jelemia o du möön? An pena fëëë seei! A piki hii de tuu taa: ’Jehovah hën manda mi u mi konda dee soni aki da unu. Ee wan tapa ku dee hogi libi fuunu, Jehovah o booko Jelusalen. Ma un musu sabi taa: Ee un kii mi, hën da un kii wan womi di an du na wan hogi.’

Dee könu womi mii an kii Jelemia, ma dee Isaëli sëmbë an disa dee hogi libi u de. Bakaten Nebukatnesali, di könu u Babilon, go feti ku Jelusalen. Te u kaba fëën Nebukatnesali mbei dee Isaëli sëmbë toon futuboi fëën. A tei dusudusu u de tja go a Babilon. Unfa i bi o feni ën ee wan sëmbë di ja sabi ko tei i puu a i köndë tja go a wan köndë di ja sabi?