Jelemia bi ta konda soni u Jehovah go dou

So juu sëmbë ta mbei u fa nasö hati u de ta boonu ku u te u ta konda soni u Jehovah da de. Di soni aki sa mbei taa wa kë konda soni u Jehovah möön. I fii sö wan daka kaa u?— A di Bëibel i abi wan woto u wan njönku kijoo de kai Jelemia di bi lobi Jehovah. Ma wan pisiten, an bi kë konda soni u Jehovah möön. Boo go luku andi bi miti Jelemia.

Di Jelemia bi dë wan njönku kijoo, hën Jehovah bi piki ën taa a bi musu go bai dee sëmbë u de disa dee hogi soni di de bi ta du. Di soni aki bi dë wan taanga soni da Jelemia, nöö a bi ta fëëë. Hën a piki Jehovah taa: ’Ma saandi mi musu taki. Mi da wan piki womi mii jeti.’ Ma Jehovah piki ën taa: ’Na fëëë. Mi o heepi i.’

Hën Jelemia bai dee sëmbë taa ee de an disa dee hogi soni de ta du, nöö Gadu o sitaafu de. I si kuma dee sëmbë bi haika Jelemia u?— Nönö, de bi ta mbei ën fa, nöö so juu hati u de bi ta boonu ku ën gaanfa seei. So sëmbë bi kë kii ën tu! Unfa i si kuma Jelemia bi ta fii?— A bi ta fëëë, nöö fëën mbei a taki taa: ’Ma o konda soni u Jehovah möön.’ Ma a disa tuutuu ö?— Nönö, an disa. A bi lobi Jehovah sö tee an bi sa dë, nöö an konda soni fëën da sëmbë. Jehovah bi tjubi Jelemia u di a ta konda soni fëën go dou.

Wan daka, wanlö takuhati womi bi tuwë Jelemia go a wan fundu baaku ku pötöpötö. An bi abi soni u njan, nöö an bi abi wata u bebe tu. Dee womi aki bi kë disa Jelemia naandë faa dëdë. Ma Jehovah bi heepi ën faa bi sa kumutu a di baaku!

Andi u sa lei a di woto u Jelemia?— Wë u ta lei taa hii fa Jelemia bi ta fëëë, tökuseei a bi ta konda soni u Jehovah go dou. Te i ta konda soni u Jehovah, nöö a sa pasa taa sëmbë o ta mbei i fa nasö hati u de o ta boonu ku i. Kandë sen o ta kisi i nasö kandë joo ta fëëë. Ma i musu ta konda soni u Jehovah go dou. A o heepi i hii juu, leti kumafa a bi heepi Jelemia.