De an bi kë bendi hedi

I SABI dee dii njönku kijoo aki jeti ö? Aai, de da dee mati u Daniëli dee an bi kë njan soni di an bunu da de. Dee Babilon sëmbë ta kai de Sadaki, Mësaki, ku Abetineko. Ma luku de nöunöu. Faandi mbei de an ta bendi hedi da di gaan pindi dë, kumafa dee woto sëmbë ta du? Boo go luku faandi mbei.

I sabi dee wëti Jehovah seei bi sikifi ö, dee Teni Wëti? Di fosuwan da: ’Ja musu begi na wan woto gadu boiti mi.’ Dee njönku kijoo aki ta hoi de seei a di wëti aki, hii fa a taanga da de seei.

Nebukatnesali, di könu u Babilon kai sömëni heihei sëmbë u ko da gaandi a di pindi di a mbei. Djunsu dë a kaba piki hii dee sëmbë taa: ’Te un jei dee tutu, dee benta ku dee woto poku lai ta piki, nöö un musu bendi hedi begi di goutu pindi aki. Di sëmbë di an o bendi hedi begi ën, de o tuwëën go wantewante a di kendikendi onfu dendu.’

Di Nebukatnesali jei taa Sadaki, Mësaki ku Abetineko an bendi hedi da di pindi, hati fëën boonu seei. A mbei de tja de ko nëën. Hën a da de wan okasi möön u bendi hedi. Ma dee njönku kijoo buta futoou a Jehovah. De piki Nebukatnesali taa: ’Di Gadu fuu di u ta dini sa heepi u. Ma ee an heepi u seei, tökuseei wa o bendi hedi da di goutu pindi fii.’

Di Nebukatnesali jei sö, hën hati fëën möön boonu seei. Wan onfu bi dë a zuntu dë, hën a taa: ’Këndë di onfu seibi toon möön kumafa a bi dë fosu!’ Hën a mbei dee möön taanga sodati fëën tai Sadaki, Mësaki ku Abetineko, hën de tuwë de go a di onfu dendu. Di onfu kendi gaanfa taa dee faja töngö kii dee taanga womi. Ma andi pasa ku dee dii njönku womi di de tuwë go a di onfu dendu?

Di könu tuwë wojo luku go a di onfu dendu, hën a ko fëëë seei. A hakisi taa: ’Na dii womi u bi tai tuwë go a di kendikendi onfu dendu nö?’

Dee futuboi fëën piki taa: ’Aai, dii womi.’

Hën di könu taa: ’Ma mi ta si fö womi ta waka lomboto a di faja dendu. De an dë taitai, nöö di faja an ta tjuma de tu. Nöö di u fö womi ta djei wan gadu.’ Di könu waka go möön zuntu a di dööbuka u di onfu, hën a bai taa: ’Sadaki! Mësaki! Abetineko! Un ko a döö, un dee futuboi u di Möön Hei Gadu!’

Di de ko kumutu, hii sëmbë bi sa si taa na wan soni du de. Hën di könu taa: ’Un gafa di Gadu u Sadaki, Mësaki ku Abetineko! A manda di engel fëën ko heepi de, u di de an bi kë bendi hedi da na wan woto gadu boiti di u de.’

Disi an dë wan bunu soni di ta lei fa u musu hoi useei a Jehovah u?