Dee sëmbë u Gadu kumutu a Babilon

PIKISÖ nöö fika, nöö a bi pasa tu jaa sensi di dee Media sëmbë ku dee Pëlsia sëmbë wini Babilon tei. Nöö luku andi ta pasa nöunöu! Awa, dee Isaëli sëmbë nango kumutu a Babilon. Unfa de du fii? Ambë fii de?

Di könu u Pëlsia de kai Silosi wë. Bifö de pai Silosi, Jehovah bi mbei hën tjabukama Jesaaja sikifi soni u di könu dë. A taa: ’Joo du leti kumafa mi kë fii du. Dee döö o fika jabijabi da i fii sa wini di köndë tei.’ Nöö Silosi bi tei fesi tuutuu go wini Babilon tei. A ndeti dee Media sëmbë ku dee Pëlsia sëmbë denda a di köndë di de disa dee döö jabijabi.

Ma Jehovah tjabukama Jesaaja bi taki tu taa Silosi bi o paaja di buka taa de musu toona mbei Jelusalen ku di Wosu u Gadu baka. Silosi bi du di soni dë u? Aai. Silosi piki dee Isaëli sëmbë taa: ’Un go nöunöu a Jelusalen, nöö un mbei di Wosu u Jehovah, un Gadu.’ Nöö di soni dë wë dee Isaëli sëmbë nango du aki.

Ma na hii dee Isaëli sëmbë u Babilon sa waka di longi pasi go baka a Jelusalen. Di pasi longi söwan 800 kilomëti, nöö sömëni u de gaandi poi nasö siki poi u waka sö longi. Nöö woto soni dë di mbei taa so u dee sëmbë an nango. Ma Silosi piki dee an nango taa: ’Un da dee sëmbë dee nango mbei Jelusalen ku di Wosu u Gadu soofu ku goutu ku woto gudu.’

Sö dee Isaëli sëmbë dee tei pasi nango a Jelusalen feni sömëni gudu. Söseei Silosi da de dee komiki ku dee kan di Könu Nebukatnesali bi tei puu a di Wosu u Jehovah di a bi booko Jelusalen. Dee sëmbë abi hia soni u tja go ku de.

Baka di dee Isaëli sëmbë waka söwan fö liba, hën de go dou a Jelusalen biten. A bi dë di u 70 jaa di de bi booko di köndë, nöö di köndë bi fika hooo söndö sëmbë. Ma hii fa dee Isaëli sëmbë dë a de köndë baka, tökuseei de o abi taanga ten u pasa, kumafa woo si a di woto di ta ko.