De buta futoou a di heepi u Gadu

DUSUDUSU sëmbë waka di langa pasi kumutu a Babilon go a Jelusalen. Ma di de dou, Jelusalen dë bookobooko. Na wan sëmbë bi ta libi naandë. Dee Isaëli sëmbë musu mbei hii soni baka.

Wan u dee fosu soni di de mbei da wan begi tafa. A dë wan kamian ka de sa kii mbeti tjuma da Jehovah. Wan tu liba a baka, dee Isaëli sëmbë bigi ta mbei di Wosu u Gadu. Ma felantima dee ta libi a dee köndë dee dë zuntu u dee Isaëli sëmbë, an kë u de mbei ën. Fëën mbei de pooba u mbei de fëëë u de an mbei di wosu möön. Te u kaba fëën, dee felantima dë mbei di njunjun könu u Pëlsia buta wan wëti u tapa di wosu mbei.

Dee jaa ta pasa. Teni-a-seibi jaa pasa sensi di dee Isaëli sëmbë kumutu a Babilon. Jehovah manda dee tjabukama fëën Hagai ku Sakalia go piki dee sëmbë u de bigi mbei di wosu baka. Dee sëmbë buta futoou a di heepi u Gadu, nöö de haika dee tjabukama. De bigi mbei di wosu baka, hii di wan wëti ta taki taa de an musu du ën.

Fëën mbei wan hei womi u Pëlsia de kai Tatenai go hakisi dee Isaëli sëmbë ambë da de pasi u de mbei di Wosu u Gadu. Dee Isaëli sëmbë piki ën taa di de bi dë a Babilon, Könu Silosi bi piki de taa: ’Un go nöunöu a Jelusalen, nöö un mbei di Wosu u Jehovah, un Gadu.’

Tatenai manda wan biifi go a Babilon u hakisi ee Silosi bi taki di soni dë tuutuu. Ma a di ten dë Silosi bi dëdë kaa. Hesihesi di njunjun könu u Pëlsia manda wan biifi baka. Di biifi bi taki taa Silosi bi taki sö tuutuu. Nöö fëën mbei di könu sikifi taa: ’Un disa dee Isaëli sëmbë be de mbei di Wosu u di Gadu u de. Nöö mi kë taa un musu heepi de.’ De kaba mbei di Wosu u Gadu a fö jaa dendu, nöö dee Isaëli sëmbë ta wai seei.

Sömëni jaa pasa möön. A fika piki möön nöö a dou 48 jaa sensi di de kaba mbei di Wosu u Gadu. Dee sëmbë u Jelusalen pooti, nöö di köndë ku di Wosu u Gadu an fiti a wojo. A Babilon ala, di Isaëli womi Ësala ko jei taa a dë fanöudu u seeka di Wosu u Gadu. Nöö i saandi a du ö?

Ësala go a Artakserkses, di könu u Pëlsia, nöö di bunu könu dë da Ësala sömëni gudu u tja go a Jelusalen. Ësala hakisi dee Isaëli sëmbë u Babilon u de heepi ën tja dee gudu dë go a Jelusalen. Söwan 6000 sëmbë taki taa de o go. De a’ hia soofu ku goutu ku woto gudu u tja go ku de.

Ësala ta kusumi biga hogiduma dë a di pasi bandja. A sa kë taa dee womi dë tei di soofu ku di goutu u de, nöö de kii de. Fëën mbei Ësala kai dee sëmbë ko makandi, kumafa i ta si a di peentje. Baka di dë de begi Jehovah faa tjubi de te de o tei di langa pasi go a Jelusalen.

Jehovah tjubi de tu. Nöö baka di de waka fö liba, hën de dou bumbuu a Jelusalen. Disi an ta lei taa Jehovah sa tjubi dee sëmbë dee ta futoou taa a o heepi de u?