Wan njunjun paladëisi a goonliba

LUKU dee hanse pau, dee waiti folo ku dee hei kuun. Na wan hanse kamian disi ö? Luku fa di djangafutu ta njan a di womi mii maun. Nöö luku dee lëun ku dee hasi taanputaanpu ala. Ja bi o kë abi wan wosu fii a sö wan hanse kamian u?

Gadu kë fii libi u teego a wan paladëisi a goonliba. An kë fii abi dee siki ku dee pen sëmbë abi a di ten aki. Di soni aki di Bëibel ta paamusi dee sëmbë dee o libi a di njunjun paladëisi: ’Gadu o dë ku de. Nöö dëdë nasö këë nasö sinkii hati an o dë möön. Dee awoo soni dee bi dë tuu pasa go kaa.’

Jesosi o mbei dee waiti soni aki pasa. I sa’ na un ten a o du ën u? Aai, baka te a puu hii hogilibi ku hogihati sëmbë a goonliba. Pakisei taa di Jesosi bi dë a goonliba a bi kula sëmbë di bi abi hii pei siki, nöö a bi weki sëmbë puu a dëdë tu. Jesosi bi du dee soni dë u lei sëmbë andi a o du a hii di goonliba te a toon Könu u di Könuköndë u Gadu.

Pakisei pikisö unfa di libi o suti a di njunjun paladëisi a goonliba! Jesosi o tii a liba makandi ku wan tu sëmbë di a tei. Dee tiima aki o luku hiniwan sëmbë a goonliba, nöö de o mbei hii sëmbë dë waiwai. Boo go luku andi u musu du sö taa Gadu sa da u teego libi a di njunjun paladëisi fëën.