Di fosu woto

Unfa i sa ko sabi andi Gadu kë taa i musu du

Andi da dee tumusi bunu soni di dë a di Bëibel dendu. (1)

Ambë da di sëmbë di sikifi Bëibel. (2)

Andi mbei i musu ko lei u sabi di Bëibel. (3)

1. Di Bëibel dë wan tumusi dii kado di Gadu da libisëmbë. A dë kuma wan biifi di wan bumbuu tata sikifi da dee mii fëën. A ta konda dee tuutuu soni u Gadu da u. Soni kuma: Ambë da Gadu, ku andi da dee wëti fëën. A ta konda da u finifini unfa u musu libi ku dee booko hedi dee u abi. Sö seei a ta konda da u andi u musu du u sa feni tuutuu kölöku. Di Bëibel wanwan tö ta konda da u andi u musu du u Gadu sa feni u bunu.​—Psalm 1:1-3; Jesaja 48:17, 18.

2. Sö wan fötenti peipei womi bi sikifi di Bëibel a wan pisiten u 1.600 jaa. De bi bigin sikifi 1513 jaa bifö di ten fuu. Di Bëibel abi sö wan 66 pikipiki buku. Gadu seei bi taki da dee sëmbë di bi sikifi di Bëibel, andi de bi musu sikifi. Hën da, dee pakisei u Gadu de bi sikifi, na di u de seei. Sö u ko si taa Gadu seei di ta libi a hemel da di sikifima u di Bëibel, ma na libisëmbë di ta libi a goonliba aki.​—2 Timoteo 3:16, 17; 2 Petuisi 1:20, 21.

3. Gadu seei bi mbei taa sëmbë sikifi di Bëibel söifi puu buta a woto pampia fu an sa lasi, nasö taa wan soni pasa kuëën. Di Bëibel mbei möön hia möön dee woto buku di dë. Ma na hii sëmbë o wai ku i fu di i ta lei u ko sabi di Bëibel. Ma ja musu mbei di soni dë tapa i fi ja go dou. Biga ee i kë kisi teego libi, nöö nömönömö i musu lei u ko sabi Gadu tuutuu. Sö seei i musu ta du dee soni di i ta lei, aluwasi sëmbë kë tapa i fi ja go dou.​—Mateosi 5:10-12; Johanisi 17:3.