Di u teni woto

Soni di Gadu an lobi

Unfa i musu pakisei u dee soni di Gadu taki taa dee an bunu. (1)

Un fasi u manu ku mujëë libi, Gadu an feni bunu. (2)

Unfa wan tuutuu bakama u Jesosi musu si hën te wan sëmbë ta lëgëdë (3) döbel (3) fufuu (3) du wan hogi hati soni (4) (bonu wooko (5) bebe daan dööngö. (6)

Unfa wan sëmbë sa kaba ku dee taku guwenti fëën. (7)

1. Dinima u Gadu lobi soni di bunu. Ma de musu lei tu fu na kë si soni di an bunu a wojo (Psalm 97:10). A kë taki taa dee an musu du soni di Gadu an kë si a wojo. Andi da wan tu u dee soni dë.

2. Gadu an feni hën bunu te wan womi ku wan mujëë ta libi söndö de tööu. Wotolibi di dë gaan zöndu a Gadu dë: kandi ku wan womi nasö mujëë bifö i tööu, kandi ku wan woto womi nasö mujëë hii di i tööu kaa, kandi ku wan mbeti kumafa i sa kandi ku wan womi nasö mujëë, kandi ku i mii di i paii kumafa i sa kandi ku i manu nasö mujëë ku te wan womi kandi ku wan woto womi kumafa a bi sa kandi ku wan mujëë (Leviticus 18:6; Loomë 1:26, 27;1 Kolente 6:9, 10). Ee wan womi ku wan mujëë an tööu a lanti, ma de ta libi ku de seei, nöö de musu paati nasö tööu kumafa lanti wëti ta taki.​—Hebelejën 13:4.

3. Lëgëdë, döbel, fufuu: Jehovah Gadu an sa lëgëdë (Titusi 1:2). Dee sëmbë dee kë taa A musu feni de bunu, an musu dë sëmbë di lobi u lëgëdë (Spreuken 6:16-19; Kolosën 3:9, 10). Hiniwan fasi u döbel ta söi taa u di wan sëmbë giii mbei a ta du hën. Fëën mbei dee tuutuu bakama u Jesosi an ta döbel a na wan fasi. Dee an ta bai lötu, ku dee an ta pëë kaita nasö agida u möni (Efeise 5:3-5). Sö seei dee tuutuu bakama u Jesosi an ta fufuu. Dee an ta bai fufuu soni. Sö seei de an ta tei wan soni u wan sëmbë söndö fu hakisi hën.​—Exodus 20:15; Efeise 4:28.

4. Taanga hati boonu, du hogi hati soni: Ee wan sëmbë an sa hoi hën seei te hën hati boonu, nöö a sa mbei a du hogi hati soni (Genesis 4:5-8). Wan sëmbë di ta du hogi hati soni an sa dë wan mati u Gadu (Psalm 11:5; Spreuken 22:24, 25). An dë wan bunu soni, te wan sëmbë du wan hogi hati soni ku u, fuu go du di seei soni ku di sëmbë baka.​—Spreuken 24:29; Loomë 12:17-21.

5. Tofu nasö bonu wooko: So sëmbë ta hakisi dee taku jeje makiti u sa kula sëmbë di siki. Nöö i abi wotowan di ta wisi dee felantima u de u mbei de ko siki nasö u kii de seei. Satan, hën abi di makiti u du hii dee soni dë. Fëën mbei tuutuu bakama u Jesosi an musu du na wan u dee soni dë (Deuteronomium 18:9-13). Te u dë zuntu a Jehovah bandja, hën da di möön bunu fasi u tjubi u seei da di wisi di woto sëmbë sa wisi u.​—Spreuken 18:10.

6. Bebe daan dööngö: An dë wan föutu soni u bebe pikisö win, bii, nasö wan woto soni di abi sopi nëën dendu (Psalm 104:15; 1 Timoteosi 5:23). Ma te i ta bebe pasa maiki ku te wan sëmbë bebe tee a dööngö, da soni di Gadu an kë si a wojo (1 Kolente 5:11-13; 1 Timoteosi 3:8). Bebe daan pasa maiki sa poi i gösöntu. Sö seei a sa booko di wosuden du libi fii. A sa mbei tu taa gaugau i ko wei u tötö futu da dee tesi di o miti i.​—Spreuken 23:20, 29-35.

7. Dee sëmbë dee ta tan du dee soni di Gadu taki taa an bunu u du, na o go a di Könuköndë u Gadu (Galasia 5:19-21). Ee tuutuu i lobi Gadu, hën i kë faa fii bunu, nöö di soni dë hën o mbei taa i mbei möiti u tapu ku dee taku guwenti dë (1 Johanisi 5:3). Ee Gadu taki taa wan soni an bunu, mbei möiti fu na kë si di soni dë a wojo (Loomë 12:9). Hulu ku dee sëmbë di ta tja de seei kumafa Gadu kë (Spreuken 13:20). Ee i nama ku dee tuutuu bakama u Jesosi di sabi di lei bunu kaa, nöö de o sa heepi i (Jakobosi 5:14). Ma boiti dee soni aki, i musu fitööu a di heepi di Gadu o heepi i te i ta begi.​—Filipi 4:6, 7, 13.

[Peentje a bladsëidë 20]

Dee soni di Gadu an kë si a wojo da, bebe daan dööngö, fufuu, döbel, ku te wan sëmbë ta du hogi hati soni